م. وتەمىسوۆ اتىنداعى وقۋشىلار سارايىندا «استانا قالاسىنىڭ مەملەكەتتىك ءارحيۆى» مم حالىقتار بىرلىگى كۇنىنە ارنالعان «بىرلىگى جاراسقان – قازاقستان» فوتوقۇجاتتىق كورمەسىنىڭ رەسمي اشىلۋىن وتكىزدى, دەپ حابارلايدى astana-akshamy.kz
اتالعان ءىس-شاراعا قوعام قايراتكەرلەرى, عالىمدار, ءتۇرلى ەتنو-مادەني بىرلەستىكتەردىڭ وكىلدەرى قاتىستى. استانا قالاسى مەملەكەتتىك ءارحيۆىنىڭ ديرەكتورى جانگەلدى بيمولدين قۇتتىقتاۋ ءسوز سويلەپ, بارلىق قاتىسۋشىلاردى حالىقتار بىرلىگى كۇنىمەن قۇتتىقتادى. ودان كەيىن ءسوز العان ت. ع. د., پروفەسسور, قر ونەر اكادەمياسىنىڭ اكادەميگى, س. سەيفۋللين مۇراجايىنىڭ ديرەكتورى مارات ابسەمەتوۆ قازاقستاندا تۇراتىن حالىقتاردىڭ كوپشىلىگى ەكىنشى دۇنيەجۇزىلىك سوعىس كەزىندە جەر اۋدارىلعانىن اتاپ ءوتتى. ال استانا قالاسىنداعى «تاڭ» تاتار-باشقۇرت ەتنومادەني بىرلەستىگىنىڭ وكىلى زەمفيرا داۋتوۆا بارلىق قاتىسۋشىلاردى مەرەكەمەن قۇتتىقتاپ, بىرلەستىكتىڭ قۇرىلۋ تاريحىن قىسقاشا ايتىپ بەردى. «ۆايناح» شەشەن-ينگۋش ءانسامبلىنىڭ جەتەكشىسى حانيفا ماتسيەۆا ەكىنشى دۇنيەجۇزىلىك سوعىس كەزىندە قازاقستان اۋماعىنا جەر اۋدارىلعان شەشەن-ينگۋشتاردىڭ تىكەلەي ۇرپاعى ەكەنىن ايتىپ, سول كۇردەلى جىلدار تۋرالى ەستەلىكتەرمەن ءبولىستى.
كورمە بارىسىندا «ۆايناح» شەشەن-ينگۋش ءانسامبلى كورەرمەندەر مەن قوناقتاردىڭ نازارىنا «لەزگينكا»بيىن ۇسىندى.
اتالعان ءىس-شاراعا كولىك جانە كوممۋنيكاتسيا جوعارى كوللەدجىنىڭ 1 كۋرس ستۋدەنتتەرى, باق وكىلدەرى, كورنەكتى قوعام قايراتكەرلەرى, عالىمدار قاتىستى.
كورمە قازاقستان رەسپۋبليكاسىنىڭ مەملەكەتتىك گيمنىمەن اياقتالدى, ونىڭ اياسىندا قازاقستاننىڭ بارلىق حالىقتارى تاتۋلىق پەن دوستىقتا, كەلىسىم مەن ىنتىماقتاستىقتا ءومىر سۇرەدى.
