استاناداعى ۇلتتىق اكادەميالىق كىتاپحانادا اقىن, ساتيريك, حالىقارالىق «الاش» ادەبي سىيلىعىنىڭ يەگەرى ءورىس ياشۇكىرقىزىنىڭ 75 جىلدىعىنا ارنالعان شىعارماشىلىق كەشى جانە 4 تومدىق شىعارمالار جيناعىنىڭ تانىستىرىلىمى ءوتتى.
اۆتوردىڭ «بوياماسىز ءومىر» اڭگىمەلەر جيناعى, «سەكسەۋىلدىڭ شوعى» ولەڭدەر جيناعى, «شەنەۋنىكشە تاكتيكا» ءازىل-سىقاق, ساتيرالىق اڭگىمەلەر جيناعى, «قاراشا قازدىڭ قاڭقىلى» ولەڭدەر جيناعى كەزىندە وقىرمان تاراپىنان لايىقتى باعاسىن الدى.
مەرەيتويلىق شارادا ولەڭ, پروزا, ساتيرا, دەتەكتيۆ سياقتى ءتورت جانردا بىردەي قالام تارتقان قالامگەردىڭ رۋحانياتقا قوسقان ۇلەسى جايىندا ايتىلدى. جازۋشى ءشاربانۋ بەيسەنوۆا: «مەن 1998 جىلى استاناعا ءدام تارتىپ كوشىپ كەلگەندە, ورەكەڭ «استانا اقشامى» گازەتىندە ىستەپ ءجۇردى. ورەكەڭنىڭ ءاربىر ماقالاسىن ءسۇيسىنىپ وقيتىن ەدىم, مەنىڭ ەسىمدە قالعانى, باعاناعا شىعىپ توكقا تۇسكەن جىگىت تۋرالى جازعان ماقالاسى بار-دى, سول قايعىلى وقيعا سونداي ءبىر مەيىربان جۇرەكپەن جازىلعاندىقتان ەرەكشە اسەر ەتكەن. ارتىنان سول جىگىتتىڭ اتىنا ەسەپ اشىپ, كومەك ۇيىمداستىرۋ كەرەك دەپ اكتسيا جاسالدى. بۇل كىسىنىڭ جازعاندارىندا جاناشىرلىق, ادىلدىك جاعى باسىم بولاتىن» دەپ جىلى پىكىر ايتتى. سونداي-اق الىبەك اسقاروۆ كەزىندە ءبىر مينيسترلىكتە جۇمىس ىستەگەن كەزىنەن ەستەلىكتەرگە توقتالىپ, تولىمبەك ءابدىرايىم, جولتاي ءالماشۇلى, كامال الپەيىسوۆا, تاعى باسقا قالامگەرلەر لەبىز ءبىلدىردى.
جيىندى جۇرگىزگەن اقىن داۋلەتكەرەي كاپۇلى قازاقستان جازۋشىلار وداعىنىڭ باسقارما باسشىسى مەرەكە قۇلكەنوۆتىڭ ءورىس ياشۇكىرقىزىنا ارناعان قۇتتىقتاۋىن وقىپ, مەرەيتوي يەسىنە «قازاقستاننىڭ قۇرمەتتى جازۋشىسى» اتاعى بەرىلگەنىن حابارلاپ, جازۋشىلار وداعىنىڭ شاپانىن جاپتى.
