استاناداعى ۇلتتىق اكادەميالىق كىتاپحانادا مەملەكەت جانە قوعام قايراتكەرى, بەلگىلى قالامگەر, كومپوزيتور, قازاقستاننىڭ ەڭبەك سىڭىرگەن قايراتكەرى اكىم ىسقاقتىڭ «ادام ىزدەپ ءجۇرمىن» شىعارماشىلىق كەشى مەن «كۇن ۇلىمىن», «ءبىزدىڭ باپاق» جانە «مەنىڭ قوسجانىم» كىتاپتارىنىڭ تانىستىرىلىمى ءوتتى. جيىندى بەلگىلى اقىن, قازاقستان جازۋشىلار وداعى باسقارماسىنىڭ حاتشىسى, وسى ۇيىمنىڭ استانا قالالىق فيليالىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى داۋلەتكەرەي كاپۇلى جۇرگىزدى.
ءىس-شارا پارلامەنت سەناتىنىڭ توراعاسى ماۋلەن اشىمباەۆتىڭ كەش يەسىنە جولداعان قۇتتىقتاۋ حاتىمەن اشىلدى. ونى سەنات دەپۋتاتى ءالي بەكتاەۆ وقىپ بەردى.
«قۇرمەتتى اكىم ابدىقايىمۇلى! بيىل قالامدى سەرىك ەتىپ, شىنايى شىعارماشىلىقپەن اينالىسىپ كەلە جاتقانىڭىزعا تۋرا 50 جىل تولىپ وتىر. وسى اتاۋلى داتاعا وراي ۇيىمداستىرىلعان ادەبي كەشىڭىز قۇتتى بولسىن! ءسىز ولەڭ الەمىنەن ءوزىڭىزدىڭ لايىقتى ورنىڭىزدى العان تۇلعالاردىڭ ءبىرىسىز. اسىرەسە بالالار ادەبيەتىنە قوسقان ۇلەسىڭىزدى ايرىقشا اتاپ وتكىمىز كەلەدى. بۇگىنگە دەيىن كوپتەگەن تۋىندىڭىز مەكتەپ باعدارلاماسىنا ەنىپ, وسكەلەڭ ۇرپاقتىڭ سەرگەك رۋحتى ءارى تاربيەلى بولىپ قالىپتاسۋىنا زور ىقپالىن تيگىزۋدە. «كۇن ۇلىمىن» جانە «ءبىزدىڭ باپاق» كىتاپتارى دا الداعى ۋاقىتتا وسكەلەڭ ۇرپاققا دۇرىس ءتالىم بەرۋ ميسسياسىن مۇلتىكسىز اتقارادى دەپ سەنەمىز. سونىمەن قاتار ءسىزدىڭ ەسىمى كوپشىلىككە بەيمالىم تالانتتى تۇلعالاردى تاۋىپ, ولاردى تانىتۋ جولىنداعى ەڭبەگىڭىزدى دە وڭ باعالايمىز. وسى باعىتتاعى «مەنىڭ قوسجانىم» اتتى زەرتتەۋ كىتابىڭىز جاستارىمىزدىڭ ۇلكەن بۋىننىڭ ونەگەسىن بويىنا ءسىڭىرىپ وسۋىنە سەپتىگىن تيگىزەدى دەپ ويلايمىز» دەلىنگەن قۇتتىقتاۋ حاتتا.
سەنات توراعاسى حاتىندا كەش يەسىنىڭ قالامگەرلىك جولىنا عانا ەمەس, قايراتكەرلىگىنە دە توقتالدى. سونىڭ ىشىندە ەلىمىزدىڭ كاسىبي پارلامەنتىنىڭ قالىپتاسىپ, دامۋىنا زور ۇلەس قوسقانىن, قىزمەتىنە قاراماستان, شىعارماشىلىعىنان قول ۇزبەگەنىن, ادەبيەتكە ادالدىق تانىتقانىن اتاپ ءوتتى.
ءالي بەكتاەۆ ءوز تاراپىنان اكىم ىسقاقتىڭ ءومىر جولىنا, پارلامەنتتەگى ەڭبەگىنە توقتالدى. اسىرەسە كەش يەسىنىڭ تۇڭعىش قازاق تىلىندە جازىلعان «حالىقتىڭ كوشى-قونى تۋرالى» زاڭىنىڭ اۆتورى ەكەنىن ايرىقشا اتاپ ءوتتى. شىعارماشىلىعىنىڭ تاربيەلىك ءمانى, ازاماتتىق قىرلارى تۋرالى ايتتى.
قۇتتىقتاۋلار لەگىن مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي, وقۋ-اعارتۋ مينيسترلىگى تاربيە جانە قوسىمشا ءبىلىم دەپارتامەنتىنىڭ ديرەكتورى مەرۋەرت مەدەتبەكوۆا جالعادى. استانا قالاسى ءبىلىم باسقارماسىنىڭ باسشىسى قاسىمحان سەنعازىەۆتىڭ يگى تىلەگىن وسى باسقارمانىڭ ءبولىم باسشىسى اسىل امانگەلدىقىزى جەتكىزدى. «ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىق كەڭەسى توراعاسىنىڭ ءبىرىنشى ورىنباسارى, تاريح عىلىمدارىنىڭ دوكتورى ومىرزاق وزعانباەۆ 1997 جىلدىڭ جەلتوقسانىنداعى استانا الاتاۋدان ارقاعا كوشىپ كەلگەن تاريحي كۇندى ەسكە الىپ, اكىم ىسقاقپەن پارلامەنتتە قىزمەتتەس بولعانىن اتاپ ءوتتى. كەش يەسىنىڭ سول جىلدارداعى ەڭبەگىنە توقتالدى. سەنات دەپۋتاتتارى التىنبەك نۇحۇلى مەن رۋسلان رۇستەموۆ, ءماجىلىس دەپۋتاتتارى قازىبەك يسا, ابزال قۇسپان تىلەگىن جەتكىزدى. استانا قالاسى ءماسليحاتىنىڭ توراعاسى ەرلان كاناليموۆتىڭ جىلى لەبىزىن قالالىق ءماسليحات دەپۋتاتى ەرلان داكەنوۆ جەتكىزدى. شىعارماشىلىق كەشتە اكىم ىسقاقتىڭ اندەرى اۋەلەپ, ولەڭدەرى وقىلدى.
***
اكىم ىسقاقتى وقۋ-اعارتۋ ءمينيسترى عاني بەكتاەۆ قابىلداپ, شىعارماشىلىعىنىڭ 50 جىلدىعىمەن قۇتتىقتادى. مينيسترلىكتىڭ «بالالار كىتاپحاناسى» باعدارلاماسىمەن شىققان كىتاپتارى بالالاردىڭ كەڭ اۋديتورياسىنان ورىن الاتىنىنا سەنىم ءبىلدىردى. قازاقى داستۇرمەن يىعىنا شاپان جاۋىپ, العىس حات تابىس ەتتى.
