اقمولا وبلىسى
«رۋحاني جاڭعىرۋ» باعدارلاماسى اياسىندا «ابىلاي حاننىڭ قارا جولى» ەكسپەديتسياسى ساپارعا اتتاندى. بۋرابايداعى كوكشە تاۋىنىڭ ەتەگىندەگى ابىلاي حان الاڭىنان اتتانعان ەكسپەديتسيا ون كۇن بويى 18-ءشى عاسىرداعى «كوكشەتاۋ-اقمولا-ۇلىتاۋ-تۇركىستان» كەرۋەن جولىمەن ءجۇرىپ وتپەك.
قىزىلوردا وبلىسى
شيەلى اۋدانىندا سالىنىپ جاتقان تسەمەنت زاۋىتىندا 662 ادام جۇمىس ىستەيدى. بۇگىندە قۇرىلىس الاڭىندا جۇمىستىڭ 90 پايىزى اياقتالعان. جاڭا ءوندىرىس ورنى 2018 جىلدىڭ جەلتوقسان ايىندا پايدالانۋعا بەرىلەدى.
الماتى قالاسى
قازاق ۇلتتىق زەرتتەۋ جوبالاۋ ينستيتۋتىنىڭ ماماندارى قالا بيلىگىنە ەسكى ۇيلەردى ءسۇرۋدى تالاپ ەتتى. وتكەن عاسىردىڭ 30-40 جىلدارى ارالىعىندا سالىنعان ۇيلەر كاركاس پەن قامىستان, اعاشتان تۇرعىزىلعان. ەسكى ۇيلەر سەيسمولوگيالىق تالاپتارعا ساي كەلمەي تۇر.
تۇركىستان وبلىسى
تۇركىستاندا 330 كوشەگە جاڭادان اتاۋ بەرىلەدى. الداعى ۋاقىتتا اتالمىش كوشەلەرگە كۇلتەگىن, قازتۋعان جىراۋ, حانقورعان, التى الاش, ماڭگىلىك ەل, ەلىم-اي, بولات حان, كۇلتوبە سياقتى اتاۋلار بەرىلەتىن بولدى.
باتىس قازاقستان وبلىسى
ورال قالاسىندا سيرەك كەزدەسەتىن كىتاپتار مۋزەيى اشىلدى. ونداعى كونە جادىگەرلەر قاتارىندا كولەمى نەبارى 3-5 سانتيمەتر بولاتىن كىتاپتار دا بار. اقجايىق ءوڭىرىنىڭ تاريحى مەن تابيعاتى تۋرالى جازبالار دا قۇندى مۇرالار قاتارىنا قويىلعان.
قوستاناي وبلىسى
قوستاناي وبلىسىنىڭ ەمدەۋ مەكەمەلەرىنە 280 دارىگەر جەتىسپەيدى. انەستەزيولوگ, رەانيماتولوگ, اكۋشەر-گينەكولوگ سياقتى ماماندار اسا قاجەت ەكەن. قازىرگى ۋاقىتتا جۇمىس ىستەپ جاتقانداردىڭ 36 پايىزى – زەينەتكەرلىك جاسقا جەتكەندەر نەمەسە جاقىنداپ قالعاندار.
شىعىس قازاقستان وبلىسى
سەمەيدە رۋبيك تەكشەسىن قۇراستىرۋدان كەزەكتى ءبىرىنشىلىك ءوتتى. جارىسقا رەسپۋبليكانىڭ ءار ايماعىنان 9-39 جاس ارالىعىنداعى 60-قا جۋىق زياتكەر قاتىستى. جەڭىمپازدار مەدال, ماقتاۋ قاعازى جانە ارنايى اقشالاي سىيلىقتارمەن ماراپاتتالدى.
