بۇگىن ەلوردادا «اتامەكەن» قازاقستان كارتاسى» ەتنو-مەموريالدى كەشەنى كەزەكتى ماۋسىمىن باستايدى. جيىرما جىلدان استام تاريحى بار مادەني وشاق ونداعى ماكەتتەر ارقىلى استانا, الماتى, شىمكەنت سەكىلدى رەسپۋبليكالىق ماڭىزى بار قالالار مەن ەل ايماقتارىن الاقانعا قوندىرعانداي ەتىپ كورسەتەدى.
اتالمىش كەشەن – ەلورداعا عانا ەمەس, ەلىمىزگە تۋريستەردى تارتاتىن تەتىكتەردىڭ ءبىرى. مۇندا رەسپۋبليكالىق قالالار مەن وبلىس ورتالىقتارىنداعى كورنەكتى عيماراتتارمەن, وڭىرلەردىڭ تابيعاتىمەن, جەر بەدەرىمەن دە تانىسۋعا بولادى. ماسەلەن, قىسى-جازى اسقاق شىڭدارىنان قار كەتپەيتىن الاتاۋدى, قويناۋى تىلسىم سىرعا تولى قاراتاۋدى, ۇلت ۇياسى – ۇلىتاۋدى, كيەلى وتپان تاۋدى كورۋگە بولادى. مايلى قيان جەرىندەگى بەكەت اتا, شوپان اتا, ۇلىتاۋداعى الاشا حان, جوشى حان, جۇبان انا كەسەنەلەرى, كاسپي تەڭىزىنىڭ شاعىن كوشىرمەسى ەرەكشە اسەر سىيلايدى. استاناعا ارنالعان الاڭدا ەكسپو قالاشىق تا ورىن الدى. ونى «نۇر الەم» پاۆيلونى ايشىقتاپ تۇر.
كەشەننىڭ وسىنداي تانىمدىق سيپاتىمەن قاتار تاربيەلىك ءمانى دە زور. وسىندا جازعى دەمالىستاردا مەكتەپ وقۋشىلارى ەكسكۋرسيا جۇرگىزۋشى بولىپ جۇمىس ىستەپ, سايكەس ەڭبەكاقى الادى. ولاردىڭ وزدەرى ارنايى ەمتيحان ارقىلى جۇمىسقا قابىلدانادى. مىسالى, ءار ەكسكۋرسيا جۇرگىزۋشىسى كەمىندە ءۇش ءتىل ءبىلۋى كەرەك. سولاردىڭ ءبىرى تۇرىك, فرانتسۋز, نەمىس, يسپان, قىتاي, كورەي ءتىلى بولسا دا قۇپتالادى. ارينە, قازاقستان تاريحى مەن گەوگرافياسىن دا ءبىلۋ قاجەت.
