ەلوردادا «ايالاعان استانا» ۇلتتىق مۋزىكالىق تەلەۆيزيالىق بالالار بايقاۋىنىڭ جەڭىمپازدارىنا ارنالعان ارنايى مۋزىكالىق مەكتەپ اشىلدى.
سوعان وراي, 1 ماۋسىم – حالىقارالىق بالالاردى قورعاۋ كۇنى بايقاۋعا دايىندالۋعا ەلىمىزدىڭ ءار ايماعىنان 16 دارىندى بالا استاناعا كەلدى. ەندى ولار مۋزىكالىق مەكتەپتە ماۋسىم ايى بويى وزدەرىنىڭ ۆوكالدىق قابىلەتتەرىن شىڭدايدى. وعان قوسا, «Zaratushtra Band» وركەسترىنىڭ سۇيەمەلدەۋىمەن قالا كۇنى قارساڭىندا وتەتىن تەلەۆيزيالىق شوۋعا دايىندالادى. قازىر جاس ونەرپازدار اكتەرلىك شەبەرلىك, سولفەدجيو, ۆوكال بويىنشا ءدارىس بەرەتىن ۇستازدارىمەن تانىسىپ, كونتسەرتكە دايىندىقتى باستاپ كەتتى. ءبىرى جەكە ءان ورىنداسا, كەيبىرى توپتا ونەر كورسەتەدى. بايقاۋ «بالالىق شاق ءانۇرانى», «جۇلدىزدارمەن دۋەت جانە الەمدىك حيت», «اتامەكەن» اتتى ءۇش كەزەڭنەن تۇرادى.
