ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ اقپاراتتىق تەحنولوگيالار فاكۋلتەتىنىڭ وقىتۋشىسى نۇرزادا امانگەلدى قازاقشا ىمداۋ ءتىلىن تانۋدىڭ ينتەللەكتۋالدى جۇيەسىن جاساپ شىعاردى.
بىرەگەي ازىرلەمە ەرەكشە قاجەتتىلىكتەرى بار ادامدارعا ارنالعان. جۇيە – قازاقشا ىمداۋ تىلىنە بەيىمدەلگەن جانە بۇل ونىڭ باستى بىرەگەيلىگى. جۇيەنى ازىرلەۋ بارىسىندا ول ءبىر ىمنىڭ بىرنەشە نۇسقاسىن دايىنداعان. عالىم ولاردى كورسەتىلۋ كۇردەلىلىگى بويىنشا توپتارعا ءبولىپ, ارقايسىسى ءۇشىن جاساندى نەيروندى جەلى مودەلىن ازىرلەگەن.
جۇيە بولاشاقتا ىم ءالىپبيىن, ىم ءتىلىن بىلەتىن سۋردواۋدارماشىلاردى دايىنداي الادى. مۇنداي ماماندار ءتۇرلى مەملەكەتتىك ۇيىمدارعا قاجەتتى. بۇگىنگى تاڭدا ءبىز ءموبيلدى قوسىمشا جاساۋعا كىرىستىك. ونىڭ كومەگىمەن ىم تىلىمەن ءوزارا سويلەسۋگە بولادى. سويلەۋدى ماتىنگە, ءماتىندى ىمعا جانە كەرىسىنشە تۇرلەندىرەتىن جۇيە قۇرىلادى. وسى جوبامنىڭ ارقاسىندا ەرەكشە قاجەتتىلىكتەرى بار ادامداردىڭ مەكتەپتە ىڭعايلى وقۋى, مەديتسينالىق جانە مەملەكەتتىك مەكەمەلەردە قىزمەت الۋى جانە ەركىن سويلەسۋى مەن ءۇشىن وتە ماڭىزدى. وسى تاقىرىپتى زەرتتەپ, ءوز ۇلەسىمدى قوسۋ – ازاماتتىق بورىشىم, – دەپ ءتۇسىندىردى عالىم.
زەرتتەۋ ناتيجەسى بويىنشا نۇرزادا امانگەلدى اۆتورلىق كۋالىككە يە بولدى جانە الەمدىك رەيتينگى جوعارى جۋرنالداردا 3 ماقالا جاريالادى. وتكەن جىلى عالىم ەۇۋ «JANA ASU» ىشكى گرانتتىق قارجىلاندىرۋىن يەلەندى.
«قازاقستاندىق ساڭىراۋلار قوعامى» قوعامدىق بىرلەستىگىنىڭ ۆيتسە-پرەزيدەنتىمەن كەزدەسۋ بارىسىندا ولاردىڭ بالالاردى وقىتۋعا قاتىستى ماسەلەلەرىن ءبىلدىم. قازاقشا جانە باسقا تىلدەر بويىنشا ىمداۋ ءتىلىن ۇيرەتۋگە ارنالعان زياتكەرلىك ترەناجەر – ساڭىراۋ قوعامىنداعى ەستۋ قابىلەتى بۇزىلعان بالالارعا ۇلكەن كومەك كورسەتە الاتىن قاجەتتىلىك. مۇنداي وقىتۋ جۇيەسى بالالارعا ىمداۋ ءتىلىن ۇيرەنۋگە جانە قورشاعان ورتادا قارىم-قاتىناس جاساۋدى ۇيرەنۋگە مۇمكىندىك بەرەدى. اقش پەن ءبىزدىڭ عالىمدار توبى ەلدەگى ەستۋ جانە سويلەۋ قابىلەتى بۇزىلعان ادامدار ءۇشىن ءبىلىم بەرۋ جانە وعان قولجەتىمدىلىك سالاسىندا بىرقاتار زەرتتەۋلەردى باستادى. ءبىزدىڭ بىرلەسكەن جۇمىسىمىز ەلىمىزدە عانا ەمەس, ورتالىق ازيادا پايدالى بولاتىن ۇلكەن عىلىمي جوباعا اينالادى دەپ سەنەمىز, – دەدى نۇرزادا امانگەلدى.
ەۇۋ عالىمى ءوزىنىڭ عىلىمي ازىرلەمەسىن كوممەرتسيالاندىرۋدى قولعا الماق. ول قر عىلىم قورىنىڭ بايقاۋىنا قاتىسۋ ءۇشىن ءوتىنىم جولدادى.
