قازىرگى جاستار ماماندىقتىڭ بەدەلىنە ەمەس, قانشا اقشا بەرەتىنىنە وراي تاڭدايدى. زامان سونداي, ماتەريالدىق يگىلىك – ءبىرىنشى ورىندا. سوسىن يكەمدى جۇمىس گرافيگى مەن ورنالاسقان جەرى, ۇجىمداعى يگى اتموسفەرالىق احۋال ماڭىزدى. اكە-شەشەسىنىڭ ايتۋىمەن گرانتپەن وقىپ, امال جوق, ۇناماعان ماماندىقتىڭ ديپلومىن العاندار نە ماگيستراتۋراعا باسقا ماماندىق بويىنشا تاپسىرادى, نە اقىلى كۋرستاردى وقىپ الادى, نە شەتەل اسىپ, مول تابىس تابۋدىڭ جولىنا تۇسەدى.
كىم بولاسىڭ؟
بۇرىن كوبى دارىگەر مەن مۇعالىمدىكتىڭ جاۋاپكەرشىلىگىنەن قاشسا, قازىر ەكى ماماندىقتىڭ مارتەبەسى كوتەرىلىپ تۇر. ويتكەنى ولاردىڭ جالاقىسى جوعارى. ال اۋىلعا جاس مامان بولىپ بارساڭ, كوتەرمەاقى مەن تۇرعىن ۇيگە يە دە بولاسىڭ.
وسى ماماندىقتارمەن قاتار, مۇناي-گاز سالاسى مامانى بولۋ دا – «ولمەيتىن» كاسىپ. بۇرىن ەڭ قۇرمەتتى, مەرەيلى ماماندىق سانالاتىن زاڭ فاكۋلتەتى دە تۇعىردان ءتۇسىپ تۇرعان جوق. كەيبىر تالاپكەر ءۇشىن مۇنداي جەرگە وقۋعا ءتۇسۋ – كادىمگىدەي ابىروي. ال قولى قىسقالار وبلىستاعى اۋىل شارۋاشىلىعى ماماندارىن دايارلايتىن كوللەدجدەردى قاناعات تۇتادى.
بۇدان بىرنەشە جىل بۇرىن ءار مەكتەپ, كوللەدجگە بارىپ, ماماندىق تاڭداۋ تۋرالى ۇگىت-ناسيحات جۇرگىزىلەتىن. راس, قازىر بارلىق جەردە ارناۋلى ورتا ءبىلىم بەرەتىن كوللەدجدەر جەتەرلىك. ماتەريالدىق-تەحنيكالىق بازالارى دا مىقتى. جاتاقحانا مەن 3 مەزگىل تاماقپەن قامتىلادى. وقۋ دا, تۇرۋ دا تەگىن. اۋىلشارۋاشىلىعى ماماندارىن جوعالتىپ الماۋ ءۇشىن ءارى اۋىلدان كەشە كەلىپ, قالالىق جەردە جىلى كەڭسەلەردە قىزمەت ىستەۋدى ارماندايتىن جاسوسپىرىمدەردىڭ «بەتىن بەرى قاراتۋ ءۇشىن» ءبىلىم گرانتتارى دا كوبەيدى. ستيپەندياسى دا ستۋدەنت ءۇشىن قالتانى قاناعاتتاندىرارلىق.
بىراق ءالى دە اۋىل شارۋاشىلىعى سالاسىن تاڭدايتىندار از. كەڭشاردان قالعان كادرلار قارتايدى. ءتىپتى قالمادى. سۋ شارۋاشىلىعىنىڭ ماماندارى «تاپشى». بىلتىر, بيىل وبلىستىڭ كەيبىر اۋداندارى مەن اۋىلدارىن سۋ شايعانىن ەسەپكە الساق, گيدروتەحنيكتەردىڭ دە كەرەكتىگى ءبىلىنىپ قالدى.
جول سالاتىن جاستار دا از. سوندىقتان جىل سايىن جول جاڭارتقانىمىزبەن, ساپاسىزدىعىنان توزۋ جىلدامدىعى دا جەدەلدەپ بارادى.
قازىر قاي ماسەلە دە ەڭ ءبىرىنشى, قارجىعا تاۋەلدى. بىلىكتى مامان بولعانىڭمەن, قاراجاتىڭ بولماسا, ەشتەڭە جاساي المايسىڭ. الايدا قارجى قۇيىلىپ وتىرعان سالادا مامان جوق.
ال مامان قايدان شىعادى؟ ارينە, بۇگىن-ەرتەڭ مەكتەپ بىتىرۋشىلەردىڭ اراسىنان. قازىرگى ەڭ سۇرانىسقا يە ماماندىقتاردى تاعى ءبىر سانامالاپ شىعايىق.
2030 جىلعا دەيىن سۇرانىسقا يە توپ-25 ماماندىق انىقتالدى
ەڭبەك رەسۋرستارىن دامىتۋ ورتالىعىنىڭ ساراپشىلارى كادرلارعا قاجەتتىلىكتىڭ 2024-2030 جىلدارعا ارنالعان ورتا مەرزىمدى بولجامىن جاسادى, ونىڭ شەڭبەرىندە تاياۋداعى جىلدارى نەعۇرلىم تالاپ ەتىلەتىن ماماندىقتاردىڭ توپ-25 توبى ايقىندالدى.
توپ سۇرانىسقا يە ماماندىقتار:
ەسەپشىلەر – 93 مىڭ ادام;
كۇزەتشىلەر, ينكاسساتورلار جانە سوعان بايلانىستى كاسىپتەر – 77 مىڭ ادام;
دۇكەن ساتۋشىلارى مەن ولاردىڭ كومەكشىلەرى – 77 مىڭ ادام;
جۇرگىزۋشىلەر مەن اۆتوكولىك جۇرگىزۋشىلەرى – 44 مىڭ ادام;
الەۋمەتتىك عىلىمدار بويىنشا ورتا مەكتەپ مۇعالىمدەرى – 35 مىڭ ادام;
كۇتىم بويىنشا ورتاشا مەديتسينالىق پەرسونال – 33 مىڭ ادام;
مەكتەپكە دەيىنگى ءبىلىم بەرۋدەگى تاربيەشىلەر – 32 مىڭ ادام;
جاراتىلىستانۋ عىلىمدارى بويىنشا ورتا مەكتەپ مۇعالىمدەرى – 31 مىڭ ادام;
كەڭسە قىزمەتكەرلەرى (جالپى بەيىنى) – 30 مىڭ ادام;
باستاۋىش سىنىپ مۇعالىمدەرى – 26 مىڭ ادام;
مەكەمەلەردىڭ, ۇيىمدار مەن كاسىپورىنداردىڭ ءبىرىنشى باسشىلارى – 24 مىڭ ادام;
جىلجىمايتىن مۇلىكپەن جانە باسقا مۇلىكپەن وپەراتسيالار جونىندەگى اگەنتتەر – 24 مىڭ ادام;
جۇك كولىگىنىڭ جۇرگىزۋشىلەرى – 24 مىڭ ادام;
تاكسي جۇرگىزۋشىلەرى – 19 مىڭ ادام;
اسپازدار – 19 مىڭ ادام;
دانەكەرلەۋشىلەر – 17 مىڭ ادام;
فاستفۋدتان باسقا تەز تاماقتانۋ مەكەمەلەرىندەگى اسپازدار – 17 مىڭ ادام;
باسقا ورتا مەكتەپ مۇعالىمدەرى – 16 مىڭ ادام;
قۇرىلىس بولىمشەلەرىنىڭ باسشىلارى – 15 مىڭ ادام;
شاشتارازدار – 13 مىڭ ادام;
قۇرىلىسشىلار-مونتاجشىلار, قۇرىلىسشىلار-ارلەۋشىلەر, سۋرەتشىلەر ۇستىندەگى بريگاديرلەر – 13 مىڭ ادام;
سانتەحنيكتەر – 13 مىڭ ادام;
ماتەماتيكا عىلىمدارى بويىنشا ورتا مەكتەپ مۇعالىمدەرى – 12 مىڭ ادام;
ارالاس ءونىم وندىرەتىن فەرمەرلەر مەن جۇمىسشىلار – 12 مىڭ ادام;
اۆتوبۋس جۇرگىزۋشىلەرى – 12 مىڭ ادام.
P.S: جاقسى مامان تەك استانا مەن الماتىدا نەمەسە شەتەلدە وقيدى دەگەن قاساڭ ستەرەوتيپتەن ارىلۋ قاجەت سەكىلدى. قاراپايىم ماماندىقتاردىڭ قاي جەردە دە پىسى باسىم, ءباسى جوعارى تۇرسا دەيمىز. بولاشاق مەحانيزاتورلار مەن مالشى ماماندارىن شەتەلگە ءىس-تاجىريبەدەن وتكىزۋگە, دەمالۋعا, تاعى باسقا دا سەبەپتەرمەن جىلىنا ءبىر رەت شىعارىپ تۇرۋ تۇراقتى تۇردە ۇيىمداستىرىلسا. سول كەزدە عانا جاستاردىڭ ىنتاسى ارتىپ, قىزىعۋشىلىعى ويانادى. شىنىندا دا جۇرتتىڭ بالاسى قۇساپ جوعارى وقۋ ورنىنا تۇسە الماسا دا, اۋىلداعى كوللەدجدە ءبىلىم العان بالاڭىز نەمەسە قىزىڭىز شەتەل كورىپ, كەز كەلگەن جەردە قۇرمەتكە يە بولۋىن كىم قالامايدى دەيسىز؟!
