ادام قۇقىقتارى جونىندەگى ۋاكىلدىڭ وكىلدەرى – زاڭنامادا بەلگىلەنگەن تارتىپپەن تاعايىندالاتىن مەملەكەتتىك قىزمەتشىلەر. بۇل لاۋازىم بۇكىل ەل اۋماعىندا ادام مەن ازاماتتىڭ قۇقىقتارى مەن بوستاندىقتارىن مەملەكەتتىك قورعاۋدىڭ قوسىمشا كەپىلدىكتەرىن قامتاماسىز ەتۋ ماقساتىندا قۇرىلعان. ۋاكىلگە جۇگىنۋ ازاماتتاردىڭ, اسىرەسە اۋىلدىق جەردە تۇراتىنداردىڭ قۇقىقتارىن قورعاۋ ماقساتىندا قولجەتىمدى بولۋى كەرەك.
وكىلدەرگە ادامنىڭ جانە ازاماتتىڭ بۇزىلعان قۇقىقتارى مەن بوستاندىقتارىن قالپىنا كەلتىرۋ, قازاقستاننىڭ نورماتيۆتىك قۇقىقتىق اكتىلەرىن جەتىلدىرۋ, وڭىردەگى ازاماتتاردىڭ قۇقىقتارى مەن بوستاندىقتارىن ىنتالاندىرۋ جانە ىلگەرىلەتۋ ماقساتىندا مەملەكەتتىك ورگاندارعا, قۇقىق قورعاۋ جانە سوت ورگاندارىنا جۇگىنۋ بويىنشا كەڭ وكىلەتتىكتەر بەرىلگەن. سونىمەن قاتار وكىلدەرگە قر ازاماتتارى جانە ونىڭ اۋماعىندا تۇراتىن شەتەلدىكتەر مەن ازاماتتىعى جوق ادامدار نەمەسە ولاردىڭ وكىلدەرى حابارلاسا الادى. بۇگىنگى تاڭدا قازاقستاندا 20 ايماقتىق وكىل – ءار وبلىستا جانە رەسپۋبليكالىق ماڭىزى بار قالالاردا ءبىر-بىردەن بار.
وسى قىزمەتكە بيىل قاڭتار ايىندا تاعايىندالعاننان باستاپ ءوز مىندەتتەرىمە شۇعىل كىرىسىپ كەتتىم. جۇمىس جوسپارىنا سايكەس استانا قالاسىنداعى قىلمىستىق-اتقارۋ جۇيەسىنىڭ №2 مەكەمەسىنە باردىق. مەكەمە باسشىلىعى مەكەمەنىڭ كۇزەت ءتۇرى, جازاسىن وتەپ جاتقاندار, جۇمىسپەن قامتىلعاندار سانى تۋرالى بايانداپ, جاڭادان سالىنىپ جاتقان ەكى تۇرعىن ءۇي بلوگىنىڭ قۇرىلىسىن كورسەتتى. يندۋستريالدى ايماققا, اياق كيىم جانە جيھاز تسەحىنا, مەكەمەنىڭ مەديتسينالىق بولىگىنە ەكسكۋرسيا جۇرگىزىلدى. اياقتالعاننان كەيىن سوتتالعاندار جەكە ىستەرى بويىنشا قابىلداندى.
ودان بولەك, اقپان ايىندا قر ءىىم قاجك № 64 مەكەمەسىنە جۇمىس ساپارى اياسىندا تەرگەۋ-قاماۋعا الىنعاندار مەن سوتتالعانداردى ۇستاۋ شارتتارىمەن جەكە تانىستىق. فرونت-ءوفيستى, سونداي-اق №6 رەجيمدىك كورپۋستى ارالادىق. قاراپ بولعان سوڭ سوتتالعانداردى جەكە ماسەلەلەرى بويىنشا قابىلدادىق. ولاردىڭ تاراپىنان مەكەمە اكىمشىلىگىنىڭ اتىنا شاعىمدار مەن وتىنىشتەردى قابىلداۋ بارىسىندا جانە ۇستاۋ شارتتارىنا تۇسكەن جوق.
سوتتالعان ازاماتتارمەن سۇحباتتاسۋ كەشەندى جۇمىستىڭ ماڭىزدى بولىگى بولىپ تابىلادى. بۇل پەنيتەنتسيارلىق جۇيەدەگى جۇيەلىك ماسەلەلەردى انىقتاۋعا مۇمكىندىك بەرەدى. بارلىق كوتەرىلگەن ماسەلەلەر مەكەمەلەردە ۇستالاتىن ادامداردىڭ قۇقىقتارىن قامتاماسىز ەتۋ بويىنشا ودان ءارى شارالار قابىلداۋ ءۇشىن تالداناتىن بولادى. كەڭسە قىزمەتكەرلەرىنىڭ تۇزەۋ مەكەمەلەرىنە كوشپەلى ساپارلارى تۇراقتى نەگىزدە جۇرگىزىلەتىن بولادى.
قازاقستان پرەزيدەنتى قاسىم-جومارت كەمەلۇلى سپورتتىڭ ۇلكەن جانكۇيەرى ەكەنى بارىمىزگە ءمالىم. سول سەبەپتى دە مەملەكەت باسشىسى ءوزىنىڭ پرەزيدەنت رەتىندەگى العاشقى جولداۋىندا بۇقارالىق سپورتتى دامىتۋ ماسەلەسىنە نازار اۋدارعان بولاتىن. بۇقارالىق سپورت – ۇلت ساۋلىعىنىڭ كەپىلى. ءبىلىمدى, تاربيەلى ءارى دەنى ساۋ ۇرپاق – ۇلتتىڭ ەڭ قىمبات بايلىعى.
سونىمەن قاتار مۇگەدەكتىگى بار ازاماتتاردىڭ قۇقىقتارىن قورعاۋ, ادام قۇقىقتارى جونىندەگى ۋاكىلدىڭ جانە وكىلدىڭ نەگىزگى باعىتتارىنىڭ ءبىرى ەكەنى ءسوزسىز. سپورت سالاسىنىڭ ۇلكەن جاناشىرى, سونىمەن قاتار پاراكاراتەنىڭ قۇرمەتتى پرەزيدەنتى رەتىندە ۇنەمى وتاندىق دەنە شىنىقتىرۋ سالاسىنىڭ ءار باسقان قادامىنا قولداۋ ءبىلدىرۋ مەنىڭ پارىزىم دەپ سانايمىن. قازىرگى تاڭدا مۇگەدەكتىگى بار ادامداردىڭ قۇقىقتارىن قامتاماسىز ەتۋ جانە تۇرمىس ساپاسىن جاقسارتۋ جونىندەگى ۇلتتىق جوسپار ىسكە اسىرىلىپ جاتىر. سوعان قوسا مۇگەدەك ايەلدەردىڭ ەرەكشە مۇقتاجدىقتارىنا نازار اۋدارا وتىرىپ, قازاقستانداعى مۇگەدەك ادامداردىڭ الەۋمەتتىك جانە گەندەرلىك ماسەلەلەرى استانا قالاسى اكىمدىگى جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى كوميسسيا نازارىندا. وسى ورايدا استانا قالاسى اكىمدىگىنىڭ «مۇمكىندىكتەرى شەكتەۋلى تۇلعالارعا ارنالعان «ەلوردا» سپورت كلۋبى» كمم باسشىلىعى, @azamat_tagayev_zh تاگاەۆ ازامات جۇمابەكۇلى شاقىرتۋىمەن 8-ناۋرىز حالىقارالىق ايەلدەر كۇنىنە وراي وتكىزىلگەن ءىس-شارانىڭ قادىرلى قوناعى بولدىم. استانا قالاسىنىڭ دەنە شىنىقتىرۋ جانە سپورت باسقارماسىنىڭ باسشىسىنان @vassiliy_levit ۆاسيلي مىرزادان پارا سپورتتى دامىتۋىنا ۇلەسىمدى قوسقانىم ءۇشىن العىس حاتپەن ماراپاتتالدىم. كونتسەرتتەن كەرەمەت كوڭىل-كۇيمەن, اسەر الىپ شىقتىم.
مەرەكەلىك كونتسەرتتى وتكىزۋگە اتسالىسقان بارلىق ەرلەر قاۋىمىنا ۇلكەن العىسىمدى ءبىلدىردىم. الداعى پاريجدە ونەر كورسەتەتىن پارا سپورتشىلارىمىزعا ساتتىلىك تىلەيمىن.
جۇمىس بارىسىندا پارا ۇستەل تەننيسىنەن ITTF Fa20 Astana para open 2024 ءتۋرنيرىنىڭ اشىلۋ سالتاناتىنا, ەڭبەك قۇقىقتارىن ساقتاۋ تاقىرىبىندا كەزدەسۋگە قاتىستىم. استانا قالاسى ءبىلىم باسقارماسى ۇجىمىمەن ەڭبەك قۇقىقتارىن ساقتاۋ تاقىرىبىندا كەزدەسۋ بارىسىندا ادامداردىڭ ەڭبەك قۇقىقتارى جونىندەگى ۋاكىلدىڭ بۇزىلعان ەڭبەك قۇقىقتارىن قالپىنا كەلتىرۋ باعىتىنداعى قىزمەتى تۋرالى ايتىلدى. سونىمەن قاتار, بۇزىلعان ەڭبەك جانە باسقا دا قۇقىقتاردى قالپىنا كەلتىرۋ ءۇشىن ۋاكىلگە, نە ونىڭ وكىلىنە جۇگىنۋ ءتارتىبى تۋرالى ءتۇسىندىرىلدى. استانا قالاسىنىڭ زەينەتكەرلەرىمەن كەزدەسۋ ءۇشىن بايقوڭىر اۋدانىنىڭ بەلسەندى ۇزاق ءومىر ءسۇرۋ ورتالىعىنا باردىق. قالا زەينەتكەرلەرىمەن وتكەن العاشقى كەزدەسۋدە ومبۋدسمەندەر ينستيتۋتىنىڭ ماڭىزدىلىعى مەن زەينەتكەرلەرگە قۇقىقتىق كومەك كورسەتۋ ماسەلەسىنە توقتالىپ, جينالعانداردى اشىق اڭگىمەگە تارتتىق.
سونىمەن قاتار اتالعان كەزدەسۋگە قالا زەينەتكەرلەرىنىڭ مۇڭ-مۇقتاجىن تىڭداپ, ولارعا قۇقىقتىق, الەۋمەتتىك قولداۋ كورسەتۋ ءۇشىن استانا قالاسى جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ەركەبۇلان مالىك پەن ادىلەت دەپارتامەنتىنىڭ وكىلى قۇندىز بەكباۋوۆا قاتىستى. زەينەتكەرلەر تاراپىنان ەڭبەك شارتىنىڭ ورىندالماۋى, كوممۋنالدىق تولەمنىڭ ءوسۋى, زەينەتاقى تاعايىنداۋ, وتباسىنداعى تۇرمىستىق زورلىق-زومبىلىق, جەكە مۇلىككە قاتىستى جانە ت.ب. وزەكتى ماسەلەر بويىنشا سۇراقتار قويىلدى. كەزدەسۋ بارىسىندا سوڭعى كەزدە زەينەتكەرلەردىڭ الاياقتاردىڭ ارباۋىنا ءتۇسىپ, ينتەرنەت-الاياقتىقتىڭ قۇربانىنا اينالىپ جاتقانى باسا ايتىلدى. وسى رەتتە, جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ە.مالىك ەگدە جاستاعى ادامدارعا الاياقتاردان اباي بولىپ, ودان ساقتانۋدىڭ جولدارىن تۇسىندىرسە, ادىلەت دەپارتامەنتىنىڭ قىزمەتكەرى ق.بەكباۋوۆا مەنشىك داۋلارىن شەشۋدە تەگىن قورعاۋشىلاردىڭ كومەگىمەن قامتاماسىز ەتەتىنىن ايتتى. زەينەتكەرلەر وزدەرىن تولعاندىرعان سۇراقتارعا تولىققاندى جاۋاپتار الدى. بۇل كەزدەسۋ «حالىقتىڭ ۇنىنە قۇلاق اساتىن مەملەكەت» تۇجىرىمداسىنىڭ اياسىندا ءوتتى.
مەنىڭ تاعايىندالعانىما 3 ايداي ۋاقىت بولدى. قازىر ەڭبەك ۇجىمدارىمەن كەزدەسىپ, قۇقىقتىق مارافون وتكىزىپ ءجۇرمىن. زەينەتكەرلەردىڭ ايتىلعان جەكە ماسەلەلەرىن قاراستىرىپ, ودان ءارى ءتيىستى قۇزىرلى ورگاندارعا جىبەرەمىن. زەينەتكەرلەردى جەكە قابىلداۋىما جازىپ, بارلىق ماسەلەلەر بويىنشا 15 كۇن ىشىندە شەشىم قابىلداۋعا تىرىسامىز. مۇنداي كەزدەسۋلەر حالىققا جاقىن بولىپ, ولارعا قۇقىقتىق ءتۇسىندىرۋ جۇمىستارىن جۇرگىزۋ ءۇشىن قاجەت.
«شاراپات» الەۋمەتتىك قىزمەت كورسەتۋ ورتالىعىنا جۇمىس بارىسىمەن بارىپ, مونيتورينگ جۇرگىزدىك. كەزدەسۋ اياسىندا ورتالىقتىڭ سۇيەمەلدەۋىندەگى ازاماتتارمەن جۇزدەستىك. سونىمەن قاتار, ازاماتتىڭ بۇزىلعان قۇقىقتارى مەن بوستاندىقتارىن قالپىنا كەلتىرۋگە جاردەمدەسۋدى ماقسات ەتەتىنىمىزدى ايتىپ, تۇرعىنداردى مازالاعان سۇراق-ساۋالدارىن تىڭدادىق. مونيتورينگ بارىسىندا مەكەمە عيماراتتارىندا قارتتار مەن مۇگەدەكتەر ءۇشىن بارلىق جاعداي جاسالعانى انىقتالدى. قىزمەت الۋشىلارمەن سويلەسۋ ۋاقىتىندا ءدارى-دارمەكپەن قامتىلۋ, ازىق-تۇلىكتىڭ بارلىق ستاندارتتارعا ساي ازىرلەنىپ ساقتالۋى, مەديتسينالىق قاجەتتىلىكتەرىنىڭ ۋاقىتىندا ورىندالۋى سەكىلدى ماسەلەلەردىڭ جوقتىعىن بايقادىق. ايتا كەتەيىك, «شاراپات» ورتالىعى زەينەتكەرلىك جاسقا تولعان ادامداردىڭ جانە ءى جانە ءىى توپتاعى مۇگەدەكتەردىڭ, جالعىزباستى جانە تۇراقتى سىرتتان كۇتىمدى تالاپ ەتەتىن ادامداردىڭ تۇرۋىنا ارنالعان. مەكەمەدە 140 ايەل ادام, 200 ەر ادام قىزمەت الادى. ودان بولەك, «استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى» مەملەكەتتىك مەكەمەسىندە «ارەكەتكە قابىلەتسىز ازاماتتاردىڭ قورعانشىلىق, قامقورشىلىق, مۇلىكتىك جانە جەكە مۇلىكتىك ەمەس قۇقىقتارىن قورعاۋ ماسەلەلەرى بويىنشا قۇقىقتىق كەڭەس بەرۋ كۇنى» ءىس-شاراسىن وتكىزدىك.
جيىنعا استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارما باسشىسىنىڭ ورىنباسارى ەركەبۇلان مالىك جانە دە زاڭگەر, ءار سالانىڭ ماماندارى قاتىستى. كەزدەسۋ بارىسىندا مۇگەدەكتىك تاعايىنداۋداعى قيىندىقتار, حقكو-لاردا قامقورشىلاردىڭ دەرەكتەر بازاسىنىڭ بولماۋى, مۇمكىندىگى شەكتەۋلى ازاماتتار ءۇشىن قالاارالىق كولىك, تەمىر جول, اۆيا كاسسالارىندا بيلەتتەردى ساتىپ الۋ ءۇشىن ونلاين باعدارلاما ازىرلەنبەگەنى تۋرالى ايتتى. سونداي-اق ارەكەتكە قابىلەتسىزدەر ءۇشىن تۇرعىن ءۇي قاتىناستارى بويىنشا نقا-عا تۇزەتۋلەر ەنگىزۋ, دياگنوزدىڭ كۇردەلىلىگىنە بايلانىستى 2 توپتاعى مۇمكىندىگى شەكتەۋلى ازاماتتىڭ قامقورشىسىنا كۇتىم بويىنشا جاردەماقى تاعايىنداۋ, قامقورشىعا قالالىق كولىكتە جول ءجۇرۋ جەڭىلدىكتەرىن بەرۋ, سانوتورلىق-كۋرورتتىق ەمدەۋ, ينۆاتاكسي جانە تۇرعىن ءۇي ماسەلەلەرى تالقىلاندى. شارا سوڭىندا قاتىسۋشىلارعا قۇقىقتىق كەڭەس بەرىلدى.
جاقىندا استاناداعى دوستىق ۇيىندە مۇگەدەكتىگى بار ازاماتتاردىڭ قۇقىقتارىن قورعاۋعا بايلانىستى دوڭگەلەك ۇستەلگە ءماجىلىس دەپۋتاتى نۇرلان اۋەسباەۆ, استانا قالاسى ءبىلىم باسقارماسى باسشىسىنىڭ ورىنباسارى سەرىك ادىلباەۆ, استانا قالاسى جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ەركەبۇلان مالىك, قالالىق قوعامدىق باقىلاۋ كوميسسياسىنىڭ توراعاسى مارات ساتارقۇلوۆ جانە باسقا دا سالا ماماندارىمەن بىرگە قاتىستىم. وتىرىس بارىسىندا ەركەبۇلان مالىك بۇگىنگى تاڭدا استانادا 34 مىڭنان استام مۇگەدەكتىگى بار ادام تۇراتىنىن اتاپ ءوتتى. سونداي-اق «پارلامەنتتە ەكىنشى سەسسيا جۇمىسىنىڭ باسىنان باستاپ «ينكليۋزيۆتى پارلامەنت» دەپۋتاتتىق توبى قۇرىلعان. ونىڭ باسشىسى – ءماجىلىس دەپۋتاتى ەرلان ابديەۆ. مەملەكەت مۇگەدەكتەردىڭ قۇقىقتارى تۋرالى كونۆەنتسيانى نورمالارىن ىسكە اسىرۋ بويىنشا ۇلكەن جۇيەلى جۇمىس جۇرگىزۋدە. پارلامەنت جىل سايىن دەپۋتاتتاردىڭ قاتىسۋىمەن مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋعا باعىتتالعان زاڭدار قابىلداۋدا. ينكليۋزيا ساپاسىن باقىلاۋ جانە جالپى مۇگەدەك ادامداردىڭ ءومىر ءسۇرۋ ساپاسىن جاقسارتۋ ماقساتىندا «ينكليۋزيۆتى پارلامەنت» دەپۋتاتتىق توبى قۇرىلدى.
ءبىزدىڭ تاراپىمىزدان 2023 جىلى مۇگەدەكتەردىڭ قۇقىقتارىن بۇزۋ تۋرالى 15 ءوتىنىش قارالدى. ونىڭ ىشىندە مەديتسينالىق قىزمەت كورسەتۋدىڭ ساپاسىنا قاتىستى 9 ءوتىنىش, مۇگەدەك بالانى ارنايى مەكتەپ-ينتەرناتقا قابىلداۋ تۋرالى 1 ءوتىنىش, تۇرعىن ءۇي الۋ پروبلەمالارىنا قاتىستى 3 ءوتىنىش تۇسكەن. بيىل ەلوردادا قاڭتار ايىندا 49 ءوتىنىش كەلىپ ءتۇستى. ونىڭ ىشىندە ينۆاتاكسي, مۇگەدەك جانداردىڭ تۇرعىن ءۇي الا الماۋى, اتاۋلى الەۋمەتتىك كومەككە جانە ت.ب. قاتىستى شاعىمدار بار. وسىنداي شاعىمدار مەن وتىنىمدەر بويىنشا قارقىندى جۇمىس جۇرگىزىلەدى. جالپى ازاماتتار قۇقىقتارى مەن بوستاندىقتارىن قورعاۋداعى مىندەتتەرىمىزدى ابىرويمەن اتقارۋ – بۇگىنگى تاڭداعى باستى مىندەتىمىز.
بايان جالماعانبەتوۆا,
استانا قالاسى بويىنشا ادام قۇقىقتارى جونىندەگى ۋاكىلدىڭ وكىل
