استانا قالاسى ءماسليحاتىنىڭ دەلەگاتسياسى ماروككو كورولدىگىنە رەسمي ساپارمەن بارىپ كەلدى. ساپار بارىسىندا استانا مەن رابات قالالارى اراسىنداعى ىنتىماقتاستىق تۋرالى مەموراندۋمعا قول قويىلدى. استانا دەلەگاتسياسى رابات قالاسىنداعى كوممۋنالدىق قىزمەتپەن, كولىك ينفرا-قۇرىلىمىمەن تانىستى. ساپار اياسىندا بيزنەس جانە مادەني قارىم-قاتىناس جاعى دا تالقىلاندى. جاقىن ارادا بىرلەسكەن بيزنەس-فورۋم وتكىزۋ جانە راباتتا استانا قالاسىنىڭ مادەني كۇندەرىن وتكىزۋ كەلىسىلدى.
جول كارتاسىنىڭ جوسپارىنا قول قويدى
استانا مەن رابات اراسىنداعى ىنتىماقتاستىقتىڭ جول كارتاسىن جۇزەگە اسىرۋ جوسپارىنا رابات كوممۋنالدىق كەڭەسىنىڭ توراعاسى فاتيحا ءال-مۋدني ەلوردالىق دەلەگاتسيانىڭ ماروككو كورولدىگىنە رەسمي ساپارى بارىسىندا قول قويدى. بۇل تۋرالى ەرلان كاناليموۆ الەۋمەتتىك جەلىدەگى پاراقشاسىندا بىلاي دەپ جازدى: «2024-2027 جىلدارعا ارنالعان قۇجات ۋربانيستيكا, مادەني مۇرانى ساقتاۋ جانە كوبەيتۋ, ينۆەستيتسيا مەن تۋريزم, قورشاعان ورتانى قورعاۋ, مادەنيەت جانە تسيفرلاندىرۋ سالاسىنداعى ىنتىماقتاستىقتى كوزدەيدى. مىسالى, ماروككو تاراپىن استانانىڭ iKomek109 جۇيەسىن, سونداي-اق Birge پورتالىن قولدانىسقا ەنگىزۋ تاجىريبەسى قىزىقتىردى. وتكەن جىلى استانانىڭ 25 جىلدىق مەرەيتويىن مەرەكەلەۋ كۇندەرى, 10 ەلدەن 17 قالا باسشىسى قاتىسقان باۋىرلاس قالالاردىڭ جىل سايىنعى فورۋمى بارىسىندا رابات قالاسىنىڭ ءبىرىنشى ايەل مەرى اسماا رحلالۋمەن كەزدەستىك. ءبىز ىسكەرلىك اۋدانداردا تاجىريبە الماسۋ جانە وزگە دە ماسەلەلەردى تالقىلادىق. 2023 جىلدىڭ 3 شىلدەسىندە ەكى استانانىڭ باسشىلارى اراسىندا وسى سالالارداعى ىنتىماقتاستىق تۋرالى مەموراندۋمعا قول قويىلدى, ال ءبىزدىڭ قالالار باۋىرلاس بولدى».
راباتتا – استانانىڭ مادەني كۇندەرى
ەكى ەلدىڭ استانالارى اراسىنداعى ىنتىماقتاستىق تۋرالى مەموراندۋمعا قول قويىلعاننان كەيىن ەلوردالىق دەلەگاتسيا مۇشەلەرى ماروككوداعى «Friginvest» ينۆەستيتسيا اگەنتتىگىنىڭ جۇمىسىمەن تانىستى. «بۇل اگەنتتىك قازاقستاندىق «قازاقينۆەست» سياقتى ەلگە ينۆەستيتسيالار تارتۋمەن اينالىسادى. ماروككو – دامىعان مەملەكەت, ءۇش فرانتسۋز اۆتوزاۋىتىنىڭ وكىلدىكتەرى بار, سونداي-اق اۆياكونسترۋكتورلىق ازىرلەمەلەرمەن اينالىسادى (Airbus ءۇشىن قوسالقى بولشەكتەر شىعارادى). بۇل ەلدىڭ توقىما ونەركاسىبىنە توقتالاتىن بولساق, الەمدىك دەڭگەيدەگى كيىم برەندتەرىن وندىرەدى. ويتكەنى بۇل ەلدىڭ ەركىن ەكونوميكالىق ايماقتارى مەن تەحنوپاركتەرى بەلسەندى دامۋدا. سونىمەن قاتار ماروككونىڭ مۇحيت پەن ەۋروپاعا شىعۋعا مۇمكىندىگى بار, ال گيبرالتار بۇعازى ارقىلى يسپانياعا دەيىنگى قاشىقتىق شامامەن 14 شاقىرىمدى قۇرايدى. جاقىن ارادا ەلدەرىمىزدىڭ اراسىندا بىرلەسكەن بيزنەس-فورۋمدى وتكىزۋ جوسپارلانۋدا. ال بيىل قازان ايىندا راباتتا استانا قالاسىنىڭ مادەني كۇندەرى وتەدى» دەپ جازدى ە.كاناليموۆ الەۋمەتتىك جەلىدەگى پاراقشاسىندا.
ارزان تاكسيى بار ەل
ماروككودا ترامۆاي كولىگىن پايدالانۋ وتە جاقسى دامىعان. مىسالى, ەلدىڭ ەكى قالاسى – رابات پەن سالەنى بايلانىستىراتىن ترامۆاي كۇنىنە 150000 جولاۋشىنى تاسىمالدايدى ەكەن. ەرلان كاناليموۆ ماروككونىڭ قوعامدىق كولىگى تۋرالى قىزىقتى دا پايدالى اقپاراتتارمەن الەۋمەتتىك جەلىدەگى پاراقشاسىندا ءبولىستى. «جىلىنا 33 ميلليون ساپار, كۇنىنە 150 مىڭ جولاۋشى, 5300 تىكەلەي جانە جاناما جۇمىس ورىندارى, جوبانىڭ قۇنى شامامەن 60 ميلليون ەۋرونى قۇرايدى, ال بيلەتسىز جۇرەتىن جولاۋشىلاردىڭ ۇلەسى – نەبارى 0,46. كەلتىرىلىپ وتىرعان بۇل ساندار ماروككونىڭ ەكى قالاسى – رابات پەن سالەنى بايلانىستىراتىن ترامۆاي كولىگى تۋرالى. ترامۆاي دەپوسىنىڭ ۇزىندىعى – 1,7 جانە 2,4 شاقىرىم بولاتىن ەكى جەلى, جول ءجۇرۋ باعاسى – شامامەن 220 تەڭگە, بۇل رەتتە ترامۆايلار جىلىنا 33 ملن ساپاردى جۇزەگە اسىرادى, تاۋلىگىنە نەبارى 5 مينۋت ارالىقپەن 150 مىڭ جولاۋشىنى تاسىمالدايدى, بۇل سالادا 5,5 مىڭعا جۋىق ادام جۇمىسپەن قامتاماسىز ەتىلگەن» دەپ جازدى ءماسليحات توراعاسى.
ونىڭ ايتۋىنشا, رابات قالاسىندا 350-گە جۋىق قوعامدىق كولىك بار, سونداي-اق ارزان تاكسيلەر جولاۋشىلاردى تاسىمالدايدى. تولەم ۆاليداتسيا كومەگىمەن جۇزەگە اسادى. «ترامۆاي مەن اۆتوبۋستاردا باقىلاۋشى قىزمەتكەرلەر جۇمىس ىستەيدى, سول سەبەپتى بۇل ەلدە بيلەتسىز جۇرەتىن جولاۋشىلاردىڭ ۇلەسى تومەن. ەلوردادا جولاۋشىلاردىڭ 30 پايىزعا جۋىعى جول اقىسىن تولەمەيدى. بۇل ەلدە جۇزەگە اسىپ جاتقان جۇمىستار – ەلوردامىز ءۇشىن پايدالى تاجىريبە. ال ەكولوگيا تۇرعىسىنان ايتاتىن بولساق, ترامۆايلار قورشاعان ورتا ءۇشىن ءتيىمدى» دەپ ءتۇسىندىردى ە.كاناليموۆ.
بىزگە كەرەك تاجىريبە
رابات قالاسىندا ەلوردالىق ءماسليحات دەپۋتاتتارى كوممۋنالدىق قىزمەتتەردىڭ جۇمىسىن ۇيلەستىرەتىن, سول ارقىلى زور تابىسقا كەنەلىپ وتىرعان كومپانيانىڭ قىزمەتىمەن تانىستى. «بارلىق كوممۋنالدىق قىزمەت مەملەكەتتىك-جەكەمەنشىك ارىپتەستىك شەڭبەرىندە جۇمىس ىستەيدى جانە بارلىق شارت 20 جىل مەرزىمگە جاسالادى. ساپار بارىسىندا 3 جىل بويى جۇيەلى جۇمىس ىستەگەن قوقىس شىعاراتىن كومپانيامەن ىنتىماقتاستىق توقتاتىلدى. قىزمەت كورسەتۋ بويىنشا بارلىق ۇسىنىس (ينۆەستيتسيا ۇسىنىستارى) حالىقارالىق قوعامداستىقتا جاريالانادى. مىسالى, بۇل ەلدە تۇرعىن ءۇي-كوممۋنالدىق شارۋاشىلىعى سالاسىنا فرانتسۋز جانە يسپان كومپانيالارى قىزمەت كورسەتەدى. قوقىس شىعارىلعاننان كەيىن قالدىقتار مەن سۋلار تازارتىلادى جانە سۋارۋ ماقساتىندا قولدانىلادى. سونداي-اق كوممۋنالدىق قىزمەتتەر اگلومەراتسيادا جۇمىس ىستەيدى جانە جاقىن ماڭداعى ەلدى مەكەندەرگە قىزمەت كورسەتەدى. بۇكىل تۇرعىن ءۇي-كوممۋنالدىق شارۋاشىلىعى جۇيەسى تابىس تاۋىپ, بيۋدجەتكە ايتارلىقتاي قاراجات اكەلەدى. بۇل تاجىريبەنى جاقىن ارادا تالقىلايمىز» دەپ جازدى بۇل تۋرالى ە.كاناليموۆ الەۋمەتتىك جەلىدەگى پاراقشاسىندا.
