كەشە استانادا نۇرسۇلتان نازارباەۆ پرەزيدەنتتىڭ بيىلعى جىلعى «التىن ساپا» سىيلىعىن ءوزىنىڭ جاڭا يەگەرلەرىنە تاپسىردى.
مەملەكەت باسشىسى وسى جيىندا بيزنەستى جۇرگىزۋ جەڭىلدىگى جونىندەگى وڭىرلەر مەن قالالاردىڭ رەيتينگى ناتيجەسى بويىنشا العا شىققان استانا قالاسىنىڭ اكىمى اسەت يسەكەشەۆكە ارنايى سىيلىق تابىس ەتتى.
باسقوسۋدا بۇدان بولەك, پرەزيدەنتتىڭ ارناۋلى «التىن ساپا» سىيلىعىنىڭ بيىلعى جىلعى اتالىم يەلەرى انىقتالدى. ونىڭ شەڭبەرىندەگى «ۇزدىك يندۋستريالىق جوبا» سىيلىعى – «Giessenhaus» جاۋاپكەرشىلىگى شەكتەۋلى سەرىكتەستىگىنىڭ ديرەكتورلار كەڭەسىنىڭ تەڭ توراعاسى ۆ.ليتۋەۆكە, «ۇزدىك يننوۆاتسيالىق جوبا» سىيلىعى – «Recycling Company» جاۋاپكەرشىلىگى شەكتەۋلى سەرىكتەستىگىنىڭ جوبا جەتەكشىسى ا.ريابينينگە, «ساپا كوشباسشىسى» سىيلىعى – «قازفوسفات» جاۋاپكەرشىلىگى شەكتەۋلى سەرىكتەستىگى باسقارماسىنىڭ توراعاسى م.ەسەنوۆكە, «ۇزدىك ازىق-تۇلىك تاۋارلارىن جانە/نەمەسە اۋىل شارۋاشىلىعى ونىمدەرىن شىعاراتىن كاسىپورىن» سىيلىعى «ابزال جانە كومپانيا» تولىق سەرىكتەستىگىنىڭ ديرەكتورى م.ەراليەۆكە بەرىلدى, «پارىز» بايقاۋىنىڭ گران-پري جۇلدەسى «ەۆرازيالىق توپ» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ا.ماشكەۆيچكە تابىس ەتىلدى.
