13 قاراشادا «استانا وپەرا» مەملەكەتتىك وپەرا جانە بالەت تەاترىنىڭ ساحناسىندا «جىبەك جولى» ءىىى حالىقارالىق فەستيۆالى اياسىندا «اتتيلا» ليريكالىق دراماسى قويىلادى.
زاحارياس ۆەرنەردىڭ «عۇن پاتشاسى – اتتيلا» تراگەدياسى نەگىزىندە ساحنالانعان وپەرانىڭ ليبرەتتوسىن تەميستوكلە سولەرا مەن فرانچەسكو پياۆە جازدى.
پرولوگى بار ءۇش ءبولىمدى دراماعا تەاتردىڭ وپەرا سوليستەرى, حورى جانە وركەسترى قاتىسادى. وركەستر ديريجەرى – قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ. باس حورمەيستەر – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ, رەجيسسەر – ناتاليا كاگادي.
وپەرا V عاسىردا كوشپەندى عۇن تايپالارىنىڭ ريم يمپەرياسىن جاۋلاپ الۋ تاريحىنان سىر شەرتەدى. ەۋروپانىڭ كوپتەگەن ەلدەرىن باعىندىرعان اتتيلا ەسىمى ريم يمپەرياسىنىڭ حالقىن قورقىنىش پەن ۇرەيگە باتىردى. الايدا قولباسشى ومىردە قاتال بولىپ كورىنگەنىمەن, ونىڭ جۇرەگىنە دە بارشا ادامزات بالاسىنا ءتان ماحاببات سەزىمى ۇيالاعان. ۇلى كومپوزيتور دجۋزەپپە ۆەردي دە كەزىندە تراگەديادان ءۇش ءمارت كەيىپكەردىڭ مىنەزىن كورگەنىن ايتقان. ونىڭ ءبىرى اتتيلانىڭ ءوزى بولسا, قالعاندارى – ودابەللا جانە ەتسيو.
پرەمەراسى العاش 1846 جىلدىڭ 17 ناۋرىزىندا لا فەنيچە (ۆەنەتسيا) تەاترىندا وتكەن وپەرا بۇگىنگى كۇنگە دەيىن الەمنىڭ ەڭ ءىرى دەگەن تەاترلارىنىڭ رەپەرتۋارىنان تۇسپەي كەلەدى. مۋزىكا ماماندارىنىڭ پىكىرىنشە, ونداعى كوپشىلىك كورىنىستەر, فينالدار (حور مەن كۆينتەتتەر), ايشىقتى اريالار, قۋاتتى ىرعاقتار, ەستە قالارلىق اۋەندەر, پسيحولوگيالىق تەرەڭدىك پەن نازىكتىك شىعارمانىڭ سيپاتىن اشادى.
وپەرادا اتتيلا بەينەسىن ارمەنيانىڭ حالىق ءارتىسى بارسەگ تۋمانيان, ودابەللانى جۇپار عابدۋللينا, ەتسيونى قازاقستاننىڭ ەڭبەك سىڭىرگەن قايراتكەرى تالعات مۇساباەۆ, فورەستونى قازاقستاننىڭ ەڭبەك سىڭىرگەن قايراتكەرى جان تاپين, لەونەنى ەسكەندىر ءابجانوۆ, ۋلدينونى رامزات بالاكيشيەۆ سومدايدى. يتاليان تىلىندە ورىندالاتىن وپەرا قازاق جانە ورىس تىلدەرىندەگى سينحروندى اۋدارمامەن جۇرەدى.
باستالۋى: 18.00-دە.
امانعالي قالجانوۆ
