وتان قورعاۋشىلار كۇنى قارساڭىندا قالالىق اكىمدىكتىڭ الدىنداعى ورتالىق الاڭدا قر قورعانىس مينيسترلىگىنىڭ اسكەري بولىمدەرى قاتارىنا وتان الدىنداعى بورىشىن وتەۋگە شاقىرىلۋشىلاردى شىعارىپ سالۋ سالتاناتى بولدى.
بيىل كوكتەمدە قارۋلى كۇشتەرگە, شەكارا قىزمەتىنە, مەملەكەتتىك كۇزەت قىزمەتىنە جانە ۇلتتىق ۇلانعا ەلوردادان 1991-2000 جىلعى 800-دەن اسا ازاماتتى اتتاندىرۋ جوسپارلانسا, ناۋرىز ايىنان بەرى اتتانعاندار سانى 360-تى قۇراعان. ەندى وسى ماۋسىمنىڭ كەزەكتى مەرزىمدى جوسپارىنا سايكەس 440 جاس ازامات دايىندىق ۇستىندە. ال بۇل جولى اتتانعاندار سانى – 40.
سالتاناتتى شاراعا استانا قالاسى اكىمىنىڭ ورىنباسارى ەرمەك امانشاەۆ, قارۋلى كۇشتەر باس شتابىنىڭ باستىعى مۇرات مايكەەۆ, ۇوس جانە اۋعان سوعىسىنىڭ ارداگەرلەرى مەن مەملەكەتتىك ورگانداردىڭ وكىلدەرى قاتىستى. سونىمەن قاتار, اسكەرگە اتتانىپ بارا جاتقان جاستاردىڭ اتا-انالارى مەن تۋىستارى, دوستارى شاقىرىلدى.
– سىزدەر وتانىمىزدىڭ جۇرەگى – استانا قالاسىنان ۇلكەن جاۋاپتى جولعا اتتانىپ بارا جاتىرسىزدار. سىزدەردى الدا وتان قورعاۋ دەگەن قاسيەتتى بورىش كۇتىپ تۇر. الدارىڭىزعا قويىلعان مىندەتتى ابىرويمەن اتقارادى دەگەن سەنىمدەمىز. اكىمدىكتىڭ اتىنان بارشاڭىزدى وتان قورعاۋشىلار كۇنىمەن قۇتتىقتايمىن, – دەدى ەرمەك امانشاەۆ.
شارا بارىسىندا استانا قالاسى قورعانىس ىستەرى جونىندەگى دەپارتامەنت باستىعىنىڭ ورىنباسارى, پولكوۆنيك عاني ارتىقوۆ تىلشىلەرگە سۇحبات بەردى.
– بۇل كۇندەرى شالعايداعى شەت اۋدانداردان باستاپ كاسپي تەڭىزىندەگى كەمەلەرگە دەيىن, جالپى, ەلىمىزدەگى بارلىق ايماقتاردىڭ اسكەري بولىمدەرى جاڭا قۇراممەن
تولىعۋدا. بۇگىن اسكەرگە اتتانىپ بارا جاتقان بۇل جاستار ەرتەڭگى كۇنى ۇيلەرىنە اسكەري ءومىردىڭ قىر-سىرىن مەڭگەرىپ, وتانىمىزدىڭ وجەت تە باتىل ۇلاندارى بولىپ ورالادى دەپ ويلايمىز. ولار وتان الدىنداعى قاسيەتتى بورىشتارىن وتەي وتىرىپ, ەلىمىزدىڭ تىنىشتىعىن, حالقىمىزدىڭ بەيبىت ءومىرىن ءمىنسىز قورعايدى دەپ سەنەمىز, – دەيدى پولكوۆنيك ع.ارتىقوۆ.
اسكەرگە اتتانىپ بارا جاتقانداردىڭ ءبىرى ماعجان مۇراتبەكۇلى «بۇگىن ءبىز وتانىمىزدىڭ الدىنداعى ازاماتتىق بورىشىمىزدى وتەۋگە جانە ونى قورعاۋ ءۇشىن اسكەر قاتارىنا اتتانىپ بارامىز. ءبىر جىل بويى اسكەر ءومىرىنىڭ قىزىعى مەن قيىندىعىنا شىڭدالىپ, ناعىز ەر-ازامات اتانىپ, ەلىمىزدىڭ ابىرويىن اسقاقتاتۋعا بارىمىزدى سالامىز» دەدى.
اتالمىش شاراعا جينالعان ءۇش مىڭنان اسا كورەرمەن الدىندا جاسوسپىرىمدەرگە ارنالعان كلۋبتار مەن ۇيىرمەلەردىڭ تاربيەلەنۋشىلەرى, استانالىق مەكتەپتەردىڭ وقۋشىلارى پاتريوتتىق اندەر شىرقاپ, ءوز ونەرلەرىن كورسەتتى. سونىمەن قاتار, جينالعاندار كادەتتەردىڭ ءۆالسىن, ساربازداردىڭ جەكپە-جەك ويىندارى مەن جارىلعىش زاتتاردى يىسكەپ تاباتىن
يتتەردىڭ تەاترلاندىرىلعان قويىلىمىن تاماشالادى. شارا سوڭىندا اعا بۋىن وكىلدەرى جاس ساربازدارعا اق باتالارىن بەرىپ, ولاردى سالتاناتتى تۇردە شىعارىپ سالدى.
نۇرداۋلەت كاكىشتەگى
