ەلوردادا كەزەكتى رەت «استانا-2017» اۆتورلىق اندەردىڭ حالىقارالىق فەستيۆالى ءوتتى. ءۇش كۇنگە سوزىلعان فەستيۆال اياسىندا ىرىكتەۋ كونكۋرستارى, بەلگىلى باردتاردىڭ جەكە كونتسەرتتەرى, شەبەرلىك ساباقتارى, شىعارماشىلىق كەزدەسۋلەر ۇيىمداستىرىلىپ, شارا گالا-كونتسەرتپەن تۇيىندەلدى.
ءبىرىنشى كۇنى فەستيۆالدىڭ بۇرىنعى لاۋرەاتتارى «فلامينگو» جانە «كامەرتون» توپتارى, دياس بايسەيىتوۆ, پولينا تىرينا جانە وزگە قاتىسۋشىلار ونەر كورسەتتى.
جالپى كونكۋرسقا قازاقستان, رەسەي, اقش, گەرمانيا, يزرايل ەلدەرىنەن 60 ورىنداۋشى قاتىستى. ەكىنشى كەزەڭگە ولاردىڭ 12-ءسى جىبەرىلدى. قورىتىندىسىندا اۆتورلار اراسىندا استانا قالاسىنان قاتىسقان دانا يۋسۋپوۆا مەن بوريس يپاتوۆ, قاراعاندىلىق ۆاديم كيم توپ جاردى. ال يرينا بازارباەۆا (قاراعاندى), كسەنيا نيكيتەەۆا (ومبى) ۇزدىك ورىنداۋشىلار بولىپ تانىلدى.
قۇرمەتتى قوناقتار قاتارىنان ماسكەۋ, تومسك, ومبى, نوۆوسيبيرسك قالالارىنان كەلگەن اۆتورلار تابىلدى. اتاپ ايتساق, پاۆەل فاحرۋتدينوۆ, كىشى يۋري ۆيزبور, جەڭىس ىسقاقوۆ, «چب» دۋەتى, ليديا چەبوكساروۆا مەن ەۆگەني بىكوۆ, رومان لانكين, يۋري ناسىبۋللين, مارينا باگينسكايا سىندى ورىنداۋشىلار اندەرىن اۋەلەتتى.
«استانانىڭ ءتول قۇرداسى بولىپ سانالاتىن اتالمىش فەستيۆالگە بيىل 19 جىل تولادى. بۇل جىلدار ارالىعىندا بىرنەشە بۋىن الماستى, كەيبىر ورىنداۋشىلار اتاقتى گرۋشين فەستيۆالىنىڭ لاۋرەاتتارى اتاندى. ءبىزدىڭ نەگىزگى ماقساتىمىز – گيتارانىڭ سۇيەمەلدەۋىمەن ايتىلاتىن ءان جانرىن حالىق اراسىنا تاراتۋ, كەڭىنەن ناسيحاتتاۋ» دەيدى فەستيۆالدى ۇيىمداستىرۋشى ماقسات سارسەنبەكوۆ.
امانعالي
قالجانوۆ
