مەملەكەت باسشىسى قاسىم-جومارت توقاەۆتىڭ قازاقستان حالقى اسسامبلەياسىنىڭ «بىرلىك. جاسامپازدىق. ورلەۋ» اتتى ءحححىىى سەسسياسىندا سويلەگەن سوزىندە «تاسقىن باستالعاننان بەرى قازاقستان حالقى اسسامبلەياسى بەلسەندى ءارى ۇيلەسىمدى جۇمىس ىستەپ جاتىر. وعان بۇكىل ەل كۋا. جۇرتقا جان-جاقتى كومەك بەرۋ ءۇشىن دەرەۋ اسسامبلەيانىڭ رەسپۋبليكالىق جانە ايماقتىق شتابتارى قۇرىلدى. «جۇرەكتەن-جۇرەككە» دەگەن اۋقىمدى اكتسيا جۇرگىزىلىپ جاتىر. اپات ايماقتارىنا 1500 توننادان استام ازىق-تۇلىك جانە ەڭ قاجەتتى تاۋارلار جولداندى. ونىڭ جالپى سوماسى شامامەن 770 ميلليون تەڭگە بولدى. سۋ تاسقىنىمەن كۇرەسكە ەتنومادەني بىرلەستىكتەردىڭ 12 مىڭعا جۋىق وكىلى قوسىلدى. ولار قايىرىمدىلىق جانە گۋمانيتارلىق كومەك جيناۋعا جۇمىلدى. سونداي-اق جۇرتتى قاتەردەن حاباردار ەتۋگە جانە قاۋىپسىز جەرگە كوشىرۋگە اتسالىستى. مۇنىڭ ءبارى – ءوزارا جاناشىر جانە تىلەۋلەس بولۋدىڭ ايقىن كورىنىسى» دەپ اتاپ ءوتتى.
راسىندا, حالقىمىزدىڭ باسىنا اۋىر سىناق ءتۇستى. ەلىمىزدىڭ جارتىسىنا جۋىق اۋماعىن تاسقىن سۋ باسىپ قالدى. حالىقتىڭ تۇتاستىعى, مىزعىماس بىرلىگى سىن ساعاتتا سىنالدى. پرەزيدەنت وسى جيىندا: «قۇتقارۋشىلار, ۆولونتەرلەر, مەملەكەتتىك قىزمەتشىلەر, ساربازدار, ءتارتىپ ساقشىلارى, قوعام بەلسەندىلەرى, بيزنەس وكىلدەرى جانە جاستار – ءبارى بىرگە ءجۇر. ورتاق ىستەن ەشكىم شەت قالعان جوق. بۇكىل ايماقتا قوعامنىڭ بارلىق وكىلى ءبىر كىسىدەي جۇمىلدى. وتانداستارىمىز زارداپ شەككەن جاندارعا جاپپاي قول ۇشىن سوزدى. ءبىر-بىرىنە شىنايى جاناشىر بولدى. مەن قارعىن سۋمەن كۇرەسۋگە زور ۇلەس قوسقان ناعىز وتانشىل ازاماتتارعا شەكسىز ريزامىن. ءبىز سىن ساعاتتا جۇرت بولىپ جۇمىلدىق. ۇكىمەت, مەملەكەتتىك ورگاندار, قۇزىرلى مەكەمەلەر جانە ەرىكتىلەر بىرلەسە جۇمىس ىستەدى. سونىڭ ارقاسىندا 119 مىڭنان استام ادام دەر كەزىندە قاۋىپسىز جەرگە كوشىرىلدى. ونىڭ 45 مىڭعا جۋىعى – بالالار. ەڭ باستىسى, ءبىز ادام ءومىرىن بارىنشا ساقتاپ قالدىق» دەدى.
وڭىرلەردە سۋ تاسقىنى باستالىسىمەن-اق ءبىز, اسسامبلەيا مۇشەلەرى, الدىڭعى شەپتە جۇردىك. گۋمانيتارلىق كومەك كورسەتۋ ءۇشىن رەسپۋبليكالىق جانە وڭىرلىك شتابتار قۇرىلىپ, تاۋلىك بويى جۇمىس ءجۇرىپ جاتىر. رەسپۋبليكالىق شتابتىڭ جەتەكشىسى رەتىندە سۋ باسقان بارلىق وڭىرگە بىرنەشە رەت بارىپ, تۇرعىندارمەن جۇزبە-ءجۇز كەزدەسىپ, تىلدەسىپ, نە كەرەك ەكەنىن ناقتىلادىق. شتاب وكىلدەرىمەن بىرگە زارداپ شەككەن ازاماتتار مەن قۇتقارۋشىلاردى ىستىق تاماقپەن, كيىم-كەشەكپەن, توسەك-ورىندارمەن جانە باسقا دا قاجەتتى قۇرال-جابدىقتارمەن قامتاماسىز ەتىپ كەلەمىز.
مەملەكەت باسشىسى وسىدان ءبىر جىل بۇرىن قازاقستان حالقى اسسامبلەياسى توراعاسىنىڭ ورىنباسارى رەتىندە ماعان سەنىم ارتىپ, وسى قىزمەتكە تاعايىندالعان كەزدەن باستاپ ەلىمىزدىڭ بىرقاتار ءوڭىرىن, اتاپ ايتقاندا, تۇركىستان, جامبىل, الماتى, قاراعاندى, اقمولا, شىعىس قازاقستان, جەتىسۋ, سولتۇستىك قازاقستان, اتىراۋ وبلىستارى, شىمكەنت جانە الماتى قالالارى, سونداي-اق اتالعان وڭىرلەردەگى اۋدان ورتالىقتارى مەن اۋىلداردى ارالاپ شىقتىق. وڭىرلەردەگى حالىقپەن بەتپە-بەت كەزدەسىپ, جەرگىلىكتى ماڭىزدى ماسەلەلەردى تالقىلادىق. كەزدەسۋلەر كەزىندە مەملەكەت باسشىسىنىڭ باستامالارى مەن تاپسىرمالارىنىڭ ورىندالۋى تۋرالى ءتۇسىندىرۋ جۇمىسىن, ورتاق ديالوگ جۇرگىزدىك. جالپى العاندا, وڭىرلەردە, اسىرەسە ەتنوستار كوپ شوعىرلانعان اۋدانداردا جاعداي تۇراقتى ءارى بارلىعى تاتۋ-ءتاتتى كۇن كەشىپ جاتقانىنا كوز جەتكىزدىك. بۇل دەگەنىمىز, ارينە, ەڭ الدىمەن, مەملەكەتتىك ساياسات دۇرىس باعىتتا ءجۇرىپ جاتىر دەگەندى بىلدىرەدى.
«جۇمىلا كوتەرگەن جۇك جەڭىل» دەگەندەي, بۇگىندە اسسامبلەيا مەتسەناتتارى زارداپ شەككەن ەلدى مەكەندەردى قالپىنا كەلتىرۋ جۇمىسىنا كىرىسىپ كەتتى. قازىردىڭ وزىندە باتىس قازاقستان وبلىسىنا 14 ۆاگون تسەمەنت جونەلتىلدى جانە 5 جاڭا ءۇي تۇرعىزىپ بەرۋ جۇمىسى باستالدى. ارينە, مەملەكەت تاراپىنان دا كومەك كورسەتىلىپ جاتىر. ەڭ باستىسى – وڭىرلەردەگى حالقىمىزدىڭ ۇيىمشىلدىعى مەن ءاۋىزبىرشىلىگى. ازاماتتاردىڭ تۋعان جەرگە دەگەن شەكسىز سۇيىسپەنشىلىگى ولاردىڭ اپاتپەن كۇندىز-ءتۇنى تىنىمسىز كۇرەسۋىنەن انىق بايقالادى. بۇل – ەشقاشان سارقىلمايتىن كۇش. سۋ تاسقىنىنان زارداپ شەككەن بىردە-ءبىر ازامات مەملەكەتتىڭ كومەگىنەن تىس قالمايتىنى انىق. ولارعا ۇيمەن بىرگە الەۋمەتتىك نىسانداردى سالۋ ماسەلەسى دە تۇر. بۇل – وتە اۋقىمدى جۇمىس.
اسسامبلەيا جانە قايىرىمدىلىق – ەگىز ۇعىم. قايىرىمدىلىق – ءبىزدىڭ بىرلىگىمىزدى بەكەمدەيتىن ءىس. بىلتىردىڭ وزىندە ءبىز ءبىر عانا «مەكتەپكە جول» اكتسياسى كەزىندە 7 مىڭعا جۋىق وقۋشىعا قولداۋ كورسەتتىك. مەملەكەت ءاردايىم كاسىپكەرلىكتى جان-جاقتى قولداپ كەلەدى. پرەزيدەنتىمىز قۇرىلتايدا ەلگە جاناشىر بارشا ىسكەر ازاماتتى قوعامعا پايدالى الەۋمەتتىك جوبالارعا كوبىرەك ءمان بەرۋگە شاقىردى. مۇنى ءبىز, قازاقستان حالقى اسسامبلەياسىنىڭ مۇشەلەرى, وڭىرلەردەگى ەلدى مەكەندەردە ىسكە اسىرىپ كەلەمىز. ماسەلەن, بىلتىر اقمولا وبلىسىنا قاراستى قابانباي باتىر اۋىلى جانە سولتۇستىك قازاقستان وبلىسى پەتروپاۆل قالاسىنا رەسپۋبليكالىق تاجىك ەتنومادەني ورتالىعىنىڭ مەتسەناتى, قازاقستان حالقى اسسامبلەياسىنىڭ مۇشەسى مانسۇر مازبۋتۇلى 17 مىڭنان استام حالىقتىڭ مۇڭ-مۇقتاجىن ءوز كوزىمەن كورىپ, قوقىس پوليگونىنا اينالعان جەردى ۇتىمدى پايدالانۋ ماقساتىندا جوبا قۇنى 8 ملن بولاتىن بالالارعا ارنالعان سپورت الاڭىن سالىپ بەردى. سونداي-اق ءبىزدىڭ مەتسەناتتار تۇركىستان وبلىسىندا سپورت كەشەنىن جانە قازاق تىلىندە ءۇش بىردەي بالاباقشانى پايدالانۋعا بەردى.
بيىلعى العىس ايتۋ كۇنى جاريالانعان رەسپۋبليكالىق «قايىرىمدىلىق كەرۋەنى» اكتسياسى اياسىندا قولداۋدى قاجەت ەتەتىن قۋىقتاي عانا ءبىر بولمەدە 8 بالاسىمەن جانە اسىراۋشىسى جوق 5 بالاسى بار ەكى وتباسىنا قولىمدا بار مۇمكىندىكتى پايدالانا وتىرىپ, ەلوردا تورىنەن ءوز اتىمنان 2 جاڭا پاتەردىڭ كىلتىن تابىستادىم. وسى اكتسيانى ءارى قاراي بەلگىلى مەتسەناتىمىز, «Cotton ماقتا» سەرىكتەستىگىنىڭ ديرەكتورى ابدۋحاشيم بوەۆ قاسيەتتى رامازان ايىندا ماقتاارال اۋدانىنداعى پاتەر جالداپ جۇرگەن كوپبالالى ەكى وتباسىن باسپانامەن قامتاماسىز ەتىپ, 200 وتباسىعا ازىق-تۇلىك تاراتىپ شىقتى. ارينە, وسىنداي يگى ىستەرگە كوپتەگەن ەتنوس وكىلدەرى بەلسەنە اتسالىسىپ جاتىر. ويتكەنى قازاقستان – بارشامىزدىڭ ورتاق وتانىمىز. وتانىمىزدىڭ ودان ءارى دامۋىنا, اسىرەسە وڭىرلەردەگى ەلدى مەكەندەردىڭ ءوسىپ-وركەندەۋىنە قولدان كەلگەنشە اتقاراتىن جۇمىستارىمىزدىڭ اياسىن كەڭەيتە بەرەمىز. حالقىمىزدىڭ «ىرىس الدى – ىنتىماق» دەگەن قاناتتى سوزىندە ۇلكەن ءمان بار. دوستىق پەن تاتۋلىقتىڭ تەمىرقازىعىنداي بولعان ەل بىرلىگى – ەڭ باستى قۇندىلىعىمىز, باعا جەتپەس بايلىعىمىز. وسىلايشا ەلىمىزدىڭ اۋىزبىرشىلىگى ارتىپ, ءال-اۋقاتى جاقسارسا, وزگەلەرمەن تەرەزەمىز تەڭ, كەرەگەمىز كەڭ ەل رەتىندە ودان ءارى دامي بەرەتىنىمىز انىق. ودان بولەك, مەنىڭ قازاقستانداعى ەتنوستارعا ۇندەۋىم – وسى ەلدە تۋساڭىز دا, كەلىپ تۇرساڭىز دا, مەملەكەتتىك ءتىلدى قۇرمەتتەۋ ازاماتتىق پارىزىڭىز ەكەنىن ۇمىتپاعانىڭىز ابزال.
مەملەكەت باسشىسى مەنى قازاقستان حالقى اسسامبلەياسىنا ورىنباسار ەتىپ تاعايىنداعانىنا ريزاشىلىعىمدى بىلدىرەمىن. بۇل ماعان جۇكتەلگەن زور جاۋاپكەرشىلىك ەكەنىن تۇسىنەمىن. سەبەبى ەلىمىزدەگى كوپتەگەن ۇلىس پەن ەتنوستىڭ ءوزارا تاتۋلىعى مەن دوستىعىن, مەملەكەتىمىزدىڭ تۇتاستىعىن ساقتاۋداعى ساياساتىنا اتسالىسۋ – ماڭىزدى ءىس. ەلىمىز بەن جەرىمىز ءۇشىن ارقاشان ادال بولىپ, حالقىمىزعا قىزمەت ەتۋگە قاشاندا دايىنمىن. بيىلعى «بىرلىك. جاسامپازدىق. ورلەۋ» اتتى سەسسيا تاقىرىبىنىڭ ءوزى تاۋەلسىز مەملەكەتىمىزدىڭ تۇتاستىعى مەن بىرلىگى ءۇشىن بارشا قاۋىمدى مەملەكەتتىك ساياساتتى قولداپ, قازاقستان دەگەن الەم تانىپ كەلە جاتقان ەگەمەن ەلدىڭ دامۋىنا جان-جاقتى اتسالىسۋدا.
ءبىز, اسسامبلەيا مەتسەناتتارى مەن ەلگە جاناشىر ازاماتتار, بۇل جۇمىستاردى ودان ءارى جالعاستىرا بەرەمىز. بىرلىگىمىز بەكەم, ەڭبەگىمىز جەمىستى بولسىن!
اكبارجون يسمايلوۆ, تاجىك ەتنومادەني
ورتالىعىنىڭ توراعاسى, مەتسەنات
