24 قىركۇيەك كۇنى وتەتىن قالالىق ءماسليحاتتىڭ كەزەكتى سەسسياسىندا ەلوردانىڭ كولىك جۇيەسىن جاڭعىرتۋ, قوعامدىق كولىكتىڭ قىزمەت كورسەتۋ ساپاسىن جاقسارتۋ ماسەلەلەرى قارالماق. سەسسيا قارساڭىندا دەپۋتاتتار وسى باعىتتا اتقارىلىپ جاتقان جۇمىستارمەن تانىستى. اۆتوبۋس پاركتەرىن ارالاعاندا بىرقاتار تۇيتكىلدەر انىقتالدى.
سارالانعان تاريف ەنگىزىلگەن سوڭ جەكە اۆتوپاركتەر كەيبىر باعدار بويىنشا جولاۋشىلاردى تاسىمالداۋعا جاراماي قالدى. ونىڭ سەبەبى اۆتوبۋستاردى جالعا الۋ شارتىمەن جۇمىس ىستەگەن جۇرگىزۋشىلەر ءبىر جالاقىعا عانا قاراۋعا كەلىسپەي, لەك-لەگىمەن كەتە باستادى. سونىڭ سالدارىنان ءبىراز اۆتوبۋس تۇرىپ قالدى. مۇنداي جاعداي №2 اۆتوبۋس پاركىندە ورىن الىپ وتىر.
بۇل كاسىپورىندا 109 اۆتوبۋس بار ەكەن. بىرنەشەۋى ءتيىستى باعدارلارعا شىقپاي, قۇر تۇرعان سوڭ, سايكەس باعدارلار مەملەكەت يەلىگىندەگى №1 اۆتوبۋس پاركىنە بەرىلدى.
بۇعان قوسا, جەكە اۆتوپاركتە اۆتوبۋستاردىڭ جوندەلۋىمەن دە تۇيتكىلدەر بار. ارينە, جۇرگىزۋشىلەر جەتىسپەي, تەحنيكا ۋاقىتىندا جوندەلمەگەن سوڭ, قوزعالىس كەستەسىنەن دە كەشىگۋ كەزدەسىپ وتىر. ماسەلەن, №84 جانە 85 مەكتەپ-ليتسەيلەرى وقۋشىلارىنىڭ اتا-انالارىنان №60 اۆتوبۋس كەستەنى ساقتامايتىندىعى تۋرالى شاعىم كەلىپ تۇسكەن. كوپتەگەن بالالار سول سەبەپتەن مەكتەپكە 40 مينۋتقا كەشىگىپ كەلەدى. بۇل جونىندە №84 مەكتەپ-ليتسەي ديرەكتورى, ءماسليحات دەپۋتاتى زاۋرە ءجۇسىپوۆا ايتتى. اۆتوپارك باسشىلىعى وسى باعداردى جاقسارتۋ تۋرالى ەسەپ بەرۋگە, جۇمىستى جولعا قويىپ, قىزمەت كورسەتۋ ساپاسىن كوتەرۋگە ۋادە بەردى.
قالانىڭ كوممۋنالدىق مەنشىگى بولىپ سانالاتىن №1 اۆتوبۋس پاركىنە دە جۇرگىزۋشىلەر جەتىسپەيدى. الايدا بۇل جاعىنان جاعدايى جەكە اۆتوپاركتەرگە قاراعاندا كوش ىلگەرى. كاسىپورىننىڭ باسقارما توراعاسى نۇرمۇحان پولاتوۆتىڭ ايتۋىنشا, جۇرگىزۋشىلەردىڭ ورتاشا جالاقىسى 30-50 پايىزعا ءوسىرىلىپ, قازىر 300 مىڭ تەڭگەدەن باستالادى.
«قالاداعى جولاۋشىلاردىڭ 60 پايىزىن ءبىز تاسىمالدايمىز. قالا ماڭىنداعى باعدارلاردىڭ 100 پايىزى, ەكسپرەسس باعدارلاردىڭ 70 پايىزى بىزگە تيەسىلى. كاسىپورىندا 1673 ادام جۇمىس ىستەيدى. ولاردىڭ 824-ءى – جۇرگىزۋشى. جۇرگىزۋشىلەر 12 ساعاتتان ءۇش اۋىسىم بويىنشا جۇمىس ىستەيدى» دەيدى ول.
بۇگىندەرى بۇل كاسىپورىندا اۆتوبۋستارعا جانارماي قۇيۋ ماسەلەسى باس اۋرۋى بولىپ وتىر. باسشىسىنىڭ سوزىنشە, اۆتوپارك بيىل جانارماي بويىنشا 1 ملرد 20 ملن تەڭگەگە قارىزعا كىرىپ كەتكەن. بۇعان قوسا, ليزينگ بويىنشا 7,9 ملرد تەڭگە قارىز بار. ەكى-ءۇش كۇن بۇرىن سۋبسيديا العان سوڭ 300 ملن تەڭگە جانارماي قارىزىن تولەۋگە كەتكەن. جالپى, اۆتوپارك كۇنىنە 62 مىڭ ليتر جانارماي جاعادى ەكەن. سۋبسيديالار جانارماي شىعىندارىن جابۋعا, جالاقى تولەۋگە, قالا ساتىپ العان جاڭا اۆتوبۋستار ءۇشىن ليزينگ قارىزىن تولەۋگە باعىتتالىپ وتىر. بارلىق قارىزداردان قۇتىلۋ ءۇشىن اۆتوپارككە اي سايىن 506 ملن تەڭگە تولەپ وتىرۋ كەرەك.
بۇعان قوسا, اۆتوبۋستاردىڭ قوسالقى بولشەكتەرىنە بايلانىستى تۇيتكىل تۋىنداپ وتىر. «تەڭگە تۇراقتالماي, سەكىرىپ تۇرعان سوڭ قوسالقى بولشەكتەردى جەتكىزۋشىلەر بىزبەن جۇمىس ىستەۋدەن باس تارتتى. ولار ۇسىنعان باعانى قالتامىز كوتەرمەي وتىر. جاڭا اۆتوبۋستاردىڭ سايماندارى بىزگە ەۋروپادان كەلەتىنىن ايتايىن. قازىر بۇل تۇيتكىلدى شەشۋ جولدارىن ىزدەپ جاتىرمىز» دەيدى ن.پولاتوۆ.
«استانا لرت» جشس باسقارما توراعاسىنىڭ ورىنباسارى بەيبىت ەسجانوۆ قوعامدىق كولىكتەگى «قوياندار» جايىن جەتكىزدى. «بۇگىندەرى 50 پايىزدان 70 پايىزعا دەيىن جولاۋشىلار تولتىراتىن باعدارلار بار. بۇل باعدارلاردان كەڭەسشىلەردى الىپ تاستادىق. جولاۋشىلار الدىڭعى ەسىكتەن كىرىپ, جۇرگىزۋشىنىڭ الدىنداعى قۇرالدان ۆاليداتسيا جاساپ, كەدەرگىسىز الدىعا وتە الادى. الايدا ادامدار تولىپ جۇرەتىن اۆتوبۋستار دا بار. ولاردىڭ تولتىرىلۋى 70 پايىزدان اسادى. مۇندا جۇرگىزۋشى بارشا جولاۋشىلاردى باقىلاۋىندا ۇستاي المايدى» دەپ ءتۇسىندىردى ول.
سونداي-اق, قالالىق ءماسليحات دەپۋتاتتارى تاۋەلسىزدىك داڭعىلى–ش.قالداياقوۆ كوشەلەرى ارالىعىنداعى №27 كوشە جولىنىڭ قۇرىلىسىمەن تانىستى. بۇعان قوسا, وڭتۇستىك-شىعىس تۇرعىن الابىنا, قوبىز, تايقازان كوشەلەرىنە باردى. مۇندا جولداردىڭ قۇرىلىسى اياقتالعان. ءبىرىمجانوۆتار كوشەسىندەگى جول ءالى سالىنىپ جاتىر. سونىڭ ءبارىن كورگەن دەپۋتاتتار كوڭىلدەرىنە بىرقاتار ماسەلەلەردى ءتۇيدى. بۇل ماسەلەلەر ءتۇيىنى الداعى سەسسيادا تارقاتىلماق.
