كەشە استانا قالاسىنىڭ اكىمى جەڭىس قاسىمبەكتىڭ قاتىسۋىمەن قالالىق ءماسليحاتتىڭ كەزەكتەن تىس سەسسياسى ءوتتى. جيىن بارىسىندا ەلوردانىڭ 2024-2026 جىلدارعا ارنالعان بيۋدجەتى ناقتىلانىپ, دەپۋتاتتار بىرقاتار ماڭىزدى جۇمىستارعا قوسىمشا قارجى ءبولۋدى ءبىراۋىزدان قولدادى.
بيۋدجەت بويىنشا قالالىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆ بايانداما جاسادى.
– مەملەكەت باسشىسىنىڭ بيۋدجەتتى ءتيىمدى باسقارۋ جونىندەگى تاپسىرماسىن ورىنداۋ شەڭبەرىندە ءبىز بيۋدجەتتىڭ بارلىق نەگىزگى شىعىستارىن قايتا قارادىق جانە وڭتايلاندىرۋعا 7,7 ميلليارد تەڭگە ۇسىنىلىپ وتىر. وسىلايشا بيۋدجەتتىڭ وسى ناقتىلانۋى اياسىندا بولۋگە 116 ميلليارد تەڭگە ۇسىنىلادى. مەملەكەتتىڭ الەۋمەتتىك مىندەتتەمەلەرىن ورىنداۋدىڭ باسىمدىلىعىن نەگىزگە الا وتىرىپ, الەۋمەتتىك سالانى قارجىلاندىرۋ ماسەلەلەرى ەرەكشە تارتىپپەن قارالادى, – دەدى قايسار ماڭقاراەۆ.
قوسىمشا قارجى مۇمكىندىگى شەكتەۋلى ازاماتتاردى وڭالتۋعا جانە الەۋمەتتىك قىزمەتتەر كورسەتۋگە ءبولىندى. سونداي-اق تۇرعىن ءۇي كومەگىن كورسەتۋدىڭ مولشەرى مەن ءتارتىبىن قولداۋ تاپتى. ماسەلەن, وتكەن جىلى 672, ال بيىلعى قاڭتاردان باستاپ 445 وتباسى تۇرعىن ءۇي كومەگىمەن قامتىلدى.
«استانا قالاسىندا اقپاراتتىق-باعدارلامالىق فوتوبەينەتىركەۋ جانە بەينەتالداۋ كەشەنىن قۇرۋ جانە پايدالانۋ» جوباسىنىڭ جۇمىسى 6 ايعا ۇزارتىلدى. قالالىق اۆتوبۋستار باعدارلارىندا جولاۋشىلار مەن باگاجدى اۆتوموبيلمەن تۇراقتى تاسىمالداۋعا اكىمدىك بەلگىلەيتىن 110 تەڭگە مولشەرىندەگى بىرىڭعاي تاريف كەلىسىلدى. بۇعان قوسا, ءماسليحات دەپۋتاتتارى قوعامدىق كەڭىستىكتەردى, كوپپاتەرلى تۇرعىن ءۇي كەشەندەرىن جانە باسقا دا نىساندار سالىناتىن جەر تەلىمدەرىن مەملەكەت مەنشىگىنە الۋ تۋرالى كەلىسىمشارتتى قولدادى.
