استانادان اۋىلعا دەيىن…
الماتى قالاسى
الماتىلىقتار تىككەن قۇراق كورپە گيننەستىڭ رەكوردتار كىتابىنا كىردى. كورپەنىڭ ۇزىندىعى 10 شاقىرىم 900 مەتردى قۇرايدى. ناۋرىز مەيرامىنان باستاپ تىگىلگەن كورپەنى تىگىنشىلەر قالا كۇنىندە اياقتادى. گيننەستىڭ رەكوردتار كىتابى باس كەڭسەسىنىڭ وكىلى دجونا برەنت مەرەكەگە ارنايى كەلىپ, رەسمي قۇجاتتى تابىس ەتتى.
تۇركىستان وبلىسى
تۇلكىباس اۋدانىنداعى تەڭىز بالىقتارىن وسىرەتىن كاسىپورىندا جىل سايىن 40 توننا بالىق ەتى مەن 30 كەلىدەن اسا ۋىلدىرىق ءوندىرىلەدى. بۇل جەردە بەكىرە, فارەل, اق امۋر, سازان بالىقتارى بار.
قاراعاندى وبلىسى
قاراعاندىدا «رۋحاني جاڭعىرۋ» باعدارلاماسى اياسىندا كارلاگتاعى قۇجاتتاردىڭ ەلەكتروندىق نۇسقاسى جاسالىپ جاتىر. وسى ماقسات ءۇشىن شاحتينسك قالاسىنداعى كىتاپحانا زاماناۋي سكانەر ساتىپ العان. جىل سوڭىنا دەيىن 400-گە جۋىق كىتاپ, گازەت جانە قولجازبا كوشىرمەسىن جاساۋ جوسپارلانعان.
باتىس قازاقستان وبلىسى
جانىبەك اۋدانىندا بەلگىلى اعارتۋشى, اقىن, ويشىل, جۋرناليست عۇمار قاراشتىڭ كەسەنەسى بوي كوتەردى. «تۋعان جەر» باعدارلاماسى اياسىندا اتقارىلعان يگىلىكتى ءىس ع.قاراش قورىنا ەل-جۇرتتان جينالعان 8 ملن تەڭگەگە اتقارىلدى. جاقىندا عۇمار قاراش شىعارمالارىنىڭ 3 تومدىعى دا جارىق كورگەن.
اقمولا وبلىسى
بۋرابايدا العاشقى اكۆاپارك سالىنادى. وسى ماقساتقا شيپاجاي ايماعىنداعى كولدىڭ جاعاسىنان 1 گەكتار جەر ءبولىنگەن. قۇنى 150 ملن تەڭگە تۇراتىن جوبانى جەرگىلىكتى كاسىپكەرلەردىڭ ءبىرى قولعا الىپتى. مۇنداي اكۆاپارك بۋرابايدا بۇرىن بولماعان. ءۇش بولىكتەن تۇراتىن اكۆاپاركتىڭ قۇرىلىسى 2019 جىلى باستالادى.
سولتۇستىك قازاقستان وبلىسى
وبلىستاعى شارۋاشىلىقتاردىڭ بىرىندە ءار گەكتارىنان 62 تسەنتنەردەن بيداي ورىلدى. بۇل – رەكوردتىق كورسەتكىش! بۇگىنگە دەيىن وبلىس بويىنشا 1 ملن توننا استىق جينالدى. ديقاندار كۇزگى ەگىن ورۋ جۇمىستارىن جۇرگىزۋ ءۇشىن جانار-جاعارمايمەن تولىق قامتاماسىز ەتىلگەن.
قىزىلوردا وبلىسى
وبلىس اۋماعىندا الەۋمەتتىك ءال-اۋقاتى تومەن 25 مىڭنان اسا وقۋشى ىستىق تاماقپەن قامتاماسىز ەتىلگەن. بالالاردى تەز دايىندالاتىن تاعامداردى ءجيى تۇتىنۋدان, گادجەتتەر مەن كومپيۋتەر الدىندا ۇزاق وتىرۋ سياقتى تەرىس ادەتتەردەن ارىلۋعا ۇگىت-ناسيحات جۇرگىزىلۋدە.