بۇگىندە ەلىمىزدەگى ءاۆتووندىرىس سالاسى وتاندىق ونەركاسىپتىڭ كوشباسىندا كەلەدى. ون جىلدان اسا ۋاقىت ىشىندە بۇل سالا حيميا ونەركاسىبى, كومىر وندىرىسىمەن يىق تەڭەستىردى. جاقىندا وتاندىق وندىرىسشىلەر «قازاۆتوپروم» قازاقستان اۆتوموبيل سالاسى كاسىپورىندارى وداعىن» قۇرعانىن مالىمدەدى. زاڭدى تۇلعالار بىرلەستىگى ءوز جۇمىسىن 23 قاراشادان رەسمي تۇردە باستادى.
بۇل وداقتى قۇرۋ جونىندەگى باستامانى وسى سالادا جۇمىس جاساپ جاتقان كاسىپورىندار كوتەرگەن بولاتىن. اۆتووندىرىسشىلەردىڭ مۇددەسىن حالىقارالىق ۇيىمداردا تانىستىرا الاتىن وداقتىڭ بولماۋى كوپتەگەن كەدەرگىلەر تۋىنداتقان ەدى. بۇل ماسەلە تۇبەگەيلى شەشىمىن تاپتى. وداقتىڭ قۇرىلتايشىلارى رەتىندە «سەماز», «دەۋ باس قازاقستان», «ازيا اۆتو», «بيپەك اۆتو قازاقستان» سياقتى ىرگەلى كاسىپورىندار تىركەلىپ وتىر. وسىنداي زاڭدى بىرلەستىكتىڭ قۇرىلۋى – سالادا ءتيىمدى نورماتيۆتىك بازانى قالىپتاستىرۋعا, ينۆەستيتسيالىق قولايلى جاعداي جاساۋعا, اۆتوونىدىرىستە تابىستى جۇمىس جاساپ جاتقان ون شاقتى ەلدىڭ كۇشتەرىن شوعىرلاندىرىپ, تىعىز-قارىم-قاتىناستا جۇمىس ىستەۋگە مۇمكىندىك بەرمەك.
«قازاۆتوپروم» قازاقستان اۆتوموبيل سالاسىنداعى كاسىپورىندار وداعى» ەندىگى جەردە «ماشينا جاساۋ» وداعىمەن, قازاقستاننىڭ ۇلتتىق كاسىپكەرلەر پالاتاسىمەن جانە باسقا دا مەملەكەتتىك ۆەدومستۆولارمەن بىرلەسىپ, كوپتەگەن جوبالاردى جۇزەگە اسىرۋدى جوسپارلاپ وتىر.
مەڭدوللا نۇرىمۇلى
