الماتى
الماتى اكىمدىگى قالانىڭ ەكولوگيالىق احۋالىنىڭ 2018-2025 جىلدارعا ارنالعان جوسپارىن بەلگىلەدى. ەندى 2025 جىلعا تامان اۋاعا تارالاتىن لاستاۋشى زاتتاردىڭ كولەمى جىلىنا 74 969 توننادان 72 012 تونناعا تومەندەتىلمەك. ال اۆتوكولىكتەردەن بولىنەتىن زياندى زاتتار جىلىنا 80 مىڭ توننادان 38 مىڭ تونناعا دەيىن ازايتىلادى.
قاراعاندى وبلىسى
شاحتينسك قالاسىندا بالاباقشا كەزەگىن تولىعىمەن شەشۋ ماسەلەسى قاراستىرىلىپ وتىر. وسى ماقساتتا الداعى جىلى فين تەحنولوگياسىمەن 320 بۇلدىرشىنگە ارنالعان مەكەمە سالىنباق. قازىرگى ۋاقىتتا كەزەكتە 300 بالا تۇر.
تۇركىستان وبلىسى
بايدىبەك اۋدانىندا قۇنى 1,3 ملرد تەڭگە بولاتىن سپورت كەشەنى پايدالانۋعا بەرىلدى. ونىڭ ىشىندە ۆولەيبول, باسكەتبول, فۋتبول, سونداي-اق جابىق تەننيس كورتى مەن ءجۇزۋ باسسەينى سەكىلدى ۇيىرمەلەر قاراستىرىلعان.
قوستاناي وبلىسى
قوستاناي وبلىسىندا تۇرعىن ءۇي قۇرىلىسى وتكەن جىلمەن سالىستىرعاندا ەداۋىر ارتقان. وسى جىلدىڭ 9 ايىندا 227,6 مىڭ شارشى مەتر باسپانا پايدالانۋعا بەرىلدى. ال جىل سوڭىنا دەيىن تاعى 63,3 مىڭ شارشى مەتر ءۇي تاپسىرىلادى.
اقمولا وبلىسى
اقمولا وبلىسىندا 2 ملن تونناعا جۋىق استىق ەكسپورتتالدى. ونىڭ 1907,9 مىڭ تونناسى شەتەلگە, ال 492,6 مىڭ تونناسى ەلىمىزدىڭ وزگە ايماقتارىنا شىعارىلدى. جىل سوڭىنا دەيىن قوسىمشا 950 مىڭ توننا استىق جونەلتۋ جوسپارلانىپ وتىر.
سولتۇستىك قازاقستان وبلىسى
وڭىردە 1 قاراشادان باستاپ جارىق پەن جىلۋ ارزاندادى. وسىعان دەيىن 1 كيلوۆاتت-ساعات ەلەكتر قۇنى ءۇشىن جەكە تۇلعالار 13,22 تەڭگە تولەپ كەلسە, ەندى بۇل باعا 11,8 تەڭگەنى قۇرايدى. ال زاڭدى تۇلعالار 16,32 تەڭگەنىڭ ورنىنا 14,57 تەڭگە تولەيدى.
ماڭعىستاۋ وبلىسى
جىل باسىنان بەرى ايماقتا 27 مىڭ جۇمىس ورنى اشىلدى. ونىڭ ىشىندە 22 مىڭ تۇرعىن تۇراقتى جۇمىسپەن قامتىلدى. بۇعان كاسىپكەرلىك سالاسىنىڭ سەپتىگى ءتيىپ وتىر. قازىرگى ۋاقىتتا 510 ادام ءوز جوباسىن قورعاپ, 192 تۇرعىن كاسىپكەر اتاندى.
اتىراۋ وبلىسى
12-13 قاراشا كۇندەرى «International Education Fair» شەتەلدىك جوعارى وقۋ ورىندارىنىڭ ءىرى كورمەسى وتەدى. مۇندا الەمنىڭ 40 ەلىنەن 200 ۋنيۆەرسيتەت وكىلدەرى قاتىسىپ, 20 مىڭ تەگىن ءبىلىم بەرۋ گرانتىن ۇسىنادى.
شىعىس قازاقستان وبلىسى
وڭىردەگى ءبىلىم وشاقتارىندا IT-سىنىبىن اشۋ جۇمىستارى جۇرگىزىلىپ جاتىر. مۇندا وقۋشىلار روبوتوتەحنيكا, باعدارلامالاۋ تىلدەرىن جانە 3D مودەلدەرىن جاساۋ نەگىزدەرىن ۇيرەنەدى.
