ءماسليحاتتا دەپۋتات رەتىندەگى جۇمىسىمدا مەن, نەگىزىنەن, قالانىڭ الەۋمەتتىك دامۋىنا كوپ كۇش سالامىن. وعان بارلىق استانالىقتىڭ لايىقتى ءومىر ءسۇرۋىن قولداۋ ماسەلەلەرى, سونىڭ ىشىندە الەۋمەتتىك احۋالى تومەن وتباسىلاردىڭ جاعدايى, جايلىلىق پەن قاۋىپسىزدىك دەڭگەيىن قامتاماسىز ەتۋ بويىنشا جۇمىستار جاتادى.
مەن ءماسليحاتتىڭ الەۋمەتتىك-مادەني كوميسسياسى قۇرامىندامىن, بۇل جەردە ءبىز اپتا سايىن اتالعان ماسەلەلەردى قاراپ, قالا تۇرعىندارىمەن كەزدەسەمىز, اتقارۋشى ورگاندارعا بەرۋگە ۇسىنىستار ازىرلەيمىز. استانانىڭ باستى ەرەكشەلىگى – ونىڭ جىلدام قارقىنمەن ءوسىپ كەلە جاتقانى. رەسپۋبليكا بويىنشا كوشى-قون كورسەتكىشى ەڭ جوعارىسى – ەلوردا. قازىرگى تاڭدا قالا حالقىنىڭ سانى 1 ملن 450 مىڭ ادامعا جەتتى. جىل سايىن ەلىمىزدىڭ تۇكپىر-تۇكپىرىنەن قالاعا 50 مىڭعا جۋىق ادام وقۋعا, جۇمىس ىستەۋگە كوشىپ كەلەدى. كوشى-قوننىڭ مۇنداي قارقىنى قالانى جوسپارلاۋ جانە حالىقتى جايلى, قاۋىپسىز ومىرمەن قامتاماسىز ەتۋدە سىن-قاتەر تۋىنداتادى. سوندىقتان جۇمىستىڭ مىناداي باعىتتارى دەپۋتاتتار جۇمىسىندا باسىمدىققا يە. ءبىرىنشى ماسەلە – الەۋمەتتىك قامسىزداندىرۋ. بۇل رەتتە جۇمىسقا ورنالاستىرۋعا كومەك بەرۋ, جۇمىسسىزدار مەن ەڭبەك نارىعىندا جۇمىس ىستەمەيتىندەرگە جۇمىس تاۋىپ بەرۋ – وتە ماڭىزدى مىندەت. قازىر استانادا جۇمىسپەن قامتۋ ورگاندارىندا 4 مىڭ جۇمىسسىز ادام تىركەۋدە تۇر. ەكىنشى ماسەلە – باسپانامەن قامتاماسىز ەتۋ. بۇگىندە 50 مىڭعا جۋىق ادام قالادا ءۇي كەزەگىندە تىركەلگەن. بۇل ازاماتتار – قازىرگى كەزەڭدە تاماقتانۋ, باسپانالى بولۋ جانە باستاپقى مەملەكەتتىك قولداۋدى قاجەت ەتەتىن تۇرعىندار. ءۇشىنشى ماسەلە – الەۋمەتتىك ساقتاندىرۋمەن قامتاماسىز ەتۋ. بۇگىندە مەديتسينا ۇيىمدارىندا تىركەلمەگەن 250 مىڭ ادام بار. ولار وسى سەبەپتى تولىقتاي مەديتسينالىق كومەك الا المايدى, ولارعا تەك شۇعىل كومەك قانا قولجەتىمدى. حالىق سانى وسكەن سايىن ازاماتتاردى بازالىق قىزمەتتەر جانە باسقا دا يگىلىكتەرمەن قامتاماسىز ەتۋدى ۋاقىتىلى باقىلاپ, جۇمىسسىزدىق پەن كەدەيلىكتىڭ وسۋىنە جول بەرمەۋ كەرەك. ال وتباسىلار مەن بالالار تۋرالى ايتقاندا, مەكتەپتە ورىنمەن قامتۋ ماسەلەسى شىعادى. سوڭعى بىرنەشە جىلدا بۇل ماسەلە دەپۋتاتتاردىڭ ۇنەمى باقىلاۋىندا. ءدال قازىر دە بۇل ماسەلە وتكىر تۇر. وسى ماقساتتا الداعى جىلدارى 35 جاڭا مەكتەپ سالۋ كوزدەلۋدە.
2021 جىلدىڭ مامىر ايىنان باستاپ «دامۋ بالا» دەگەن وتە جاقسى باعدارلاما وتباسى بيۋدجەتىنە قوسىمشا جۇكتەمە تۇسىرمەي, بالالاردىڭ جان-جاقتى دامۋىن قامتاماسىز ەتەدى. بۇگىندە وسى باعدارلاما شەڭبەرىندە بالالار ۇيىرمەلەر مەن ءتۇرلى شىعارماشىلىق, سپورتتىق باعىتتاعى سەكتسيالارعا بارادى. بۇل باعدارلاما ۇدايى باقىلاۋدى جانە ۇسىنىلاتىن قىزمەتتەر ساپاسىن جاقسارتىپ وتىرۋدى قاجەت ەتەتىندىكتەن, ول دەپۋتاتتاردىڭ ۇنەمى قاداعالاۋىنا الىنعان.
جۇمىستىڭ كەلەسى باعىتى – «جايلى جانە قاۋىپسىز قالا». حالىق سانىنىڭ جىلدام ءوسۋى تۇرعىن ءۇي, جول, كوپىر سالۋ, قولدانىستاعى ينفراقۇرىلىمدى قايتا قۇرۋدى قاجەت ەتەدى. دەپۋتاتتار كورپۋسى قالانىڭ باس جوسپارىن, تۇرعىن ءۇي قورى رەنوۆاتسياسى باعدارلاماسىن جانە باسقا دا قالا كەڭىستىگىن دامىتۋ ماسەلەلەرىن قاراستىرادى. سونىمەن قاتار اپاتتى جانە ەسكى ۇيلەردى بۇزۋ, تۇرعىنداردى كوشىرۋ ماسەلەسى دە نازاردان تىس قالمايدى. سايلاۋشىلارىمىزدىڭ اتىنان شىعا وتىرىپ, ءبىز, قالانىڭ قارقىندى وسۋىنە قاراماستان, قالالىقتاردىڭ جايلى دا قاۋىپسىز جاعدايمەن قامتاماسىز ەتىلۋىنە بار جاعداي جاساۋعا ۇمتىلامىز.
جەكە ءوز باسىم حالىقتىڭ نەگىزگى قاجەتتىلىكتەرىن قامتاماسىز ەتۋ, مىندەتتى گۇلزارلار پەن پاركتەر سالۋ ىسىنە جەتەكشىلىك ەتەمىن. VI شاقىرىلىم كەزەڭىندە جۇزەگە اسقان پايدالى جوبانىڭ ءبىرى – ۇيلەرگە گاز تارتۋ. ماسەلەن, سارىارقا اۋدانىندا 5000 جەر ۇيگە گاز تارتىلدى. بۇگىندە بۇل تۇرعىنداردىڭ ارزان, قولجەتىمدى ءارى قورشاعان ورتاعا زيانى از وتىندى قولدانۋىنا مۇمكىندىك بەرەدى. سونداي-اق دەپۋتاتتار باستاماسىمەن ەنگەن «سەرگەك» جوباسىن اتاپ وتكىم كەلەدى.
ارينە, بۇل قىزمەتتىڭ دە ءوز قيىندىعى بولادى. بارلىق قولعا الىنعان جوبا ۇزاق ۋاقىتقا سوزىلاتىن تالقىلاۋ مەن ۇدايى جەتىلدىرۋدى قاجەت ەتەدى. وسى رەتتە مەنىڭ وتكەن شاقىرىلىمداردا دەپۋتات بولعان كەزدەگى جيناعان تاجىريبەم جوبالاردىڭ بولاشاعىن باعالاۋ جانە تالقىلاۋ كەزىندە ءبىراز سەپتىك ەتەدى. بىراق سوعان قاراماستان ءاربىر جاڭا جوبا سايىن قايتادان سوعان دەندەپ ەنىپ, مۇلدەم باسقا ماسەلەلەرمەن اينالىسۋعا تۋرا كەلەدى. دەپۋتاتتىق قىزمەت ءوزىڭنىڭ نەگىزگى جۇمىسىڭنان بولەك ىستەرگە قوسىمشا ۋاقىت پەن كۇش سالۋدى قاجەت ەتەدى. شىنىن ايتقاندا, وسى ءبىر ماڭىزدى مىندەتىمدى اتقارۋدا ماعان جاقىندارىم مەن تۋىستارىمنىڭ, ارىپتەستەرىمنىڭ تۇسىنىگى مەن قولداۋى قاتتى كومەكتەسەدى.
التىنشاش تابۋلدينا,
استانا قالالىق ءماسليحاتىنىڭ دەپۋتاتى,
№5 قالالىق ەمحانا ديرەكتورى
