ەشقانداي قىزمەتكەرى جوق, بىراق تۇتىنۋشىلارعا روبوتتار قىزمەت ەتەتىن پوشتا بولىمشەسىنە باردىڭىز با؟ ينتەرنەت-دۇكەنگە تاپسىرىس بەرگەن كيىمىڭىزدى الدىن الا ونلاين كيىپ كورگىڭىز كەلە مە؟ بۇل جۋىق ارادا مۇمكىن ەمەس دەپ ويلايسىز با؟ الايدا استانادا مۇنداي قىزمەت ءتۇرىن كورسەتەتىن پوشتا بولىمشەلەرى ءوز جۇمىسىن باستاپ تا كەتتى.
روبوتتاندىرىلعان كەڭسە
– قۋانىش, مەن سالەمدەمە جىبەرۋىم كەرەك. ول ءۇشىن نە ىستەيىن؟
– سالەمدەمەنى الۋ جانە جىبەرۋ ءۇشىن «پوچتاماتتىڭ» 6 زوناسىنا وتكەنىڭىز ءجون. سالەمدەمە جىبەرەتىن كەزدە كورسەتىلگەن سىزىققا الۋشىنىڭ يندەكسىن, مەكەنجايى تۋرالى مالىمەتتەردى جازىڭىز.
«ەحرو» اۋماعىندا ورنالاسقان پوشتا بولىمشەسىندە روبوت قۋانىشپەن اراداعى اڭگىمە وسىلاي ءوربىدى. بۇل جاي بولىمشە ەمەس. تۇرعىندارعا جاڭا فورماتتا قىزمەت كورسەتەتىن جەردە الداعى ۋاقىتتا قىزمەتكەرلەر جۇمىس ىستەمەيدى. تۇتىنۋشىلارعا روبوتتار كەڭەس بەرەدى. ەگەر قوسىمشا كەڭەس كەرەك بولعان جاعدايدا كومپيۋتەردىڭ كومەگىمەن ۆيدەوبايلانىس جاساي الاسىز نەمەسە گيبريدتى بانكومات ارقىلى «قازپوشتانىڭ» كولل-ورتالىعىنا حابارلاسۋعا بولادى.
«قازپوشتا» اق روبوپوست-كەڭسەسىنىڭ جەتەكشى مامانى ارايلىم بەگالينا بولىمشەنىڭ ءىشىن ارالاتىپ, تۇتىنۋشىلارعا قانداي زاماناۋي قىزمەت كورسەتىلەتىنىن تانىستىرىپ شىقتى.
– گيبريدتى بانكومات دەپ اتالۋى ستاندارتتى قىزمەت كورسەتۋدەن بولەك قوسىمشا قىزمەت تۇرلەرىن دە اتقارا الادى. ماسەلەن, روبوت قۋانىش ارقىلى تولەم كارتاسىن الۋعا ءوتىنىش بەرەسىز, ال گيبريدتى بانكومات ونى شىعارىپ بەرەدى. بۇل اتاۋلى كارتا – KAZPOST/AliExpress. اتالمىش تولەم كارتاسى الەمگە ايگىلى AliExpress دۇكەنىنەن تاۋار العاندا جانە ءاربىر ساۋداڭىزعا 1,5 پايىز كەشبەك جيناۋعا مۇمكىندىك بەرەدى, – دەپ ءتۇسىندىردى.
گيبريدتى بانكومات جەكە كۋالىگىڭىزدى سكانەرلەيدى. الداعى ۋاقىتتا جسن تەرمەي-اق ايىپپۇلدارىڭىزدى تەكسەرىپ, بيۋدجەتكە تولەنەتىن سالىقتاردى دا تولەۋگە بولادى. سونىمەن قاتار, ساۋساق ىزدەرى ارقىلى بانكوماتتان اقشا شەشۋدىڭ جولدارى قاراستىرىلۋدا.
– ەگەر ءسىزدىڭ تولەم كارتاڭىز بيومەتريالىق دەرەكتەرىڭىزبەن سايكەستەندىرىلسە, كارتانى الىپ ءجۇرۋدىڭ قاجەتى جوق. بار بولعانى باس بارماعىڭىزدى قۇرىلعىعا قويساڭىز, قاجەت سوماڭىزدى شەشىپ الۋعا بولادى, – دەيدى وفيس مامانى.
گيبريدتى بانكومات ارقىلى كەز كەلگەن كارتاعا اقشا سالۋعا, الۋعا, اۋدارۋعا بولادى ءارى «قازپوشتانىڭ» بارلىق قىزمەت تۇرلەرىن پايدالانۋعا ىڭعايلى. ول ءۇشىن post.kz سايتىنداعى جەكە كابينەتكە كىرىپ, ادامنىڭ بەت-الپەتىن تانۋ قىزمەتى ارقىلى ەشقانداي لوگين, قۇپياسوز تەرمەي-اق قالاعان قىزمەتتى الاسىز. ونداعى كامەرا ءتۇرىڭىزدى تانىپ, كىرۋگە مۇمكىندىك بەرەدى.
بولىمشەدە ينتەرنەت-دۇكەنگە تاپسىرىس بەرگەن كيىمىڭىزدى ونلاين كيىپ كورۋگە بولادى. ەگەر ۇناماسا اۋىستىرۋعا, باسقا ۇلگىدەگى كيىمدەردى تاڭداپ, كيىپ تە كورۋگە بولادى.
سالەمدەمە سۋپەرماركەتى
«قازپوشتانىڭ» جاڭا فورماتىنىڭ ءبىرى – سالەمدەمە سۋپەرماركەتى. سۋپەرماركەت – ىڭعايلى سەرۆيس. وندا كليەنتتەر كەزەككە تۇرمايدى جانە وزىنە ءتيىمدى ۋاقىتتا سالەمدەمەسىن الىپ كەتە الادى. ول ءۇشىن سالەمدەمە سۋپەرماركەتىندە بەلگىلەنگەن, ارنايى تەرمينالعا سالەمدەمەنىڭ ترەك ءنومىرىن نەمەسە ۇيالى تەلەفوننىڭ ءنومىرىن ەنگىزۋ قاجەت. بۇل تەرمينال جۇيەدە سۇرانىس بولعان سالەمدەمەنى تاۋىپ, سورەسى, قاتارى, ۇياشىقتارى كورسەتىلگەن تالون بەرەدى. كليەنت وزدىگىنەن زالعا كىرىپ, كورسەتىلگەن ۇياشىقتان وزىنە كەرەك سالەمدەمەنى الادى. شىعا بەرىستە تۇرعان وپەراتورعا مالىمەتتەردى تەكسەرۋ ءۇشىن جانە ۇستەمە تولەماقىسىن تولەۋ قاجەتتىلىگىن انىقتاۋ ءۇشىن جەكە كۋالىگىن كورسەتەدى. ال سالەمدەمە جىبەرۋ ءۇشىن كليەنت گوفروتارانى (تارانى, ورامداردى) قر بويىنشا جەتكىزۋ ءۇشىن قۇنى ەسكەرىلگەن باعامەن جانە ترەك ءنومىرى بەرىلگەن تۇرىندە الادى. ارنايى بولىنگەن ورىندا ءوز سالەمدەمەسىن وراپ-ءتۇيىپ بولعاننان كەيىن تەرمينالعا «جىبەرۋ» كنوپكاسىن باسادى, جاپسىرىلعان شتريحكودتى سكانەرلەيدى. ەڭ سوڭىندا تەرمينال بەرگەن تالوندى الادى. وندا قازاقستان بويىنشا سالەمدەمەنىڭ ءجۇرۋ جولىن باقىلاپ وتىراتىن ترەك ءنومىر كورسەتىلەدى.
استانا قالاسىنىڭ تۇرعىندارى وسى قىزمەت ءتۇرىن كەڭىنەن پايدالانادى. سالەمدەمە سۋپەرماركەتى ارقىلى كۇنىنە 10500 سالەمدەمە قابىلدانىپ, 1000-1500-عا جۋىعى جونەلتىلەدى. بۇگىندە ەلوردادا جاڭا فورماتتاعى 9 سالەمدەمە سۋپەرماركەتى قىزمەت كورسەتەدى.
پايدالى پوچتامات
روبوتتاندىرىلعان كەڭسەدە پوچتامات ورنالاسقان. اۆتوماتتاندىرىلعان بۇل تەرمينال ارقىلى سالەمدەمە قابىلداپ ءارى جولداۋعا بولادى. قازىرگى ۋاقىتتا استانادا «قازپوشتانىڭ» 21 پوچتاماتى بار. كۇن سايىن 500-گە جۋىق سالەمدەمە بەرىلەدى. مۇنداي تەرمينالدار حالىق كوپ شوعىرلانعان قوعامدىق ورىندارعا, ويىن-ساۋىق ورتالىقتارىنا, ساۋدا ۇيلەرىنە قويىلعان. كۇنى-ءتۇنى جۇمىس ىستەيتىن پوچتاماتتار تۇرعىندار ءۇشىن وتە ىڭعايلى. قالاعان ۋاقىتىندا قىزمەتىن پايدالانا بەرەدى.
سالەمدەمەنى الۋ دا – وڭاي. پوچتاماتتىڭ ەكرانىنا تەلەفون ءنومىرىڭدى تەرىپ, سمس ارقىلى كەلگەن سالەمدەمە كودىن ەنگىزسەڭىز بولعانى. ال سالەمدەمە جىبەرۋ ءۇشىن بانكتىك كارتوچكا ارقىلى نەمەسە قولما-قول سالەمدەمەنىڭ اقشاسىن تولەسەڭىز جەتكىلىكتى.
پوشتا تاريحىنان
استانالىق پوشتا قىزمەتىنىڭ تاريحى ارىدە جاتىر. ءداستۇرلى فورماتتان جاڭا فورماتقا كوشۋ جولى ۇزاق ۋاقىتتى قاجەت ەتتى.
قالالىق پوشتانىڭ عيماراتى 1966 جىلى قالانعان. تۇرعىندارعا ءالى كۇنگە دەيىن وسىندا قىزمەت كورسەتەدى.
1998 جىلى استانا قالاسىندا 19 پوشتا بولىمشەسى بولسا, 2018 جىلى 21 بولىمشەسى حالىققا قىزمەت ەتۋدە. پوشتا قىزمەتكەرلەرىنىڭ سانى 44 ادامنان 89 ادامعا كوبەيگەن.
20 جىل بۇرىن تەك پوشتا قىزمەتىن كورسەتسە, قازىرگى ۋاقىتتا قارجىلىق جانە اگەنتتىك قىزمەتتەردى ۇسىنادى.
