مارال مۇساقىزى حامزينا قاراعاندى وبلىسى جاڭارقا اۋدانى اتاسۋ اۋىلىندا سەرىكباەۆتاردىڭ كوپ بالالى وتباسىندا دۇنيەگە كەلگەن. مارالدىڭ اكەسى – سەرىكباەۆ مۇسا ۇلى وتان سوعىسىنىڭ ارداگەرى, فين سوعىسىنا دا قاتىسقان. سوت, پروكۋرور بولىپ قىزمەت ەتكەن. 2002 جىلدىڭ ەكىنشى ساۋىرىندە دۇنيە سالعان. اناسى ءناپيا تەمىربولاتقىزى – 12 بالا تۋىپ-وسىرگەن باتىر انا.
تىڭ ولكەسىندەگى تۇڭعىش بورتسەرىك قىز
مارال جاستايىنان ۇشقىش بولۋدى ارمانداپتى, مەكتەپ قابىرعاسىندا ءجۇرىپ, اۆياتسيا تۋرالى كوپتەگەن كىتاپتاردى, تانىمدىق ماقالالاردى وقيدى, وسىلايشا, اڭساعان ارمانىنا قاراي العاشقى قادامىن نىق باستايدى.
1971 جىلى ازاماتتىق اۆياتسيا اكادەمياسىنىڭ الماتى وقۋ-جاتتىعۋ ورتالىعىندا بورتسەرىكتەر كۋرسىن تامامداعان. ەڭبەك جولىن 1971 جىلى تسەلينوگراد اۋەجايىنىڭ ۇشۋ وتريادىندا بورتسەرىك بولىپ باستايدى, – تسەلينوگراد بىرلەسكەن اۆياوتريادىنىڭ قازاق قىزدارى اراسىنان شىققان تۇڭعىش بورتسەرىگى (ستيۋاردەسسا). وسى جىلدارى مارال مۇساقىزى بورتسەرىكتەر كونكۋرسىنان ءوتىپ, ازاماتتىق اۆياتسيا اكادەمياسىنىڭ جانىنداعى ۇشۋ-جاتتىعۋ وتريادىندا اۆياتسياداعى ءوتىلىن جالعاستىرادى. بورتسەرىك رەتىندە الماتى – ءنوۆوسىبىر, الماتى – مينسك – حاركوۆ, الماتى – سۆەردلوۆسك – ماسكەۋ, الماتى – سوچي جانە دە باسقا تولىپ جاتقان ىشكى دە سىرتقى باعىتتاردا ۇشىپ, قارىمدى قىزمەتىن جالعاستىرادى.
1972 جىلى تسەلينوگراد – سۆەردلوۆسك رەيسىن ورىنداۋ كەزىندە, ان-24 ۇشاعى اسپانعا كوتەرىلگەن ساتتە مارال ۇشاقتىڭ جولاۋشىلار سالونى ەسىگىنىڭ اشىلىپ كەتكەنىن بايقاپ قالادى. دەرەۋ اشىق ەسىككە قاراي باتىل ۇمتىلىپ, ادامدار ومىرىنە ءتونىپ كەلە جاتقان الاپات اپاتتىڭ الدىن الادى. اپاتتىق جاعدايداعى بەلسەندى ارەكەتىمەن ادامداردىڭ ءومىرىن ساقتاپ قالعان وسى ەرلىگى ءۇشىن جانە اۆياتسياداعى كوپ جىلعى ەڭبەگى ەسكەرىلىپ, 2007 جىلى مارال حامزينا «ءاليا مولداعۇلوۆا» اتىنداعى التىن مەدالمەن ماراپاتتالادى. باتىر-قىز ءاليانىڭ تۋعان ءسىڭلىسى ساپۋرامەن جانە جاقىن تۋىسى ايجاحانمەن ەتەنە جاقىن ارالاسىپ تۇرادى ەكەن.
مارال 1973 جىلى حامزين عازيز حامزاۇلىنا تۇرمىسقا شىعىپ, ءۇش ۇل – داۋلەت, ايدار, قاسىمحاندى دۇنيەگە اكەلەدى. سىرتتاي وقىپ, تسەلينوگراد پەداگوگيكا ينستيتۋتىنىڭ ورىس ءتىلى جانە ادەبيەتى فاكۋلتەتىن بىتىرەدى. كەيىننەن, قازاق مەملەكەتتىك دەنە شىنىقتىرۋ ينستيتۋتىن ءتامامدايدى.
1977-81 جىلدارى مارال حامزينا قااب اۋە قاتىناستارىنىڭ الماتىداعى ورتالىق اگەنتتىگىنىڭ ديكتورى قىزمەتىن اتقاردى. ورتالىق اەروۆوكزالدىڭ جاڭا عيماراتىندا ونىڭ سۇڭقارداي ساڭقىلداعان داۋىسى ءجيى ەستىلەتىن.
1989 جىلدان باستاپ تۋ-134, تۋ-154, يل-86 الىپ ۇشاقتارىمەن الىس شەتەلدەرگە ۇشىپ, بۇكىل دۇنيەنى شارلادى. 1993 جىلدان بەرگى ازاماتتىق اۋە باسقارماسىندا نۇسقاۋشى, استانا قالاسىنداعى «ەير قازاقستان» ۇلتتىق اۆياكومپانياسىنىڭ ايماقتىق وكىلى, بورتسەرىكتەر قىزمەتىنىڭ ينسپەكتورى, 2000 جىلدان «تسەلينا» اۆياكومپانياسىنىڭ سەرۆيستىك توبىنا قىزمەت كورسەتۋ ءبولىمىنىڭ باسشىسى قىزمەتتەرىن اتقاردى.
2003 جىلى جالپى ۇشۋ ءوتىلى 28 جىلعا تولعاندا زەينەتكەرلىك دەمالىسقا شىقتى. سوندا دا سۇيىكتى اۆياتسياسىمەن قارىم-قاتىناستى ەشبىر ۇزبەيدى…
ۇزىن-سانى – 28 اۆياتور
مارال حانىم – شاپاعاتتى دا شۇعىلالى انا, ومىردە ءتوزىمدى, باتىل جان. ءۇش ۇلىن ءوسىرىپ-باعىپ, وقىتىپ, وتانىنىڭ ادال ازاماتتارى ەتىپ تاربيەلەدى. ورتانشى ۇلى – ايدار جۇرەك تالماسى ناۋقاسىنان قايتىس بولعاندا دا, اۋىرتپالىقتى قايىسپاي كوتەرە ءبىلدى. دەگەنمەن دە, ۇلىنىڭ قازاسى ەڭىرەگەن انانى قاتتى كۇيزەلتتى. جۇرەك اۋرۋىنا اكەلىپ سوقتىردى. وسى قيىن جاعدايدا وعان كومەككە كەلگەن جان, مەديتسينا عىلىمدارىنىڭ دوكتورى, پروفەسسور اباي بايگەنجين ءساتتى دە كۇردەلى وپەراتسيا جاساپ, مارالدىڭ ءومىرىن اجالدان اراشالاپ قالدى…
ال ەندى سەرىكباەۆتاردىڭ اۆياتورلار اۋلەتىنە تۇتاستاي – كەزەك-كەزەگىمەن كەلەر بولساق, اۋلەت باسىندا, مارالدىڭ اعاسى 1946 جىلى تۋعان, كراسنوكۋتسك ۇشقىشتار ۋچيليششەسىن بىتىرگەن مارات مۇساۇلىنىڭ ەسىمى ەلىمىزدىڭ ازاماتتىق اۆياتسياسىنىڭ تاجىريبەلى, بەدەلدى ۇشقىشتارىنىڭ ءبىرى رەتىندە بەلگىلى. مارات مۇساۇلى – 1-سىنىپتى ۇشقىش. كەڭەس وداعى مەن قازاقستانداعى ۇشقان بارلىق ۇلگىدەگى اۋە كەمەلەرىنىڭ كومانديرى بولعان, اۆياەسكادريليا كومانديرى قىزمەتىن اتقارعان, حالىقارالىق ۇشقىشتار وتريادىنىڭ كومانديرى, قر مەملەكەتتىك اۆياباقىلاۋ مەكەمەسىنىڭ تۇڭعىش توراعاسى, قر باس پروكۋراتۋراسىمەن بىرلەسىپ ەلىمىزدىڭ ازاماتتىق اۆياتسيا سالاسىنىڭ العاشقى نورماتيۆتىك-قۇقىقتىق اكتىلەرىن ازىرلەگەن. جالپى ەڭبەك ءوتىلى – 46 جىل, ۇشقىشتىق ساعاتى – 19000 ساعات.
اۆياتورلار اۋلەتىنىڭ ەكىنشى مۇشەسى – 1959 جىلى تۋعان سەرىكباەۆ داۋلەتباي مۇساۇلى. اقتوبە جوعارى ازاماتتىق اۆياتسيا ۋچيليششەسىنىڭ تۇلەگى. 1-سىنىپتى ۇشقىش. «تrans Asia Airlines» اۆياكومپانياسىنىڭ ۇشۋ قىزمەتى بويىنشا ۆيتسە-پرەزيدەنتى, «ەيرباس-310» اك كومانديرى, قر ككم ازاماتتىق اۆياتسيا كوميتەتىنىڭ ۇشۋ قاۋىپسىزدىگى باسقارماسىنىڭ باسشىسى. قر يدم اا كوميتەتىنىڭ مەملەكەتتىك ينسپەكتورى. ەڭبەك ءوتىلى – 34 جىل, ۇشقىشتىق ساعاتى – 12000 ساعات.
1956 جىلى تۋعان سەرىكباەۆ دۇيسەنعالي مۇساۇلى – 1-سىنىپتى ۇشقىش, اك كومانديرى. جالپى ەڭبەك ءوتىلى – 34 جىل, ۇشقىشتىق ساعاتى – 14000 ساعات.
ءتورتىنشى – 1961 جىلى تۋعان سەرىكباەۆ بولات مۇساۇلى, 1-سىنىپتى ۇشقىش, ياك-40 اك كومانديرى, تۋ-154 اۋە كەمەلەرىنىڭ پيلوتى. «ەير استانا» اق-ىنىڭ بوينگ-767 اك كومانديرى, 5-6 شەت تىلدەرىن مەڭگەرگەن تاجىريبەلى ۇشقىش. ەڭبەك ءوتىلى – 33 جىل, ۇشقىشتىق ساعاتى – 11000 ساعات.
بەسىنشى – تاراز قالاسىنىڭ جاڭا زاماناۋي اەروپورتىنىڭ پرەزيدەنتى داۋلەت عازيزۇلى حامزين, مارال حانىمنىڭ ۇلكەن ۇلى. اەروپورت پەن اەروۆوكزال حالىقارالىق ستاندارتقا ساي سالىنعان. مەملەكەت جانە «سكات» اۆياكومپانياسى بىرلەسىپ جۇمىس جاساعان. قاۋىپتى جاعدايلاردا – الماتى, تاشكەنت, بىشكەك, شىمكەنت باعىتىنداعى ۇشاقتاردىڭ قونۋىنا دا ەسەپتەلىنگەن.
اۆياتورلار اۋلەتىنىڭ التىنشى مۇشەسى – 1984 جىلى تۋعان الماگۇل جۇماتقىزى. «ەير استانا» كومپانياسى – «بوينگ-757» ۇشاعىنىڭ بورتسەرىگى. بۇل اۋلەتتىڭ اۆياتسيا سالاسىندا جۇرگەن وكىلدەرى وتىزعا جۋىق ەكەن. بۇلاردان ۇلگى العان جيەندەرى, كەلىندەرى وسى سالانىڭ ءتۇرلى بولىكتەرىندە ابىرويمەن ەڭبەك ەتىپ كەلەدى. ءتىپتى قۇداسى دا ەلىمىزگە بەلگىلى داڭقتى ۇشقىش.
ال مارال حانىمنىڭ سۇيىكتى, تۇڭعىش نەمەرەسى ءانۋار داۋلەتۇلى حامزين – امەريكانىڭ فلوريدا شتاتىنداعى مايامي قالاسىندا ۇشقىشتار اكادەمياسىندا ءىلىم-ءبىلىمىن جەتىلدىرىپ, تەك قانا ۇشقىشتىق عانا ەمەس, ەكونوميكا, مەنەدجمەنت, ت.ب. ماماندىقتاردىڭ قىرى-سىرىن جەتىك مەڭگەرۋدە. ال كىشكەنتاي نەمەرەلەرى قوبىلاندى مەن قاھارمان اكەلەرىنىڭ فۋراجكەسىن كيىپ, «لوتشىك» بولامىز دەپ ۇيدە دە, اۋلادا تىنىم تاپپاي شاپقىلاپ ءجۇر. ۇشقىشتار – اۆياتورلار اۋلەتى وسىلايشا جالعاسا بەرمەك.
يگىلىك ايمەن,
جازۋشى
