وتان الدىنداعى بورىشىن وتەۋگە اسكەر قاتارىنا الىنۋ ءۇشىن دە مىقتى دەنساۋلىق كەرەك. كوزى دۇرىس كورمەسە, قۇلاعى ءجوندى ەستىمەسە, مايتابان اياق بولسا دا جارامسىز دەپ تانىلىپ, ساپ تۇزەپ, سارباز بولۋ مۇمكىندىگىنەن ايىرىلادى. سونداي ورىمدەي جاستاردى جىل سايىن اسكەرگە شاقىرۋ كەزىندە مەديتسينا تەكسەرۋىنەن وتكىزەتىن ماماننىڭ ءبىرى – №3 ەمحانانىڭ لور دارىگەرى ورازالى راحيموۆ.
اتالعان ەمحاناعا قاراستى ەسىل اۋداندىق اسكەرگە شاقىرۋ مەديتسينا كوميسسياسىنىڭ توراعاسى ورازالى ساپكەنۇلى زەينەت جاسىنان اسىپ كەتسە دە, سپورتتىڭ ارقاسىندا ساقتاعان مىقتى دەنساۋلىعىنىڭ كۇشىمەن, بىلىگى مەن مول تاجىريبەسى باعالانىپ, ءالى دە قىزمەتىن جالعاستىرۋدا. 40 جىلعا جۋىق تاجىريبەسى بار دارىگەر 1996 جىلدان بەرى وسى اسكەرگە شاقىرۋ كوميسسياسىندا ەڭبەك ەتەدى.
– قازىر اسكەرگە شاقىرىلاتىن جاستاردىڭ اراسىندا كوز اۋرۋلارى كوپ كەزدەسەدى. ارينە, بۇل نەدەن ەكەنى بارىمىزگە بەلگىلى. بالا كەزدەن شۇقشيىپ ۇيالى تەلەفون قاراپ, كوزىن قالدىرعان. ميوپيا بار كوبىندە, ياعني الىستان كورۋى ناشار. حيرۋرگيا جاعىنان مايتاباندار كوپ كەزدەسەدى, ومىرتقانىڭ قيسايۋى, قان تامىرلارى اۋرۋلارى, سەمىرىپ كەتۋ, ەندوكرينولوگيا اۋرۋلارى دا بارشىلىق. دۇرىس تاماقتانباي, كوشەدەن كولا ءىشىپ, فاستفۋد جەي بەرگەننەن دە وسىنداي اۋرۋلار پايدا بولادى. سونىڭ ءبارىن تەكسەرىپ, ساۋ بالالاردى اسكەرگە اتتاندىرامىز. اسكەري كوميسسارياتتىڭ تەكسەرۋ ءۇشىن كەرەكتى جابدىقتارى تۇگەل. ولارمەن قويان-قولتىق جۇمىس ىستەيمىز. شاقىرۋشىلاردى قابىلداۋ ۋاقىتى جۇمىس كۇندەرى تاڭەرتەڭگى ساعات 9:00-دەن تۇسكى 13:00-گە دەيىن سوزىلادى. كۇنىنە 25-30 ادام قارايمىز. كوميسسيا قۇرامى 14 ادامنان تۇرادى. شاقىرۋشىلار قان مەن نەسەپ تالداۋى, فليۋوروگرامما, ەكگ, ءىش قۇرىلىس اعزالارى بويىنشا ۋزي-دەن وتەدى. انتروپومەتريا كابينەتىنەن باستاپ 9 دارىگەردىڭ تەكسەرۋىنەن ءوتىپ, سوڭىندا ماعان كەلەدى. مەن بارلىق قۇجاتىن, ءار دارىگەردىڭ ساراپتاماسىن تەكسەرگەننەن كەيىن قورىتىندىسىن, ياعني جارامدى نەمەسە جارامسىز ەكەنىن جازىپ, قول قويامىن, – دەيدى دارىگەر.
دارىگەردىڭ ايتۋىنشا, اسكەرگە شاقىرىلاتىن بولاشاق ساربازداردىڭ بويى 155 سم-دەن تومەن بولماۋى كەرەك, ال سالماعى بويىمەن سايكەس كەلۋى قاجەت, ياعني دەنە سالماعىنىڭ يندەكسى ارقىلى انىقتالادى, بۇل يندەكس 18,5-كە تەڭ. اسكەري كوميسسيا تەكسەرۋىنەن مەديتسينا ۋنيۆەرسيتەتىن ءبىتىرىپ, اسكەري بيلەت الايىن دەپ جۇرگەن جاستار دا وتەدى. لور دارىگەر بۇرىنعىداي ەمەس, سوڭعى 10 جىلدا گايموريت, وتيت, قۇلاق پەردەسىنىڭ تەسىلۋى سياقتى اۋرۋلار ازايعانىن ايتادى. بۇعان مەديتسينانىڭ دامىپ, يننوۆاتسيالىق اپپاراتتاردىڭ, ءتۇرلى ساپالى ءدارى-دارمەكتىڭ شىعۋى سەبەپ بولعان. قازىر مۇنداي اۋرۋلار ەرتە ەمدەلىپ, سوزىلمالى تۇرىنە اۋىسپايدى.
قورعالجىن وڭىرىندە تۋىپ, بالا كەزىنەن سپورتتى سەرىك ەتكەن دارىگەر سونىڭ ارقاسىندا الپىستىڭ التاۋىنان اسسا دا, ءوزىن سەرگەك سەزىنەدى. كۇندە تابيعات اياسىندا جۇگىرىپ, ەلورداداعى «باتىر استانا» كومانداسىنىڭ قۇرامىندا شىنىعادى. جاقىندا ول وسى كوماندا اتىنان قاراعاندىدا شتانگا كوتەرۋدەن وتكەن جارىسقا قاتىسىپ, ءوز جاس شاماسى بويىنشا چەمپيون اتاندى. ەكى ۇل, ەكى قىزدىڭ اكەسى, التى نەمەرەسىنىڭ اتاسى بالالارىن دا سپورتقا باۋلىعان, جۇبايى دا دارىگەر. مەديتسينانى تاڭداعان اۋلەت «سپورت پەن سالاۋاتتى ءومىر سالتىن سەرىك ەتكەندەردىڭ جەڭىسى كوپ بولادى» دەيدى.
