كەشە نۇر-سۇلتان قالاسى ءماسليحاتىنىڭ قۇرىلىس, ەكولوگيا, كولىك, ساۋدا جانە تۇرعىن ءۇي-كوممۋنالدىق شارۋاشىلىق ماسەلەلەرى جونىندەگى تۇراقتى كوميسسياسىنىڭ وتىرىسى بولىپ ءوتتى. وندا استانانى سۋمەن جابدىقتاۋ, سۋ بۇرۋ جانە سارقىندى سۋلاردى تازارتۋ جۇيەلەرىنىڭ جۇمىسى جانە ولاردى دامىتۋدى قامتاماسىز ەتۋ سالاسىندا اتقارىلىپ جاتقان ءىس-شارالار قارالدى.
كۇن تارتىبىندەگى ماسەلەلەر بويىنشا نۇر-سۇلتان قالاسىنىڭ وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسىنىڭ باسشىسى ت.قۇلۇشەۆ بايانداما جاسادى.
«قازىرگى كۇنى نۇر-سۇلتان قالاسىن اۋىزسۋمەن جانە شارۋاشىلىق ماقساتتاعى سۋمەن نەگىزىنەن استانا سۋ قويماسى قامتاماسىز ەتىپ وتىر. قويما تەك اعىندى اعىندى سۋلارمەن عانا تولىعادى. ەكىنشى سۋ كوزى – ساتپاەۆ ارناسى, ول سۋدى ەرتىس وزەنىنەن الادى» دەپ مالىمدەدى ول.
بايانداماشى كەلتىرگەن دەرەككە سۇيەنسەك, ەلوردا حالقىنىڭ تاۋلىكتىك سۋعا دەگەن قاجەتتىلىگى 280 مىڭ تەكشە مەتردى قۇرايدى. ال ونىڭ قالاعا تاۋلىكتىك سۋمەن جابدىقتاۋمولشەرى 300 مىڭ ت.م اسپايدى. بۇل جاعدايدىڭ اسا قۇردەلى ەكەنىن كورسەتەدى. مامانداردىڭ نۇر-سۇلتان قالاسىندا 2030 جىلعا قاراي سۋعا دەگەن قاجەتتىلىك تاۋلىگىنە 400 مىڭ تەكشە مەترگە دەيىن ارتۋى مۇمكىن دەپ توپشىلاپ وتىر.
قالانى سۋمەن جابدىقتاۋ جۇيەسىن دامىتۋ جوسپارىنا سايكەس, وسى جەتىسپەي جاتقان سۋ كولەمىن نفس-3(سورعى-سۇزگى ستانتسياسى) جاڭا سۋ ايداۋ بلوگى قامتاماسىز ەتۋى كەرەك بولاتىن. ستانتسيانىڭ تاۋلىكتىك ونىمدىلىگى 100 مىڭ ت.م دەپ ەسەپتەلگەن. ونىڭ جوبالىق-سمەتالىق قۇجاتتاماسى 2011 جىلى جاسالعانىمەن, قۇرىلىس جۇمىستارى ءالى قولعا الىنعان جوق.
سونداي-اق, قولدانىستاعى تازارتۋ قۇرىلعىلارىنىڭ ونىمدىلىك قابىلەتىن ارتتىرۋ ماسەلەسى دە كۇن تارتىبىنەن تۇسپەي تۇر.
«بۇگىندە نۇر-سۇلتان قالاسىن سۋمەن جابدىقتاۋ بويىنشا ەكى جوبا ازىرلەندى. ءبىرىنشىسى, ەلورداعا جاقىن ماڭايداعى سۋاستى كوزدەرىن پايدالانۋ. ول توتەنشە جاعدايلاردا(توعان اعىتىلىپ كەتكەندە, سۋ ساپاسى ىشۋگە جارامسىز بولىپ قالعاندا, ت.س.س- اۆت.). ەكىنشىسى, استانا قويماسىن سۋمەن تولىقتىراتىن قۇرىلىس سالۋ» دەدى باسقارما باسشىسى.
نۇر-سۇلتان قالاسىن سۋمەن جابدىقتاۋ كەزەڭ-كەزەڭگە ءبولىپ جوسپارلانعان. العاشقى كەزەڭدە استانا سۋ قويماسىنىڭ ءتۇبى تەرەڭدەتىلىپ, ارناسى تازارتىلادى. ول سورعى اگرەگاتتاردىڭ كومەگىمەن توعانعا جىلىنا قوسىمشا 62,3 ملن تەكشە مەتر سۋ جيناۋعا مۇمكىندىك بەرەدى. كەلەسى كەزەڭدەردە ەسىل وزەنىنە بوگەن سالىپ, ودان تاۋلىگىنە 170,0 مىڭ ت.ش سۋ جىبەرۋگە قابىلەتتى ەكى ايىرعى سۋتارتقىش ماگيسترالى تارتىلاتىن بولادى. ەگەر اتالعان جوبالار ماقۇلدانىپ, جەتكىلىكتى كولەمدە قارجىلاندىرىلاتىن بولسا, ولاردىڭ قۇرىلىسى 2023 گودا جىلدىڭ 30 جەلتوقسانىندا سالىنىپ ءبىتۋى ءتيىس.
جالپى قالانى سۋمەن جابدىقتاۋ ماسەلەسى جىلدا كوتەرىلىپ كەلەدى. بۇل جولى دا تۇراقتى كوميسسيانىڭ وتىرىسىندا ءماسليحات دەپۋتاتتارى ايتقان سىن-ەسكەرتپەلەرى دە از بولمادى. ماسەلەن, بيىل سانيتارلىق-حيميالىق, ميكرو-بيولوگيالىق كورسەتكىشتەر بويىنشا اۋىزسۋدىڭ ساپاسى بىلتىرعىدان دا ءتىپتى تومەندەپ كەتكەن. ۆيرۋسولوگيالىق كۇيى ناشارلاعان. سۋمەن جابدىقتاۋشى ۇيىم – «استانا سۋ ارناسى» جشس-نىڭ سانيتارلىق-تەحنيكالىق قىزمەتتەرىندەگى كەمشىلىك-كەلەڭسىزدىكتەر كوپ. اتاپ ايتقاندا, رەزەرۆۋارلارداعى اۋىزسۋدى تازارتۋ جانە زالالسىزداندىرۋ شارالارى تيىسىنشە جۇرگىزىلمەيدى. اسىرەسە, جازعى-كۇزگى ماۋسىمداردا اۋىسسۋ ساپاسى سىن كوتەرمەيدى.
سونداي-اق, ءبىرتالاي جەكەمەنشىك ۇيلەر ورتالىقتاندىرىلعان سۋ جۇيەسىنە قوسىلماعان. سونداي-اق سۋ جۇيەسىنە قوسىلماعان اۋماقتاردا كولونكالار تاپشى. دەپۋتاتتار اۋىزسۋعا قاتىستى بۇدان باسقا دا كوپتەگەن وزەكتى ماسەلەلەردى كوتەردى.
