ەلوردادا ۆولەيبولدان 20 جاسقا دەيىنگى قىزدار اراسىنداعى XXI ازيا چەمپيوناتى مارەسىنە جەتتى.
ازيا چەمپيونى اتاعى ءۇشىن قىتاي, جاپونيا, ءۇندىستان, وڭتۇستىك كورەيا, يران, قىتايدىڭ تايپەيى, تايلاند, وزبەكستان جانە قازاقستان جاستار قۇرامالارى تالاسقا ءتۇستى.
ءبىر اپتا بويى نازارباەۆ ۋنيۆەرسيتەتىنىڭ اتلەتيكالىق ورتالىعىندا وتكەن تارتىستى ويىنداردىڭ ناتيجەسىندە جاپونيا جاستار قۇراماسى ازيا چەمپيونى اتاندى. قىتاي قىزدارى كۇمىسپەن كۇپتەلسە, تايلاند ارۋلارى قولا جۇلدەگە قول سوزدى. وكىنىشكە قاراي, قازاقستان كومانداسى ءتۋرنيردى سەگىزىنشى ورىنمەن قورىتىندىلادى.
چەمپيوناتتىڭ ۇزدىك ويىنشىسى بولىپ جاپونيالىق اننا ۋەمۋرا تانىلدى.
قۇرلىق بىرىنشىلىگىنىڭ جەڭىمپازدارى مەن جۇلدەگەرلەرى, سونىمەن قاتار نوميناتسيالار بويىنشا ۇزدىك اتانعان سپورتشىلار ديپلومدارمەن, مەدالدارمەن جانە سىيلىقتارمەن ماراپاتتالدى.
