سايلاۋ كۇنى ەلوردالىقتاردىڭ ەرەكشە بەلسەندىلىك تانىتقانىنا كۋا بولدىق. ءتۇس الەتىندە كونگرەسس-حولل سارايىندا ورنالاسقان №100 سايلاۋ ۋچاسكەسىنە باس سۇققانبىز. كەلىم-كەتىم كىسىلەردىڭ جۇزىنەن وسىناۋ ساياسي شارانى ۇلكەن جاۋاپكەرشىلىكپەن قابىلداعانى اڭعارىلادى.
عيمارات ىشىندە قوسۋلى تۇرعان جىگەرلى كۇي بۇگىنگى ۋاقيعانىڭ ءسان-سالتاناتىن ارتتىرىپ, مەرەكەلىك اتموسفەرا سىيلاۋدا. بۇل ۋچاسكەدە 2415 ادام تىركەلىپتى. ونىڭ 304-ءى باقىلاۋشىلاردىڭ قاتىسۋىمەن ءوز ۇيلەرىندە داۋىس بەرەدى. سوعىس جانە ەڭبەك ارداگەرلەرى, مۇمكىندىگى شەكتەۋلى جاندار, دەنساۋلىعىنا بايلانىستى سايلاۋ ۋچاسكەسىنە كەلە المايتىندار وسىلايشا تاڭداۋلارىن جاسايدى. سايلاۋ كوميسسياسىنىڭ توراعاسى تەمىرجان بالابەكوۆتىڭ ايتۋىنشا, استانالىقتاردىڭ تاڭەرتەڭنەن بەرگى قارقىنى تىم جوعارى.
– سايلاۋ ۋچاسكەسىن ءتارتىپ بويىنشا تاڭعى ساعات 7-دە اشتىق. ەڭ ءبىرىنشى بولىپ 77 جاستاعى تۇرعىن ۆالەنتينا ياچنيكوۆا داۋىس بەردى. اجەيدىڭ بۇل ارەكەتىنە قاتتى سۇيسىندىك. ەگدە جاسىنا قاراماستان, ازاماتتىق بورىشىن اتقارۋعا ىنتالى. وسىنداي ۇلكەندەرىمىز كەيىنگى جاستارعا ۇلگى بولسا عوي, – دەيدى توراعا.
جاستاردىڭ دا ارىنى جامان ەمەس. اسىرەسە, 18-گە جاڭا تولعان ۇل-قىزدار ساليقالى كەزەڭگە اياق باسقاندارىن سەزىنىپ, سايلاۋعا تاس-ءتۇيىن دايىندىقپەن كەلىپتى. سولاردىڭ ءبىرىن اڭگىمەگە تارتقانبىز. ءوزىن ەلامان ابۋجاقىل دەپ تانىستىرعان بويشاڭداۋ بوزبالا قازاق گۋمانيتارلىق زاڭ ۋنيۆەرسيتەتىندە وقيدى ەكەن.
– تۋعان كۇنىم ءدال وسىنداي ايتۋلى كۇنمەن تۇسپا-تۇس تۇسكەنىنە ريزامىن. مەنىڭشە, ءاربىر پاتريوت سايلاۋعا مىندەتتى تۇردە قاتىسۋى ءتيىس. جارقىن بولاشاقتى ارماندايتىندار ءوز تاڭداۋلارىن بۇگىن جاسايدى, – دەپ جىگىتىمىز جىميدى.
كەشكى 8-گە دەيىن ەل اياعى باسىلعان جوق. شاھار تۇرعىندارىنىڭ وسىنشالىقتى ىقىلاسىنا ءبىز دە قۋاندىق.
بوتاگوز ماراتقىزى
astana-akshamy.kz
