ءار جىلى ماۋسىمنىڭ ءۇشىنشى جەكسەنبىسىندە ەلىمىزدە مەديتسينا قىزمەتكەرلەرى كۇنى اتالىپ وتىلەدى. ەلوردالىق 8 مىڭ دارىگەر مەن وسى سالانىڭ 12 مىڭعا تارتا ورتا بۋىن ماماندارىن كاسىبي مەرەكەسىمەن قۇتتىقتايمىز.
ەلوردانىڭ بەيبىتشىلىك جانە كەلىسىم سارايىندا «Jastar Jyly» جانە «رۋحاني جاڭعىرۋ» باعدارلاماسى اياسىندا «جاستار ەنەرگياسى – ەلوردالىق دەنساۋلىق ءىسىنىڭ سەنىمدى بولاشاعى» اتتى مەديتسينالىق قىزمەتكەر كۇنىنە ارنالعان اۋقىمدى ءىس-شارا ءوتتى. بيىل ەكىنشى جىل قاتارىنان وتكىزىلىپ وتىرعان «ALTYN SHIPAGER» مەديتسينالىق سىيلىعىنىڭ يەگەرلەرىن دە وسى سالتاناتتى جيىندا انىقتادى. بۇل سىي-قۇرمەت ەلوردا مەديتسينا قىزمەتكەرلەرىنىڭ رۋحىن كوتەرۋ جانە اق حالاتتى ابزال جانداردىڭ ەرەن ەڭبەگىن ەلەپ, ونىڭ قىزمەتىنە ءىلتيپات كورسەتۋ ماقساتىندا ۇيىمداستىرىلدى.
سالتاناتتى ءراسىمدى قر دەنساۋلىق ساقتاۋ ءمينيسترى ەلجان ءبىرتانوۆ قۇتتىقتاۋ سوزىمەن اشىپ, «ەڭ ۇزدىك جاس ۋچاسكەلىك دارىگەر» اتالىمى بويىنشا «نيەت» وتباسىلىق دەنساۋلىق ساقتاۋ ورتالىعىنىڭ جالپى تاجىريبەلىك دارىگەرى سالتانات تاكەەۆانى جەكە قۇتتىقتاپ, «التىن شيپاگەر» ءمۇسىنى مەن 1 ميلليون تەڭگە قارجىلاي سەرتيفيكاتىن تابىستادى.
نۇر-سۇلتان قالاسى اكىمىنىڭ ورىنباسارى ەرلان كاناليموۆ ءوز سوزىندە قالالىق دەنساۋلىق ساقتاۋ سالاسىنداعى جەتىستىكتەرگە توقتالدى: «بۇگىن ەلوردالىق دەنساۋلىق ساقتاۋ الدىندا كۇردەلى مىندەتتەر تۇر. دەنساۋلىق ساقتاۋدىڭ تيىمدىلىگىن ارتتىرۋ, قازىرگى زامانعى تەحنولوگيالار مەن پراكتيكانى ەنگىزۋ, مەديتسينالىق كومەكتىڭ ساپاسى مەن قولجەتىمدىلىگىن جەتىلدىرۋ, بىلىكتى كادرلاردى دايىنداۋعا باسا نازار اۋدارۋ قاجەت» دەپ اتاپ ءوتتى ەرلان ەرمەكۇلى. اكىم ورىنباسارى «پاتسيەنتكە باعىتتالۋى بويىنشا ەڭ ۇزدىك مەديتسينالىق ۇيىم» اتتى ەكىنشى نوميناتسيانىڭ جۇلدەگەرى بولىپ تانىلعان قالالىق №10 ەمحانا باسشىسىنا جۇلدەسىن تاپسىرىپ, ۇجىمدى تابىسىمەن قۇتتىقتادى.
ەلوردا وسى سالاداعى كورسەتكىشتەرىمەن رەسپۋبليكا بويىنشا كوشباسشىسى رەتىندە مويىندالىپ وتىر. باس شاھاردىڭ زاماناۋي كلينيكالارىندا ەم العان ءاربىر بەسىنشى پاتسيەنت وڭىرلەردەن كەلەدى ەكەن. قالامىزدا «باستاپقى مەديتسينالىق-سانيتارلىق كومەك» كورسەتەتىن مەديتسينالىق ۇيىمداردى دامىتۋ تۇجىرىمداماسىنا سايكەس جاڭا ەمحانالار مەن ستاتسيونارلار سالىنىپ, مامانداردىڭ بىلىكتىلىگىن كوتەرۋگە بارىنشا نازار اۋدارىلىپ كەلەدى. وتكەن جىلدىڭ دەرەگىنە سايكەس نۇر-سۇلتان قالاسى اۋرۋحانالارىندا 200 مىڭنان استام ادام ەمدەلگەن, 57 مىڭعا جۋىق وتا جاسالىپ, 28 مىڭنان اسا بالا جارىق دۇنيە ەسىگىن اشقان. قالا ەمحانالارىنا تۇرعىندار 4,5 ميلليون رەت قارالعان. ءجۇز مىڭنان اسا ناۋقاس تەگىن ءدارى-دارمەكپەن قامتاماسىز ەتىلگەن.
كەلەسى نوميناتسيا بويىنشا نۇر-سۇلتان قالاسىنداعى مەديتسينا مەكەمەلەرى باسشىلارى اراسىندا «دەنساۋلىق ساقتاۋدىڭ ءتيىمدى مەنەدجەرى» انىقتالدى. قالالىق قوعامدىق دەنساۋلىق ساقتاۋ باسقارماسىنىڭ باسشىسى مارات شورانوۆ قوماقتى قارجىسى بار سىيلىقتى جەدەل-جاردەم ستانتسياسىنىڭ باس دارىگەرى تيمۋر مۇراتوۆقا سالتاناتتى تۇردە تاپسىردى. №2 پەريناتالدى ورتالىعىنىڭ مەدبيكەسى – مەڭسۇلۋ ءامىروۆا «ەڭ ۇزدىك ورتا مەديتسينالىق قىزمەتكەر» نوميناتسياسىنىڭ جەڭىمپازى بولدى. ەلوردانىڭ ۇزدىكتەرى قاتارىندا «دياگنوستيكا مەن ەمدەۋدىڭ جاڭا ءادىسىن ەنگىزگەنى ءۇشىن» قالالىق №1 اۋرۋحانانىڭ ورتوحيرۋرگيا جانە ەندوپروتەز ءبولىمىنىڭ مەڭگەرۋشىسى رۋسلان بوتاەۆ, «جەدەل جاردەمنىڭ ۇزدىك بريگاداسى» نوميناتسياسىندا جەدەل مەديتسينالىق جاردەم قىزمەتىنىڭ تاجىريبەلى بريگادالارىنىڭ ءبىرى – قالالىق جەدەل-جاردەم ستانتسياسىنىڭ «سارىارقا» قوسالقى ستانساسىنىڭ №1 بريگاداسى, «تسيفرلاندىرۋدىڭ كوشباسشىسى» بولىپ, قالالىق №7 ەمحانا العا شىقتى. ماراپاتقا لايىقتىلاردى تاڭداۋدا قالا تۇرعىندارىنىڭ دەنساۋلىعىن قورعاۋ, ولارعا كورسەتىلەتىن قىزمەت ساپاسىن جاقسارتۋ, حالىققا مەديتسينالىق جاردەمنىڭ قولجەتىمدىلىگى مەن بيىك ساپاسى ەڭ باستى كورسەتكىش بولىپ تابىلادى. ۇزدىكتەردى ماراپاتتاۋ ءراسىمى نۇر-سۇلتان قالاسى اكىمدىگىنىڭ جانە قر دەنساۋلىق ساقتاۋ مينيسترلىگىنىڭ قولداۋىمەن وتكىزىلدى.
ەلوردا دەنساۋلىق ساقتاۋ سالاسىنىڭ ماسەلەلەرىن, ۇلتتىق مەديتسينانىڭ دامۋىنا اتسالىسىپ, اق حالاتتى جانداردىڭ ىزگى قىزمەتىن وقىرماندارعا جەتكىزىپ, سالاماتتى ءومىر سالتىن قالىڭ بۇقاراعا ناسيحاتتاپ جۇرگەن «استانا اقشامى» گازەتىنىڭ ءتىلشىسى ايگۇل ۋايسوۆا «باق-تاعى ۇزدىك جاريالانىم» نوميناتسياسى بويىنشا «ALTYN SHIPAGER» سىيلىعىنىڭ جۇلدەگەرى اتاندى.
