ەلوردادا مەملەكەت باسشىسىنىڭ تاپسىرماسى بويىنشا استانا قالاسىن ودان ءارى دامىتۋدىڭ جوسپارى تالقىلاندى. پرەمەر-مينيستر ءاليحان سمايىلوۆتىڭ توراعالىعىمەن وتكەن كەڭەستە ەلوردا اكىمى ەسەپ بەردى.
ەلوردا اكىمى جەڭىس قاسىمبەك جاڭا باعدارلامالىق قۇجاتتاردى, ونىڭ ىشىندە استانانى دامىتۋدىڭ 2035 جىلعا دەيىنگى باس جوسپارىن, 2030 جىلعا دەيىنگى قايتا جاڭارتۋ باعدارلاماسىن جانە كوگالداندىرۋدىڭ بىرىڭعاي تۇجىرىمداماسىن ازىرلەۋ جۇمىستارى تۋرالى باياندادى.
سونىمەن قاتار قالا باسشىسى 3-جەو-نىڭ ءبىرىنشى كەزەگىنىڭ جانە جالپى قۋاتى 1 130 گكال بولاتىن ەكى گاز جىلۋ ستانتسياسىنىڭ قۇرىلىسى تۋرالى ايتىپ بەردى. بۇل تۇرعىن ءۇي قۇرىلىسىنىڭ قازىرگى قارقىنى ساقتالسا, 2026 جىلعا دەيىن جىلۋ ەنەرگياسى قورىن جيناۋعا مۇمكىندىك بەرەدى.
– سۋمەن جابدىقتاۋ بويىنشا ۇزىندىعى 44 شاقىرىم سۋ قۇبىرىنىڭ ەكىنشى جەلىسىن سالۋ جۇمىستارى ءجۇرىپ جاتىر. سونداي-اق نۇرا جەراستى سۋلارىنان جۇرەتىن ارنايى قۇرىلىستار كەشەنىن, تەلمان سورعى ستانتسياسىن كەڭەيتۋدى, ق.ساتپاەۆ كانالىنان جۇرەتىن جاڭا سۋ قۇبىرىنىڭ جوبالارىن جانە ءتورتىنشى سورعى-سۇزگى ستانتسياسىن پىسىقتاۋ جۇمىستارى ءجۇرىپ جاتىر. جوسپارلاردىڭ ورىندالۋى 2035 جىلعا دەيىن قاجەتتى قوردى قامتاماسىز ەتەدى. بۇگىنگى تاڭدا قالادا سۋ تاپشىلىعى جوق.
كولىك ينفراقۇرىلىمىن دامىتۋعا كەلەتىن بولساق, بيىل اۆتوجولداردى سالۋ جانە جوندەۋ, سونداي-اق تاۋەلسىزدىك كوپىرىن اياقتاۋ بويىنشا 30 جوبا ىسكە اسىرىلۋدا. الداعى ۋاقىتتا تاۋەلسىزدىك داڭعىلىن قابانباي باتىر داڭعىلىنا دەيىن جالعاستىرۋ جۇمىستارىن باستاۋ جوسپارلانىپ وتىر, بۇل سول جاعالاۋداعى نەگىزگى ارتەريالاردىڭ جۇكتەمەسىن ازايتۋعا مۇمكىندىك بەرەدى. وعان قوسا گازماشاپپاراتۋرا اۋدانىندا (كەنەسارى كوشەسىنىڭ باستاپقى جاعى) ەكى كوپىر سالۋ پىسىقتالۋدا, ولار تۇران داڭعىلى مەن ايتماتوۆ كوشەسىندەگى جۇكتەمەنى ازايتۋعا مۇمكىندىك بەرەدى, – دەدى قالا اكىمى.
سونىمەن قاتار ەلوردا اكىمى ۇلەسكەرلەردىڭ ماسەلەلەرىن شەشۋ, ءىرى كارىز-تازارتۋ قۇرىلىسىن جوبالاۋ, LRT جوباسىن جۇزەگە اسىرۋ جانە باسقا دا بىرقاتار ماسەلەنى پىسىقتاۋ تۋرالى ايتىپ بەردى.
مەملەكەت باسشىسى بەرگەن تاپسىرمالاردىڭ ورىندالۋ بارىسى تۋرالى ءوز سالالارى بويىنشا پرەمەر-ءمينيستردىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا, يندۋستريا جانە ينفراقۇرىلىمدىق دامۋ ءمينيسترى مارات قاراباەۆ, ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆا, ەنەرگەتيكا ءمينيسترى الماسادام ساتقاليەۆ, اۋىل شارۋاشىلىعى ءمينيسترى ەربول قاراشوكەەۆ, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, عىلىم جانە جوعارى ءبىلىم ءمينيسترى ساياسات نۇربەك بايانداما جاسادى.
پرەمەر-مينيستر ەلوردانى دامىتۋ ماسەلەلەرىن شەشۋ ۇكىمەت جۇمىسىنىڭ ماڭىزدى باعىتتارىنىڭ ءبىرى ەكەنىن اتاپ ءوتتى.
«مەملەكەت باسشىسى اتاپ كورسەتكەن بارلىق ماسەلە بويىنشا قاجەتتى شارالاردى ىسكە اسىرۋدى جالعاستىرۋ كەرەك. اتاپ ايتقاندا, ەلوردا اكىمدىگى بولىنگەن قارجىلاندىرۋدى پايدالانا وتىرىپ, بارلىق ينفراقۇرىلىمدىق جوبادا, ونىڭ ىشىندە ۇلەسكەرلەرى بار پروبلەمالىق قۇرىلىس نىساندارىندا قۇرىلىس-مونتاجداۋ جۇمىستارىنىڭ ۋاقىتىلى اياقتالۋىن قامتاماسىز ەتۋى ءتيىس» دەدى ءاليحان سمايىلوۆ.
سونىمەن قاتار پرەمەر-مينيستر رەسپۋبليكالىق بيۋدجەتتى قالىپتاستىرۋ جانە ناقتىلاۋ كەزىندە استانانىڭ باسىم جوبالارىن قارجىلاندىرۋدى قاراستىرۋدى, سونداي-اق جىل سوڭىنا دەيىن ەلوردا اگلومەراتسياسىن دامىتۋدىڭ كەشەندى جوسپارىن ازىرلەپ, ونى ۇكىمەتكە ەنگىزۋدى تاپسىردى.
