قالانى گازبەن جىلىتۋ الدەقايدا ءتيىمدى ەكەن. سوندىقتان استانا الداعى ۋاقىتتا گازداندىرۋ ءجۇيەسىنە كوشىرىلمەك. مەملەكەت باسشىسىنىڭ بەس باستاماسىندا دا كوتەرىلگەن بۇل ۇدەرىس ەلوردادا كەلەر جىلدارى جۇزەگە اسىرىلا باستايدى.
استانانى گازداندىرۋ ءجونىندە مەملەكەتتىك ساراپتاما جۇرگىزۋ ءۇشىن ازىرلەنگەن تەحنيكالىق-ەكونوميكالىق نەگىزدەمە «مەمساراپتاما» رەسپۋبليكالىق مەملەكەتتىك كاسىپورنىنا جىبەرىلگەن. ساراپتاما قورىتىندىسى جىل سوڭىنا دەيىن شىعارىلادى.
جالپى, استانادا گاز تاراتۋ جەلىلەرىنىڭ قۇرىلىسى ءۇش كەزەككە بولىنگەن ەكەن. قازىرگى ۋاقىتتا گازداندىرۋ ۇدەرىسىن جەدەلدەتۋ ءۇشىن تەن مەن قالالىق اكىمدىك جوبانىڭ ءبىرىنشى كەزەگىنىڭ 9 كەشەنىن ىسكە قوسۋ ءۇشىن جوبالاۋ-سمەتالىق قۇجاتتاما ازىرلەۋدە. ونىڭ ءبىرىنشى كەشەنى ىسكە قوسىلعاندا اگرس-1-دەن جەو-1 جانە جەو-3-ءتىڭ سۋ جىلىتقىش قازاندىقتارى مەن مازۋت قازاندارى گازبەن قامتاماسىز ەتىلمەك. ال ەكىنشى كەشەن ىسكە قوسىلعاندا تابيعي وتىن اگتس-2-دەن جەو-2-ءنىڭ سۋ جىلىتقىش قازاندارىنا جىبەرىلمەك. سول سياقتى 3-6 كەشەندەر كوكتال-1, كوكتال-2 تۇرعىن ءۇي الاپتارىنا, جەتىنشى كەشەن جەلەزنودوروجنىي تۇرعىن الابىنا, ال 8-9 كەشەندەر وڭتۇستىك-شىعىس تۇرعىن الابىنا گاز تاراتادى دەپ جوسپارلانعان. جسق ءبىرىنشى كەزەكتىڭ قورىتىندىسى 2019 جىلدىڭ ءبىرىنشى توقسانىندا دايىن بولاتىن كورىنەدى.
ال 2-3-ءىنشى كەزەكتەگى گاز تاراتۋ جەلىلەرىنىڭ قۇرىلىسى 2021-2023 جىلدارى ارالىعىندا جەرگىلىكتى جانە رەسپۋبليكالىق بيۋدجەت, سونداي-اق جەكە ينۆەستيتسيالار ەسەبىنەن جۇزەگە اسىرىلماق. ەكىنشى كەزەكتەگى گاز تاراتۋ جەلىلەرى قۇرىلىسىنىڭ جوباسى شەڭبەرىندە ميچۋرينو, ينتەرناتسيونالنىي, كۇيگەنجار, تەلمان, پريگورودنىي, Garden Village جانە Family Village تۇرعىن الاپتارى دا تابيعي وتىنمەن قامتاماسىز ەتىلمەك.
