استانا
تسەلينوگراد اۋدانى قوسشى اۋىلىندا «قوسشى» وتباسىلىق-دەنساۋلىق ورتالىعى اشىلدى. مەملەكەتتىك-جەكەمەنشىك ارىپتەستىك اياسىندا اشىلعان ورتالىق ءبىر اۋىسىمدا 150 ادام قابىلداۋعا دايىن. ورتالىقتا 5 دارىگەر, 16 مەدبيكەنىڭ كومەگىمەن ۋچاسكەلىك قىزمەت, كۇندىزگى ستاتسيونار, لابوراتوريالىق قىزمەتتەر كورسەتىلمەك.
الماتى
الماتى وبلىسىندا مەملەكەتتىك كىرىستەر دەپارتامەنتىنىڭ قىزمەتكەرىنە زاڭسىز سىياقى بەرمەك بولعان ازامات 336 مىڭ 700 تەڭگە ايىپپۇل تولەدى. ا. ەسىمدى ازامات بىلدىرتپەي 1000 تەڭگە مولشەرىندە قاراجات تاستاپ كەتكىسى كەلگەن. وقيعا قاراساي اۋدانىندا بولعان.
شىعىس قازاقستان وبلىسى
كۇرشىم اۋدانىندا قىزىل كىتاپقا ەنگەن سارعالداق تۇقىمداس تاۋشىمىلدىقتىڭ تامىرىن قازعان 2 جىگىت ۇستالدى. ولاردان تاۋشىمىلدىقتىڭ 23 ءتۇپتامىرى تاركىلەنگەن. وسىمدىك قىزىل كىتاپقا ەنگەندىكتەن, ازاماتتاردىڭ ۇستىنەن قىلمىستىق ءىس قوزعالۋى مۇمكىن.
تۇركىستان وبلىسى
قر ۇكىمەتىنىڭ 22 ماۋسىمداعى №362 قاۋلىسىنا ساي, تۇركىستان وبلىسىنىڭ جاڭا قۇرىلاتىن جەتىساي, ماقتاارال, كەلەس, سارىاعاش اۋداندارىنىڭ شەكارالارى بەلگىلەندى. ماسەلەن, سارىاعاش اۋدان اۋماعى 417074 گەكتار, كەلەس اۋدانىنىڭ اۋماعى 345129 گەكتار, جەتىساي اۋدانى اۋماعىنىڭ اۋدانى 104634,19 گەكتاردى قۇرايدى.
اتىراۋ
اتىراۋلىق جاستار اراسىندا ۇزدىك بالىقشىلار انىقتالدى. جارىس كەزىندە جەمدى دۇرىس تاڭداپ, بالىقتى ەپتى ۇستاۋ ساپاسىنا ءمان بەرىلدى. وبلىستىق «جاس وتان» جاستار قاناتىنىڭ ۇيىمداستىرۋىمەن وتكەن بايقاۋعا قالا جانە اۋدانداردان 16-29 جاس ارالىعىنداعى ازاماتتار قاتىستى. ءبىرىنشى ورىندى جەتكىنشەك قۇلتەمىروۆ يەلەنىپ, 80 مىڭ تەڭگە كولەمىندەگى سىياقىمەن ماراپاتتالدى.
تالدىقورعان
تالدىقورعاندا «جەتىسۋ» جانە «وگني الاتاۋ» گازەتتەرىنىڭ 100 جىلدىق مەرەيتويىنا وراي اتالعان باسىلىمنىڭ جۋرناليستەرىنە پاتەر بەرىلدى. باسپانا كىلتتەرىن سالتاناتتى كەشتە الماتى وبلىسىنىڭ اكىمى اماندىق باتالوۆ تابىستادى.
قىزىلوردا وبلىسى
ارال اۋداندىق جەدەل جاردەم ستانساسى جاڭا 3 كولىكپەن تولىقتى. جىل سوڭىنا دەيىن تاعى دا 12 كولىك كەلەدى دەپ كۇتىلۋدە. جوسپارلانعان جۇمىستار جۇزەگە اسقان جاعدايدا, ەسكى كولىكتەردىڭ ءبىرازى جاڭارتىلىپ, جەدەل جاردەمنىڭ قىزمەتى دە جاقسارا تۇسپەك.
