استاناداعى قوعامدىق كولىكتەرگە ونلاين تولەم جۇيەسىنىڭ ەنگىزىلگەنىنە جارتى جىلدىڭ ءجۇزى بولىپ قالدى. كەشە قالالىق اكىمدىكتە «استاناداعى قوعامدىق كولىكتى دامىتۋ» تاقىرىبىندا جيىن ءوتتى.
بريفينگتە كەلەر جىلعى جولاقى ءتاريفىنىڭ مولشەرى, جۇرگىزۋشىلەردىڭ جاعدايى, بۇرىن كوندۋكتور بولىپ, ال جاڭا جۇيە ەنگىزىلگەننەن كەيىن كەڭەسشى دەگەن لاۋازىمعا يە بولعان قىزمەتكەرلەردىڭ ءرولى, سونداي-اق جولاۋشىلارعا سالىنعان ايىپپۇل كولەمى بەلگىلى بولدى.
جيىندا ءسوز باستاعان «استانا LRT» باسشىسى بەكمىرزا يگەنبەرديەۆ جولاقى قۇنىنىڭ ءوسۋ مۇمكىندىگىنە ناقتى جاۋاپ بەرە المادى. «بۇل جەردە بيۋدجەتىمىزدىڭ كولەمى قانداي جانە ول قانشالىقتى شىعىنىمىزدى جابا الاتىنى تۋرالى ماسەلەدەن بارىپ جولاۋشىلارعا ارنالعان تاريف قالىپتاسادى. دەگەنمەن ءبىرىنشى توقساندا ەشقانداي وزگەرىس بولمايدى دەپ سەنىممەن ايتا الامىن» دەدى ول.
جيىن بارىسىندا جۇرگىزۋشىنىڭ سەرىگى بولىپ, ونلاين تولەم جاسالعانىن قاداعالايتىن كەڭەسشىلەردىڭ ءرولى ايقىندالا تۇسكەنى ايتىلدى. بۇل قىزمەتكەرلەردىڭ كومەگىمەن اۆتوبۋستىڭ الدىڭعى ەسىگىنەن كىرىپ, ورتاڭعى جانە ارتقى ەسىكتەرىنەن شىعۋ ءتارتىبى تۇراقتالىپ, قازىر جۇرتشىلىق اراسىندا بۇرىنعىداي تۇسىنبەۋشىلىك تۋىندامايتىن كورىنەدى. سونداي-اق كەڭەسشىلەر جولاقى تولەۋدەن جالتاراتىن جولاۋشىلاردىڭ ازايۋىنا سەپتىگىن تيگىزەدى ەكەن. بيىل جىل باسىنان بەرى جولاقىسىن تولەمەگەن 7 مىڭ ادامعا 30 ملن تەڭگە اكىمشىلىك ايىپپۇل سالىنىپتى.
ءباسپاسوز كونفەرەنتسياسىندا جۇرگىزۋشىلەردىڭ جاي-كۇيى دە قوزعالدى. قازىر ەلورداداعى اۆتوبۋس جۇرگىزۋشىلەرىنىڭ ورتاشا جالاقىسى 250 مىڭ تەڭگەنى قۇرايدى ەكەن. «ولاردىڭ ءبىرى كەڭەسشىسىز جالعىز جۇمىس ىستەيدى, ولارعا ۇستەمەاقى قاراستىرىلعان. ەندى ءبىرى ۆاليداتسيا مولشەرىن جوسپاردان كوپ ورىنداسا, قوسىمشا بونۋس بەرىلەدى. تاعى ءبىر جۇرگىزۋشى ورنىن اۋىستىرىپ, كوبىرەك جۇمىس ىستەۋى مۇمكىن. ولاردىڭ دا ەڭبەگى نازاردان تىس قالمايدى. سوندا تومەنگى جالاقى 200 مىڭ تەڭگەدەن باستالسا, ەڭ جوعارعىسى 400 مىڭ تەڭگەگە بارادى» دەدى «استانا LRT» كولىكتىك باقىلاۋ دەپارتامەنتىنىڭ باسشىسى سايات شايمەردەنوۆ.
جالاقى مولشەرى قولايلى بولعانمەن كاسىبي ماماندار ءالى دە جەتكىلىكسىز كورىنەدى. ناقتى سانىن ايتساق – 900 جۇرگىزۋشى. بۇعان قوسا, بيىل جول ءتارتىبىن بۇزعان 900 جۇرگىزۋشىگە 12 ملن تەڭگە ايىپپۇل سالىنىپتى. ەگەر اۆتوبۋس جۇرگىزۋشىلەرى قاتاڭ سوگىسكە ىلىگىپ, جۇمىسىنان قۋىلار بولسا, «قارا تىزىمگە» ەنەدى ەكەن. سايات شايمەردەنوۆتىڭ ايتۋىنشا, «قارا تىزىمدەگىلەردىڭ» بۇل جۇمىسقا قايتا ورالۋى ەكىتالاي.
