23 جەلتوقسان كۇنى قازاق تەحنولوگيا جانە بيزنەس ۋنيۆەرسيتەتىنىڭ كوللەدجىندە «اۋىل» پارتياسى اتىنان پارلامەنت ءماجىلىسى دەپۋتاتتىعىنا ۇمىتكەر ب.تولەگەن, ا.ساتتاروۆ, سونداي-اق قالالىق ءماسليحات دەپۋتاتتىعىنا ۇمىتكەر ب.سەيسەنوۆ, د.وتەەۆ, ع.بايحانوۆ, ا.ەلۋباەۆا, ف.ەنگيشەۆ جانە «اۋىل» پارتياسىنىڭ نۇر-سۇلتان قالاسىنداعى قوعامدىق شتابىنىڭ جەتەكشىسى ۋ.جۇماعۇلوۆ جۇرتشىلىقپەن كەزدەسۋ وتكىزدى.
كەزدەسۋدى وقۋ ورنىنىڭ ديرەكتورى دىنمۇحامەد وتەەۆ قۇتتىقتاۋ سوزىمەن اشىپ, «اۋىل» پارتياسىنىڭ سايلاۋالدى باعدارلاماسىمەن قىسقاشا تانىستىرىپ ءوتتى. وسى جيىنعا قاراعاندى وبلىسىنىڭ جاڭاارقا اۋدانىنان ايگىلى گيتاراشى, 75 جاستاعى قوراباي ەسەنوۆ اعامىز نيەتتەستىگىن, تىلەكتەستىگىن ءبىلدىرىپ ارنايى كەلىپتى. ءانشى 70-جىلدارى تسەلينوگرادتىڭ اۋىل شارۋاشىلىق ينستيتۋتىندا وقىعان. ول ستۋدەنت كەزىندە شىعارعان, بۇگىندە مۇقىم قازاققا ەتەنە تانىمال بولىپ كەتكەن «جاس قالام», «قوشتاسۋ» اندەرىن شىرقاپ بەردى. بۇل اندەر قازاق راديوسىنىڭ «التىن قورىندا» ساقتالعان.
– قاي قازاقتىڭ دا تامىرى اۋىلدا جاتىر. اۋىلدىڭ پروبلەماسىنا ءبارىمىزدىڭ جانىمىز اۋىرادى. سوندىقتان پارلامەنتتە ەل ىشىندە قوردالانىپ جاتقان جاعدايلاردى جوعارعى بيلىكتىڭ قۇلاعىنا جەتكىزەتىن ءوز ۇيىمىمىز بولۋى كەرەك. وسى ماقساتپەن «اۋىل» پارتياسىنا قولداۋ كورسەتىپ كەلىپ وتىرمىن, – دەدى داڭقتى ءانشى.
ال پارتيا اتىنان ءماجىلىس دەپۋتاتتىعىنان ۇمىتكەر, «ادەمى-اي» ۇلتتىق كادەسىيلار كومپانياسىنىڭ ديرەكتورى باحارگۇل تولەگەنقىزى مەملەكەتىمىزدىڭ دامۋى ءۇشىن ءاربىر ازاماتتىڭ پاتريوت بولۋى, ەلىن-جەرىن ءسۇيۋى, وسى باعىتتا بويىنداعى بارلىق كۇش-جىگەرى مەن ءبىلىم-تاجىريبەسىن سارقا جۇمساۋ كەرەكتىگىن ايتادى.
– اۋىل – قازاق ءۇشىن قاسيەتتى ۇعىم. الدا-جالدا ءماجىلىس دەپۋتاتى بولىپ سايلانىپ جاتساق, اۋىلدىڭ مۇڭ-مۇقتاجدىعىن ايتىپ, كەم-كەتىگىن تولتىرىپ, جوعىن تاۋىپ بەرۋ جولىندا ەڭبەكتەنەمىز, – دەدى ول. – مەنىڭ كاسىپكەرلىك قىزمەتىم ۇلتتىق قۇندىلىقتاردى ناسيحاتتاۋمەن بايلانىستى. كادەسىيلار ارقىلى جالپاق جۇرتشىلىققا, سىرتتان كەلگەن تۋريستەرگە حالقىمىزدىڭ سالت-ءداستۇرىن, مادەنيەتىن, جول-جورالعىلارىن تانىستىرامىز. شەتەلدىكتەردىڭ قازاقستان تۋرالى تۇسىنىك-پايىمىن كەڭەيتۋگە ءوستىپ وزىمىزشە ۇلەسىمىزدى قوسىپ جاتقان جايىمىز بار.
ۇمىتكەر ءسوزىنىڭ سوڭىندا كوپشىلىكتى «اۋىل» پارتياسى ءۇشىن داۋىس بەرۋگە شاقىردى.