«ايالاعان استانا-2017» V رەسپۋبليكالىق تەلەۆيزيالىق بالالار بايقاۋىنىڭ فيناليستەرى انىقتالدى. بايقاۋدىڭ باس پروديۋسەرى لينا اريفۋلينا باستاعان مۋزىكالىق رەداكتورلار توبى جۇزدەن جۇيرىك, مىڭنان تۇلپار دەپ تاپقان بالعىن انشىلەر سايىسقا قاتىساتىن بولدى.
ءبىر جارىم اي ىشىندە ەلىمىزدىڭ ءار ايماعىنان ۇيىمداستىرۋ كوميتەتىنە 300-دەن استام ءوتىنىش كەلىپ تۇسكەنىن ايتا كەتەيىك. قازىلار القاسى جىبەرىلگەن بەينەجازبالاردى سارالاپ, قورىتىندىسىندا 12 ۇمىتكەردى تاڭدادى. ولاردىڭ اراسىنداعى كارينە بولات پەن توميريس ماراتقىزى استانا قالاسىنىڭ نامىسىن قورعايدى.
تالابى تاۋداي وزگە جەتكىنشەكتەردىڭ قاتارىندا الىبەك ازامات (الماتى), بەيبارىس ايتمۇحامبەتوۆ (اقمولا وبلىسى), ءمادي امانباەۆ (جەزقازعان), ارايلىم بەرىك (قىزىلوردا), ايدانا جالەلوۆا (سەمەي), ءامينا جاپار (سولتۇستىك قازاقستان وبلىسى), يليا كوشيكوۆ (قاراعاندى), الان مەرعالي (ورال), ايالان مۇقانوۆ (قوستاناي) جانە لۋيزا نۇرقۋاتوۆا (اقتاۋ) بار.
وسىلاردىڭ ىشىندە سوڭعى اتالعان قاتىسۋشىعا از-كەم توقتالايىق. وسىدان ەكى جىل بۇرىن «سلاۆيان بازارى» فەستيۆالىندە قازاقتىڭ قوس ۇلى مەن قىزى ايدى اسپانعا ءبىر-اق شىعاردى. قازىر الەمدى اۋزىنا قاراتىپ جۇرگەن ديماش قۇدايبەرگەن وندا ەرەسەكتەردىڭ اراسىندا گران-ءپريدى يەلەنسە, لۋيزا نۇرقۋاتوۆا فەستيۆال اياسىنداعى «ۆيتەبسك-2015» بالالار بايقاۋىندا باس ءجۇلدەنى جەڭىپ الدى.
لۋيزا «ايالاعان استانا» بايقاۋىنا دا ءبىرىنشى رەت قاتىسىپ وتىرعان جوق. بۇعان دەيىن وسى سايىستان ەكىنشى ورىندى يەلەندى. ەندى باس جۇلدەگە دە ءۇمىتتى.
كوكتەمگى دەمالىس كۇندەرى كونكۋرسقا قاتىسۋشىلار استاناعا كەلىپ, ءبىر اپتا بويى كونكۋرستىڭ سوڭعى كەزەڭىنە دايىندالادى. ال باس جۇلدەگەر 2 ءساۋىر كۇنى «قازاقستان» ۇلتتىق تەلەارناسىنىڭ تىكەلەي ەفيرى ارقىلى كورسەتىلەتىن شوۋدا انىقتالادى.
«ايالاعان استانا-2017» بايقاۋىنىڭ جەڭىمپازى «دەتسكايا نوۆايا ۆولنا» حالىقارالىق بايقاۋىندا ەلىمىزدىڭ نامىسىن قورعاۋ ءمۇمكىندىگىنە يە بولادى. ءۇمىتكەرلەردىڭ ونەرىن تانىمال وتاندىق جانە شەتەلدىك ءانشىلەردەن قۇرالعان قازىلار القاسى باعالايدى. سونىمەن قاتار, حالىقارالىق مۋزىكالىق بايقاۋلاردىڭ شارتتارىنا سايكەس كورەرمەندەر دە بايقاۋدىڭ جەڭىمپازىن تاڭداۋعا قاتىسا الادى. سمس داۋىس بەرۋدىڭ قورىتىندىسى قازىلار القاسىنىڭ شەشىمدەرىمەن قوسىلىپ سانالادى.
بۇل بايقاۋ بەسىنشى جىل قاتارىنان وتكەلى وتىر. قازاقستاننىڭ تۇكپىر-تۇكپىرىندەگى تالانتتى بالالاردىڭ دارىنىن اشۋعا باعىتتالعان كونكۋرسقا 7 جانە 13 جاس ارالىعىنداعى جەتكىنشەكتەر قاتىسا الادى.
