اتاقتى برەند استاناعا كەلدى
«استانا اكىمى ادىلبەك جاقسىبەكوۆ قازاقستانداعى العاشقى تەز تاماقتانۋعا ارنالعان «ماكدونالدس» مەيرامحاناسىنىڭ اشىلۋىنا قاتىستى. بۇل وقيعادان كەيىن بەلگىلى كورپوراتسيا الەمدىك نارىقتا 120-شى ورىنعا شىقتى» دەپ حابارلادى اكىمدىكتىڭ ءباسپاسوز قىزمەتى.
ەلوردا باسشىسى ءبىرىنشى كەزەكتە نازىك جاندىلاردى حالىقارالىق ايەلدەر مەرەكەسىمەن قۇتتىقتادى. ادىلبەك جاقسىبەكوۆ كاسىپورىننىڭ اشىلۋى قالاعا ءتيىمدى ينۆەستيتسيالار تارتىپ, جاڭا جۇمىس ورىندارىن قۇرعانىن اتاپ ءوتتى. استانادا تاعى ءبىر الەمگە ءايگىلى برەندتىڭ قونىستانۋى – وڭىردەگى ءىسكەرلىك كليماتتىڭ قولايلى ەكەندىگىنىڭ كورسەتكىشى, بۇل حالىقارالىق ينۆەستورلار ءۇشىن جاقسى بەلگى بولماق.
سالتاناتتى شاراعا «ماكدونالدس» كورپوراتسياسىنىڭ پرەزيدەنتى جانە اتقارۋشى ديرەكتورى ستيۆ يستەربرۋك تا قاتىستى. «ءبىز جەرگىلىكتى ءمادەنيەتتىڭ ءبىر بولشەگىنە اينالۋ جانە مەيرامحانا بيزنەسىن جۇرگىزۋدىڭ وزىق تاجىريبەسىن قازاقستانعا ۇيرەتۋ ءۇشىن قولىمىزدان كەلگەننىڭ ءبارىن جاسايمىز. بۇل ءبىزدىڭ برەندتىڭ حالىقارالىق دامۋىنداعى ماڭىزدى قادام بولادى» دەدى ستيۆ يستەربرۋك.
«ماكدونالدس» قازاقستاندىق فرانشيزاسىنىڭ يەسى قايرات بورانباەۆتىڭ ايتۋىنشا, مەيرامحانالار جەلىسى قالالىق بيۋدجەتكە تۇراقتى سالىق اۋدارىمدارىن جاسايدى. الداعى بەس جىلدا ەلىمىزدە اتالعان برەندتىڭ 15-كە جۋىق ساۋدا ورنى اشىلادى.
مەيرامحانانىڭ جالپى اۋدانى – 863 شارشى مەتر. ورىندار سانى – 206. كاسىپورىندا 200-دەن استام جۇمىس ورنى قۇرىلدى. بۇل جەرگە ونىمدەردى ماقۇلدانعان جەتكىزۋشىلەر عانا تاسيدى. بولاشاقتا ونى جەرگىلىكتى ازىق-تۇلىكتەن جاساۋ جوسپارلانعان.
ماتەريالدى «استانا اقشامى» گازەتىنىڭ astana-akshamy.kz رەسمي سايتىنا سىلتەمە جاساعاندا عانا پايدالانۋعا رۇقسات ەتىلەدى.