بالالار جىلى اياسىندا جانە ەلوردا كۇنى مەرەكەسى قارساڭىندا نۇر-سۇلتان قالاسىنداعى №1 بالالار ونەر مەكتەبىنىڭ جانىنان «اسىل مۇرا» قوسىمشا ءبىلىم بەرۋ ورتالىعى اشىلدى.
قوسىمشا ءبىلىم بەرۋ باعدارلاماسىن ىسكە اسىرۋ جانە مەكتەپ جاسىنداعى بالالاردىڭ مۋزىكالىق, ەستەتيكالىق دامۋىن قالىپتاستىرىپ, شىعارماشىلىق وسۋىنە, قوعام ومىرىنە بەيىمدەلۋىنە, ازاماتتىق سانا-سەزىمىنىڭ, جالپى مادەنيەتىنىڭ, ۋاقىتىن مازمۇندى ۇيىمداستىرۋىنا جاعداي جاساۋ ماقساتىندا اشىلعان ونەر مەكەمەسى ەلورداداعى ق.مۇحامەدحانوۆ كوشەسىنىڭ 16/2 مەكەنجايىندا ورنالاسقان.
ونەر ورداسىنىڭ اشىلۋ سالتاناتىنا قالالىق ءبىلىم باسقارماسى باسشىسىنىڭ ورىنباسارى ريمما يمانعازينوۆا, قوعام قايراتكەرلەرى مەن قالا پەداگوگتارى قاتىسىپ, ىزگى تىلەگىن جەتكىزدى.
«اسىل مۇرا» ونەر مەكتەبىنىڭ ديرەكتورى فارحات قابدەنۇلىنىڭ ايتۋىنشا, ونەر ورتالىعى بەس باعىت بويىنشا جۇمىس ىستەيدى. بالالار قازاقتىڭ ۇلتتىق اسپاپتارى: دومبىرا, پريما, قوبىز, قىلقوبىز, جەتىگەن, ساكسافون, ءداستۇرلى ءان, سكريپكا, ۆوكال, كوركەمونەر, قولدانبالى قولونەر, تەاتر سىنىبى بويىنشا وقۋعا قابىلدانادى. ولارعا بارلىعى 12 مۇعالىم ءدارىس بەرەدى. وقۋشىلار 3 تامىزدان باستاپ قۇجات تاپسىرا الادى. جالپى بالالار ونەر مەكتەبىنە 200-گە جۋىق وقۋشىنى قامتۋ جوسپارلانىپ وتىر.
