«استانا وپەرا» تەاترىنىڭ پريما-بالەريناسى ايگەرىمنىڭ ەسىمى ەلوردالىقتارعا ەتەنە تانىس بولۋى كەرەك. جەرلەسىمىز جاقىندا عانا بەلارۋس ەلىندەگى برەست اكادەميالىق تەاترىندا وتكەن «دەبيۋتتەر دوستاستىعى» اتتى تمد جاستار سىيلىعىنىڭ لاۋرەاتى اتانعان بولاتىن.
2010 جىلى ا.سەلەزنەۆ اتىنداعى الماتى حورەوگرافيا ۋچيليششەسىن بىتىرگەن ايگەرىم ءوزىنىڭ بالەتكە قالاي كەلگەنىن بىلايشا اڭگىمەلەيدى:
– وقۋىمدى تامامداعان سوڭ مەنى سول كەزدەگى ك.بايسەيىتوۆا اتىنداعى قازاق ۇلتتىق وپەرا جانە بالەت تەاترىنا شاقىردى. نەبارى 18 جاستا بولسام دا, ماعان «ۇيقىداعى ارۋ» قويىلىمىنداعى اۆرورانىڭ ءرولىن سەنىپ تاپسىردى. بۇل – ەڭ كۇردەلى سپەكتاكلدەردىڭ ءبىرى, ويتكەنى ونىڭ تەحنيكالىق ەلەمەنتتەرى وتە كوپ. سونداي-اق وسى بالەتتىڭ قيىندىعى ونىڭ ستيلىندە جاتىر. تازا كلاسسيكا بولعاندىقتان, مۇندا مۇلدەم بۇزۋعا بولمايتىن ەرەجەلەر جەتەرلىك. دەگەنمەن وسىنداي اۋىر رولدەر بالەرينانىڭ شىڭدالىپ شىعۋىنا جاقسى كومەكتەسەدى.
اۆرورادان بولەك, ايگەرىم سومداعان رولدەردىڭ قاتارىندا كاميللا («رودەن»), دجۋلەتتا («رومەو مەن دجۋلەتتا»), ودەتتا-وديلليا («اققۋلى كول»), ەگينا («سپارتاك»), ماري («شاقىلداق»), زارەما («باقشاساراي بۇرقاعى»), گامزاتتي, نيكيا («بايادەركا»), ەسمەرالدا («پاريج اۋليە-اناسىنىڭ سوبورى»), كيتري («دون كيحوت»), مەدورا («كورسار»), سيلفيدا («سيلفيدا»), فلەر دە ليز («ەسمەرالدا»), جيزەل («جيزەل») دە بار.
البەتتە, بۇل رولدەردى ايگەرىم تەك وتاندىق اۋديتوريا الدىندا عانا ەمەس, شەتەلدىك ساحنالاردا دا تالاي رەت پاش ەتتى. «ءارتىس ءۇشىن گاسترول دەگەنىمىز – تاماق سەكىلدى. ياعني ءبىز نەعۇرلىم ءجيى گاسترولگە شىققان سايىن سوعۇرلىم تەزىرەك وسەمىز, قايدا ۇمتىلۋ كەرەكتىگىن ۇعىنامىز. ەۋروپالىق كورەرمەندەر سالقىنقاندى, ولاردى تاڭعالدىرۋ وڭاي ەمەس. ءبىر جاعىنان, بۇل – ءوز ونەرىڭدى كورسەتۋدىڭ دە تاماشا مۇمكىندىگى» دەيدى پريما-بالەرينا.
ونىڭ سوزىنشە, بالەتكە كەلەردە ونىڭ قيىندىقتارىنا ىشتەي دايىن بولۋ قاجەت:
– ءبىز تەاترعا تاڭعى 10-دا كىرگەننەن تۇنگى 10-دا ءبىر-اق شىعامىز. اۋەلى كلاسسيكالىق ساباق باستالادى, ول كەزدە ارتىستەر بۇلشىق ەتتەرىن جاتتىقتىرىپ, دايارلىققا كىرىسەدى. مۇندا ءتىپتى باسىمىزدىڭ ءار بۇرىلعانىنا دەيىن رەپەتيتسيا جاسايمىز. پەداگوگقا دا كوپ نارسە بايلانىستى. ولار ءبىزدىڭ تالانتىمىزدى اشىپ, «ەبەدەيسىز بالاپان» قالپىمىزدان ناعىز بالەريناعا اينالدىرادى. تاڭەرتەڭ ۇيقىدان تۇرۋ دا كەيدە ءبىر مۇڭ: بۇكىل ءتانىڭ اۋىرىپ, بۇلشىق ەتتەرىڭدى سەزبەي قالعانىڭدا, سەنى بالەتكە دەگەن ماحابباتىڭ عانا قايتا «تىرىلتەدى».
ايتپاقشى, بالەت ارتىستەرى تۇراقتى تۇردە دارۋمەن ءىشىپ تۇرادى ەكەن, سەبەبى بالەتپەن اينالىسۋ اعزا ءۇشىن ۇلكەن كۇشتى كەرەك ەتەدى. رەپەتيتسيا كەزىندەگى فيزيكالىق قيىندىقتان بولەك, سپەكتاكل الدىندا ءارتىس تولقيدى, سترەسكە ۇشىرايدى. سوندىقتان دەنساۋلىققا دا كوڭىل ءبولۋ اسا ماڭىزدى.
ال بالەت بيشىلەرىنىڭ دەمالىسىنا كەلسەك, بۇل ولاردىڭ ونشا ۇناتا بەرمەيتىن ءسوزى بولىپ شىقتى. «ماۋسىمنىڭ اياعىندا سوڭعى قويىلىمىڭدى ءبىتىرىپ, دەمالىسقا كەتۋ, ارينە, تاماشا. بىراق قايتا ورالعانىڭدا سەنى ناعىز سۇمدىق كۇتىپ تۇرادى. ويتكەنى ءبىز فورمادان ءاپ-ساتتە شىعىپ كەتەمىز. بۇعان ءتىپتى ءۇش كۇننىڭ ءوزى-اق جەتكىلىكتى» دەيدى ايگەرىم.
