استانادان اۋىلعا دەيىن…
استانا
تۇڭعىش پرەزيدەنت كىتاپحاناسىندا «ماڭگىلىك ەل يدەياسى: تاريحى مەن بولاشاعى» اتتى رەسپۋبليكالىق عىلىمي كونفەرەنتسيا ءوتتى. جيىنعا وتاندىق عالىمدار, دوكتورانتتار مەن ماگيسترانتتار قاتىستى. شارا سوڭىندا ولار «قازاقستان جولى: ماڭگىلىك ەل» مونوگرافياسىن شىعارۋعا ۋاعدالاستى.
الماتى
الماتىعا قالاىشىلىك جولاۋشى تاسىمالداۋعا ارنالعان 200 جاڭا اۆتوبۋس اكەلىندى. سىيىمدىلىعى ۇلكەن جاڭا اۆتوبۋستار №12, 19, 56, 70, 77, 123, 124, 137 مارشرۋتتارى بويىنشا جۇرەدى.
شىمكەنت
شىمكەنتتە «قازپوشتانىڭ» تسيفرلى كەڭسەسى اشىلدى. مۇندا تەك 2 كەڭەسشى عانا ازاماتتارعا كومەك كورسەتەدى. قالعان قىزمەتتەردىڭ بارلىعى اۆتوماتتاندىرىلعان.
شىعىس قازاقستان وبلىسى
ءۇرجار اۋدانىندا «تارباعاتاي» مەملەكەتتىك ۇلتتىق تابيعي ساياباعى اشىلدى. جاڭا ساياباق 6 ءتۇرلى كلاستەرلىك جەر تەلىمدەرىنەن تۇرادى. ونىڭ ەرەكشەلىگى, مۇندا وسىمدىكتەردىڭ وزگە اۋماقتا كەزدەسپەيتىن قىزىل كىتاپقا ەنگەن 35-تەن اسا ءتۇرى بار.
باتىس قازاقستان وبلىسى
ح.بوكەەۆا اتىنداعى وبلىستىق قازاق دراما تەاترىندا «مۇقاعالي, نۇرعيسا» دراماسى ساحنالاندى. وقيعا قازاقتىڭ ءبىرتۋار تۇلعالارى – كومپوزيتور نۇرعيسا تىلەنديەۆ پەن اقىن مۇقاعالي ماقاتاەۆتىڭ اراسىندا ءوربيدى. سپەكتاكل اقىننىڭ كومپوزيتورعا اماناتتاپ كەتكەن «ەسىڭە مەنى العايسىڭ» ولەڭىنە ءان جازۋمەن تۇيىندەلەدى.
ماڭعىستاۋ وبلىسى
اقتاۋدا قوقىستاردى سۇرىپتاپ سالۋعا ارنالعان جاشىكتەر قويىلۋدا. 4 جاشىكتىڭ ءبىرى شىنىعا, ەكىنشىسى پلاستيك بۇيىمدار مەن قاعازدارعا, سوڭعى ەكەۋى تۇرمىستىق قالدىقتارعا ارنالعان. مۇنداي جاشىكتەر قازىرگى ۋاقىتتا 8-شاعىن اۋدانداعى 5 ءۇيدىڭ جانىنا ورناتىلدى.
تۇركىستان وبلىسى
تۇركىستاندا قالا كۇنى مەرەكەسى اتالىپ ءوتتى. حالىقارالىق ءتۇركى الەمىنىڭ فورۋمىنا كەلگەن تۇركيا, ءۇندىستان, وزبەكستان, بولگاريا, يران, رەسەي, داعىستان ەلدەرىنىڭ ادەبيەتشىلەرى مەن اقىن-جازۋشىلارى قالا كۇنىنە ارنالعان مەرەكەلىك شاراسىنا ارنايى قاتىستى.
اتىراۋ وبلىسى
قايىرىمدىلىق ايلىعىنا وراي قايىرشاقتى اۋىلدىق وكرۋگىنىڭ اكىمدىگى مەن كاسىپكەر اسىلبەك سۇلتانوۆ وڭىردەگى قارتتار مەن مۇمكىندىگى شەكتەۋلى جاندارعا ارنايى اس بەردى. داستارقاننان ءدام تاتقان 80-نەن اسا قوناق شارانى ۇيىمداستىرۋشىلارعا العىستارىن ايتتى.