ەلوردانى كۇننىڭ كۇرت سۋىتىپ, سارشۇناق ايازدىڭ بۋعانىنا بىرنەشە كۇن بولدى. بەت قاراتپاس سۋىقتىڭ سالدارىنان مەكتەپ وقۋشىلارىنىڭ, قالا بەردى كوللەدجدىڭ 1-2 كۋرس ستۋدەنتتەرىنە ساباق بولمادى. ءبىز وسى ورايدا قالا كوممۋنالدى قىزمەتى مەن تۇرعىنداردىڭ تابيعاتتىڭ توسىن مىنەزىمەن كۇرەسى جايىنا توقتالۋدى ءجون كورىپ وتىرمىز.
-40-45 گرادۋستاي سەزىلدى
جاقىندا «قازگيدرومەت» رەسەيدىڭ تايمىر جەرىنەن سىبىرگە قاراي جىلجيتىن سۋىق انتيتسيكلوننىڭ اسەرى قازاقستاننىڭ بىرنەشە وبلىسىنا تيەتىنىن حابارلاعان بولاتىن. سونىڭ سالدارىنان اياز كۇشىنە مىنەتىنىن ايتىپ, الدىن الا ەسكەرتۋ جاريالادى. «ەلىمىزدىڭ سولتۇستىك, ورتالىق جانە شىعىس وبلىستارىندا تۇنگى تەمپەراتۋرا -32…37°س دەيىن تومەندەسە, كەي جەرلەردە اياز -40°س دەيىن كۇشەيەدى. ءتىپتى قازاقستاننىڭ وڭتۇستىك-شىعىسىندا دا سۋىتادى, كەي جەرلەردە 25…30° دەيىن اياز كۇتىلەدى» دەلىنگەن حابارلامادا.
ال 25-26 جەلتوقسان كۇندەرى تۇندە تەمپەراتۋرا 33-35 گرادۋسقا, ال اقمولا وبلىسىندا 32-37 گرادۋسقا دەيىن تومەندەدى. سول سياقتى 27 جەلتوقسان كۇنى دە تەمپەراتۋرا -30-دان تومەندەيتىنى ايتىلدى. ارقا تورىندە سارشۇناق ايازبەن جەلدىڭ قاباتتاسىپ كەلەرى ۇيرەنشىكتى جاعداي. وسىنىڭ سالدارىنان بۇل كۇندەرى سىناپ باعاناسى -35-ءتى كورسەتكەنمەن, سىرتتاعى تەمپەراتۋرا -45-50 گرادۋستاي سەزىلدى. سونداي-اق ايماقتىڭ كەي تۇستارىندا تۇندە تۇمان ءتۇستى.
اۆتوبۋستار كىدىرىپ, پويىز كەشىكتى
قاتتى ايازدىڭ اسەرىنەن 24 جەلتوقسان كۇنى ەلوردا ىرگەسىندەگى قاراوتكەل, قوسشى, لەسنايا پوليانا سەكىلدى 27 ەلدى مەكەنگە قاتىنايتىن اۆتوبۋستار مۇلدەم توقتاپ قالعان بولاتىن. بۇعان قوسا, قالالىق توتەنشە جاعدايلار دەپارتامەنتى قاۋىپسىزدىك ماقساتىندا جولداردى جاۋىپ تاستاپ, قاتىناس تولىعىمەن ۇزىلگەن.
«اۆتوبۋس كۇتكەنىمە ءبىر ساعات بولدى, بىراق ءالى كەلمەدى. جۇمىستان شىعىپ, قوسشىداعى ۇيىمە بارۋىم كەرەك. ەندى ۇيىمە قايتۋدىڭ رەتىن تاپپاي وتىرمىن. بۇگىن قالاداعى تۋىسقاندارىما باراتىن سياقتىمىن» دەيدى راۋان ەسىمدى ازامات.
ءبىر قۋانارلىعى, Express اۆتوبۋستار كوپ كۇتتىرمەدى, 25 جەلتوقسان كۇنى «استانا LRT» كومپانياسى: «قۇرمەتتى ەلوردا تۇرعىندارى مەن قالا قوناقتارى! قالا ماڭىنا قاتىنايتىن №302, 303, 304, 306, 307 قوعامدىق كولىك باعدارلارىنىڭ قوزعالىسى قايتا ىسكە قوسىلدى» دەگەن اقپارات تاراتتى.
سول كۇنى «ريددەر-استانا» پويىزى ءتورت ساعاتقا كەشىكتىرىلدى. «جولاۋشىلار تاسىمالى» اق ونىڭ سەبەبىن اۋا رايىنىڭ قولايسىزدىعىمەن بايلانىستىردى. وسى ءتورت ساعات بويى جولاۋشىلاردىڭ جاعدايى ءجىتى نازاردا بولىپ, ۆاگون ءىشىنىڭ تەمپەراتۋراسى بىرقالىپتى بولعان.
جىلىناتىن كولىكتەر
ەلىمىزدە جىلى ايالدامالار العاش رەت استانادا اشىلعان. الايدا بارلىق تۇسى قامتاماسىز ەتىلمەگەن بولاتىن. ءدال وسى كۇندەرى قوعامدىق كولىكتەردىڭ ايالدامالارىندا كەزەكشى اۆتوبۋستار قىزمەت ەتتى. مۇندا ەلوردالىقتار قاجەت مارشرۋتىن كۇتىپ, جىلىنۋى ءۇشىن جاعداي جاسالدى.
«اۋا رايىنىڭ قولايسىزدىعىنا وراي بۇگىن 25 جەلتوقساندا بەلگىلى ءبىر ايالداما پۋنكتەرىنىڭ اۋداندارى كەزەكشى اۆتوبۋستارمەن جابدىقتالادى. بۇل – وزىنە قاجەتتى باعداردى كۇتەتىن جولاۋشىلار توڭىپ قالماس ءۇشىن قولعا الىنعان شارا» دەپ حابارلادى «استانا LRT» كومپانياسى.
سونىمەن قاتار قالادان تەلمان, قوسشى جانە پريگورودنىي ەلدى مەكەندەرىنە بارار جولداردا تجد-ءنىڭ ارنايى تەحنيكاسى كەزەكشىلىك ەتەدى. قۇتقارۋشىلار «ازيا پارك» سوو, «سايانۇر 2» تك جانە بەيسەكوۆا كوشەسى ايالدامالارىنان ءجۇرىپ تۇردى.
جۇمىس ۋاقىتى قىسقاردى
اياز ەرەكشە كۇشەيگەن 24-25 جەلتوقسان كۇندەرى جۇمىس كۇنىن قىسقارتۋ ماسەلەسى دە نازاردان تىس قالمادى. قالالىق توتەنشە جاعدايلار دەپارتامەنتى كاسىپورىندار مەن مەكەمەلەردى جۇمىس كۇنىن قىسقارتۋعا شاقىردى. حابارلامادا بۇل اقپارات قالانىڭ تىرشىلىكپەن قامتاماسىز ەتۋ ۇيىمدارى, ياعني ءورت ءسوندىرۋ قىزمەتى, پوليتسيا, توتەنشە جاعدايلار دەپارتامەنتى, جەدەل جاردەم قىزمەتى, كوممۋنالدىق قىزمەتتەرىنە قاتىستى ەمەس ەكەنى كورسەتىلدى.
جاستار جىلۋىن ۇسىندى
بۇل كۇندەرى ەلوردالىق جاستار يگىلىگى مول ىستەن شەت قالمادى. قالالىق قوعامدىق دامۋ ىستەرى باسقارماسىنىڭ مالىمەتىنشە, «استانا جاستارى» جاستار رەسۋرستىق ورتالىعى «جاقىنىڭا جىلۋلىق سىيلا» اكتسياسىن وتكىزدى. بەلسەندىلەر ادام كوپ جينالاتىن جەرلەرگە بارىپ, نيەت بىلدىرگەندەرگە تەگىن ىستىق شاي تاراتتى.
شىنى كەرەك, مۇنداي ساۋابى مول ءىس وزگەلەردىڭ جومارتتىق سەزىمدەرىن وياتارى انىق. كوشەدە كولىگى بار جۇرت ايازدان توڭىپ تۇرعانداردى تەگىن جەتكىزىپ تە جاتتى. «استانا – مەيىرىمدى قالا» اتتى قايىرىمدىلىق شاراسى «نۇر استانا» مەشىتىنىڭ باستاماسىمەن قولعا الىندى. ەندى اتالعان جوبانىڭ اتى جازىلعان كولىكتەر قىس بويى تۇرعىنداردى بارار جەرىنە تەگىن جەتكىزىپ تۇرادى.
سونىمەن قاتار قالالىق اكىمدىك تاراتقان مالىمەتتە دوڭگەلەگى جارىلىپ جولدا قالعان جۇرتقا پوليتسەيلەردىڭ كومەكتەسكەنى ايتىلدى. ءوز كەزەگىندە تابيعاتتى قورعاۋ قوزعالىسىنىڭ بەلسەندىلەرى جانۋارلار مەن قۇستارعا دا نازار اۋدارۋعا شاقىردى. وسى ماقساتتا 1 جەلتوقسان مەن 15 ناۋرىز ارالىعىندا قۇستارعا جەم سالاتىن ىدىس جاساپ, ۋاقىتىندا ازىقپەن تولتىرىپ تۇرماق. يگىلىكتى ءىس وزگە دە ازاماتتارعا ۇلگى بولسا ەكەن.
استانادا قىلىشىن سۇيرەتكەن قىس التى ايعا سوزىلعانمەن, سارشۇناق ايازدىڭ كۇندە بولا بەرمەسى انىق. «قازگيدرومەت» 27-29 جەلتوقسان كۇندەرى سۋىقتىڭ بەتى قايتادى دەگەن بولجام جاساپ وتىر. «قازىرگى ۋاقىتتا باتىس وبلىستارعا جىلى ءارى ىلعالدى اۋا ماسسالارى كەلە باستادى. ولار شىعىسقا قاراي جىلجي وتىرىپ, قاردىڭ جاۋىنا سەبەپ بولادى, سونداي-اق وڭتۇستىك-باتىستان كۇشتى جەل سوعىپ, اۋا تەمپەراتۋراسى اقىرىن جوعارىلاي باستايدى» دەپ حابارلاندى.
