سوچي قالاسىندا جىل سايىن وتەتىن «حرۋستالنوە كولەسو» بايقاۋىندا ويىن-ساۋىق پەن دەمالىس يندۋسترياسىنداعى ۇزدىكتەر انىقتالادى. بيىلعى XV بايقاۋدا استانالىق ساياباق تمد بويىنشا 2017 جىلدىڭ ەڭ ۇزدىك اشىق ويىن-ساۋىق ساياباعى اتاندى.
وسى جولى بايقاۋعا 162 ساياباق قاتىستى. ولاردىڭ اراسىندا ماسكەۋ, سانكت-پەتەربۋرگ, مينسك, تبيليسي جانە وزگە دە مەگاپوليستەردىڭ ساياباقتارى بولدى.
استانالىق ساياباق «كەلۋشىلەر سانى جىلىنا 500 مىڭنان 1 ملن ادامعا دەيىن جەتەتىن ۇزدىك اشىق ويىن-ساۋىق ساياباعى» اتالاتىن ەڭ ءىرى اتالىمدا توپ جاردى.
استانالىق ساياباقتا اتتراكتسيونداردان باسقا, قالالىق جاعاجاي, اشىق باسسەين ايماعى, سپورتپەن شۇعىلدانۋعا ارنالعان شاڭعى-روللەرلىك تراسسا بار. مۇندا جاز بويى كۇن سايىن «ساياباقتىڭ 7 عاجايىبى» ويىن-ساۋىق شاراسى مەن ءار اپتانىڭ جەكسەنبى كۇندەرى «Fitness Park Astana» جاتتىعۋلارى ۇيىمداستىرىلدى. بايقاۋدىڭ قازىلار القاسى وسىعان ەرەكشە نازار اۋداردى.
– ەلباسى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا مادەنيەت پەن جاڭعىرۋ ارقىلى ۇلتتىق سانانى كەڭەيتۋگە ەرەكشە نازار اۋداردى. وسى ساياساتتى ۇستانا وتىرىپ جانە جاڭا مىندەتتەردى العا قويىپ, ءبىز ساياباقتاردى دامىتۋعا جانە استانا تۇرعىندارى مەن قوناقتارى ءۇشىن جالپىعا قولجەتىمدى دەمالىستى ۇيىمداستىرۋعا باسا كوڭىل بولەمىز. ال سوچيدەگى جەڭىسىمىز – ەلورداداعى مادەني-بۇقارالىق دەمالىس ورىندارىن دامىتۋ جولىنداعى كوپ جىلدىق قاجىرلى ەڭبەكتىڭ ناتيجەسى. ەلىمىزدەگى ساياباقتارعا قاتىستى العاشقى وسىنداي ەلەۋلى ماراپاتتى استانانىڭ 20 جىلدىعىنا ارنايمىز» دەيدى استانا قالاسىنىڭ مادەنيەت, مۇراعاتتار جانە قۇجاتتاما باسقارماسىنىڭ باسشىسى
بولات ماجاعۇلوۆ.
