استانا قالاسىنىڭ ادىلەت دەپارتامەنتى, جەكە سوت ورىنداۋشىلارىنىڭ وڭىرلىك پالاتاسى جانە استانا قالاسىنىڭ پوليتسيا دەپارتامەنتى اليمەنت ءوندىرۋ تۋرالى اتقارۋشىلىق ءىس جۇرگىزۋلەر بويىنشا ماجبۇرلەپ ورىنداتۋ شارالارىن قولدانا وتىرىپ «بورىشكەر» رەيدتىك شاراسىن وتكىزدى.
رەيد بارىسىندا كۇنى بۇگىنگە دەيىن جالپى سوماسى 23 075 219 تەڭگە اليمەنت بەرەشەگى بار 10 بورىشكەردىڭ اۆتوكولىگى ايىپ تۇراعىنا قويىلدى.
ەندى جەكە سوت ورىنداۋشىلارى اتالعان اۆتوكولىكتەردى باعالاۋ, ساۋدا-ساتتىققا شىعارۋ جۇمىستارى جۇرگىزىلەتىن بولادى.
الداعى ۋاقىتتا دا بورىشكەرلەردىڭ مۇلكىنەن اليمەنت ءوندىرىپ الۋ شارالارى ودان ءارى جالعاسا تۇسپەك.
جىل باسىنان بەرى ادىلەت دەپارتامەنتىنىڭ مەملەكەتتىك سوت ورىنداۋشىلارى اكىمشىلىك حاتتاما تولتىرعان 38 بورىشكەر استانا قالاسى اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنىڭ قاۋلىسىمەن قر اقبتك 669-بابىنا سايكەس اكىمشىلىك جاۋاپكەرشىلىككە تارتىلدى. ال 8 بورىشكەر 2-دەن 5 تاۋلىككە دەيىن قاماۋعا الىنىپ, قالعاندارىنا 5 اەك مولشەرىندە ايىپپۇل سالىندى.
ال استانا قالاسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى اليمەنت تولەمدەرىنەن قاساقانا جالتارعان 2 بورىشكەردى قر قك 139-بابىنا سايكەس قىلمىستىق جاۋاپكەرشىلىككە تارتتى.
وسى باعىتتا استانا قالاسىنىڭ ادىلەت دەپارتامەنتى استانا قالاسىنىڭ جەكە سوت ورىنداۋشىلارىنىڭ وڭىرلىك پالاتاسى جانە «استانا قالاسى اكىمدىگىنىڭ ەڭبەك موبيلدىلىگى ورتالىعىمەن» بىرلەسە وتىرىپ, اليمەنت تولەمدەرى بويىنشا بورىشكەرلەردى بەلسەندى الەۋمەتتىك ومىرگە تارتۋعا باعىتتالعان «بوس ورىندار جارمەڭكەسىن» دە وتكىزۋدە. بۇل باعىتتاعى جۇمىس ودان ءارى جالعاسا بەرەدى.
دينارا ورداباەۆا
