استانادا رەسپۋبليكالىق «تازا قازاقستان» ەكولوگيالىق اكتسياسى اياسىندا اتى اڭىزعا اينالعان فۋتبولشى كولو تۋرە مەن فاديگا حاليلۋ كوشەت وتىرعىزدى, دەپ حابارلادى astana-akshamy.kz
بۇگىن ەلىمىزگە فۋتبولدان جاس ورەندەردى ىرىكتەۋ ماقساتىندا «Super bol» جوباسىنا ارنايى كەلگەن كولو تۋرە مەن فاديگا حاليلۋ استانا قالاسىنداعى قازاقستان فۋتبول فەدەراتسياسى اۋماعىندا كوشەت وتىرعىزۋ اكتسياسىنا قاتىستى.
«قازاقستانعا فۋتبول جوباسىنا ارنايى قوناق رەتىندە ءبىرىنشى رەت كەلدىم. تەك جاسىل الاڭدا عانا ەمەس, قالانىڭ ەكولوگياسىن ساقتاۋ ماقساتىندا ۇيىمداستىرىلعان اكتسياعا قاتىسقانىما وتە قۋانىشتىمىن. بۇعان دەيىن دە كوپتەگەن قالالاردا بولدىم. ال استانانىڭ وزىندىك ادەمىلىگى بار. تازالىعى ءبىر جولعا قويىلعانى كورىنىپ تۇر. باستىسى مەنى سىيلاپ, شاقىرعاندارىڭىزعا قۋانىشتىمىن!» — دەدى كەزىندە «ارسەنال», «مانچەستەر سيتي», «ليۆەرپۋل» ساپىندا دوپ تەپكەن فۋتبولشى كولو تۋرە.
ايتا كەتەيىك, 8 ساۋىردە باستالعان «تازا قازاقستان: استانا – تازالىق پەن ءتارتىپتىڭ ۇلگىسى» اكتسياسى اياسىندا 29 ءساۋىر بەن 4 مامىر ارالىعىندا قارتتار ءۇيى, ارداگەرلەر, قىزمەت بارىسىندا قازا تاپقان قۇقىق قورعاۋ ورگاندارى قىزمەتكەرلەرىنىڭ وتباسى تۇراتىن ۇيلەر اۋماعىن اباتتاندىرۋعا باعىتتالعان «ونەگەلى ۇرپاق» تاقىرىپتىق اپتالىعىمەن جالعاسىپ جاتىر.
بيىل استانادا بارلىعى 1,1 ميلليون جاسىل جەلەك وتىرعىزۋ جوسپارلانىپ وتىر. ءۇش اپتادا قالادا 74 مىڭنان استام كوشەت وتىرعىزىلدى.
ەستەرىڭىزگە سالا كەتەيىك, 3 اپتادان بەرى ەلوردادا «تازا قازاقستان: استانا – تازالىق پەن ءتارتىپتىڭ ۇلگىسى» ەكواكتسياسى ءوتىپ جاتىر. كەڭ كولەمدى ەكولوگيالىق ناۋقان اياسىندا قالانى, نوسەر جانە سۋارۋ جۇيەلەرىن سانيتارلىق تازالاۋ, كوشەلەردى, تروتۋارلاردى, كۆارتالىشىلىك اۋماقتاردى, قوعامدىق ورىندار مەن اۋلالاردى تازالاۋ جۇرگىزىلۋدە. سونداي-اق جاسىل جەلەكتەردى كۇتىپ-باپتاۋ جانە وتىرعىزۋ, ساۋدا نىساندارىنا جاقىن اۋماقتاردى تازالاۋ, كوگالدار مەن گۇلزارلاردى تازالاۋ, رۇقسات ەتىلمەگەن قوقىستاردى جويۋ جانە ت.ب. جۇرگىزىلەدى.
