وتكەن جىلدىڭ 4 شىلدەسى كۇنى استانا قالاسىنىڭ 1 ميلليونىنشى تۇرعىنى دۇنيەگە كەلگەن بولاتىن. ولجاس پەن ارايلىم مۇحامەدياروۆتار وتباسىنىڭ قۋانىشى كۇنى كەشە 1 جاسقا تولدى. وتباسىنا عانا ەمەس, سونىمەن قاتار ءيسى قازاققا قۋانىش سىيلاعان سايدا بۇگىندە ءتاي-ءتاي باسىپ ءوسىپ كەلەدى.
ولجاس ءوزىنىڭ اتا-اناسى قوستاناي وبلىسىنان استانا قالاسىنا بالا كۇنىندە قونىس اۋدارعانىن ايتادى. سول سياقتى ايدانىڭ اتا-اناسى دا ەرتە باستان ەلوردادا ءوسىپ-ءونۋ ءۇشىن كەرەكۋدەن كەلگەن. ياعني, ولجاس پەن ارايلىم استانا قالاسىنىڭ مەكتەپتەرىندە ءبىلىپ الىپ, وسىندا جوعارى وقۋ ورنىن تامامداعان. جاراسىمدى جۇپ ەلوردادا تانىسىپ, 2015 جىلى شاڭىراق كوتەرەدى.
– سايدا شىلدەنىڭ 3-نەن 4-نە قاراعان ءتۇنى ساعات 01:00-دە دۇنيەگە كەلدى. تاڭەرتەڭ ءبىزدى قالا اكىمنىڭ ورىنباسارى كەلىپ قۇتتىقتادى. مەن ول كەزدە استانا كۇنىنە بايلانىستى قۇتتىقتاپ جاتقان شىعار دەپ ويلادىم. سودان كەيىن قالا اكىمى كەلىپ, «سىزدەر ەلوردانىڭ ميلليونىنشى تۇرعىندارى بولدىڭىزدار» دەپ قۇتتىقتادى. ءبىز قىزىمىزدىڭ استانا قالاسىنىڭ 1 ميلليونىنشى تۇرعىنى بولاتىنىن بىلگەن جوقپىز. ونىڭ ۇستىنە قالا اكىمىنىڭ قولىنان 2 بولمەلى پاتەردىڭ كىلتىن العان كەزدە ءتۇس كورىپ جاتقان سياقتى سەزىندىم. ويتكەنى بۇعان دەيىن ءبىز پاتەر جالداپ تۇرىپ جاتقان بولاتىنبىز, – دەيدى ول.
قاراپايىم جۇمىسشى بولىپ قىزمەت جاسايتىن وتباسى ءۇشىن اكىمنىڭ قولىنان 2 بولمەلى پاتەر الۋ – ايرىقشا وقيعا. ويتكەنى ولجاس ەلوردانى ەلەكترمەن قامتۋشى «استانا-رەك» كاسىپورنىندا ەنەرگەتيك, ال ارايلىم بولسا «نۇرشاشۋ» بالاباقشاسىنىڭ تاربيەشىسى بولىپ جۇمىس ىستەيدى.
– قازاقتىڭ «ءبىر بالا تۋىلسا, ءبىر تال جۋسان ارتىق وسەدى» دەگەن ءسوزى راس ەكەن. ويتكەنى سايدا دۇنيەگە كەلە سالا وتباسىمىزعا ۇلكەن قۋانىش سىيلادى. ايتپەسە, ءدال قازىرگى ۋاقىتتا استانادان ەكى بولمەلى پاتەر الۋ مىڭداعان ادامدار ءۇشىن ارمان بولىپ وتىر ەمەس پە؟ مىنە, وسى ارمانعا ءبىرىنشى اللانىڭ, ەكىنشى كىشكەنتاي قىزىمىزدىڭ ارقاسىندا جەتىپ وتىرمىز. سونداي-اق, باسپانالى بولۋىمىزعا كومەكتەسكەن اتقامىنەر اعالارىمىزعا العىس ايتقىم كەلەدى, – دەيدى ولجاس.
جالپى ەلىمىزدىڭ ءوسىپ وركەندەۋى ءۇشىن ميلليون تۇرعىنى بار بىرنەشە قالا بولعانى ماڭىزدى بولىپ وتىر. بۇل تۋرالى مەملەكەت باسشىسى نۇرسۇلتان نازارباەۆ ۇنەمى ايتىپ ءجۇر. ويتكەنى ميلليون تۇرعىنى بار شاھاردىڭ ەكونوميكالىق-الەۋمەتتىك ءوسىپ وركەندەۋى ارتا تۇسەدى. قازىرگى تاڭدا الماتىدان كەيىن استانا قالاسى وسى مۇمكىندىككە يە بولىپ وتىر. سونداي-اق, بۇل قاتارعا جاقىندا شىمكەنت قالاسى قوسىلاتىنىن ەلباسىنىڭ ءوزى ايتقان بولاتىن. توقسان اۋىز ءسوزدىڭ توبىقتاي ءتۇيىنى قازاقتىڭ كوبەيىپ جاتقانى كوڭىلدى كوككە كوتەرەدى.
سەرىك جولداسباي
