رەسپۋبليكالىق «تازا قازاقستان» ەكولوگيا ناۋقانى اياسىندا استانادا ۆانداليزمگە قارسى باعىتتالعان «توقتا, ۆاندال!» اكتسياسى ءوتتى. ءىس-شارانىڭ وتۋىنە سارىارقا اۋدانى اكىمدىگى, قالالىق پوليتسيا دەپارتامەنتىنىڭ ەسىرتكى قىلمىسىنا قارسى كۇرەس باسقارماسى, ەلوردالىق ءماسليحات دەپۋتاتتارى, ۇكىمەتتىك ەمەس ۇيىم وكىلدەرى جانە «استانا جاستارى» جاستار رەسۋرستىق ورتالىعىنىڭ ۆولونتەرلەرى ۇيىتقى بولدى.
اكتسيا قالا مۇلكىن قورعاۋعا, قوعامدىق ورىنداردا ءتارتىپتى ساقتاۋعا باعىتتالعان. بوتەننىڭ مۇلكىن قاساقانا ءبۇلدىرۋ اكىمشىلىك جاۋاپكەرشىلىككە اكەپ سوعادى. ۆانداليزم جاساعاندار جازاسىز قالمايدى.
«ۆانداليزم قوعام مۇلكىنە زيان تيگىزۋ عانا ەمەس, تۇرعىنداردىڭ قاۋىپسىزدىگى مەن جايلىلىعىنا قاۋىپ توندىرەتىنىن ەسكەرگەن ءجون. بۇل اكتسيا قوعامدىق مۇلىكتىڭ بۇلىنۋىنە جول بەرمەۋدى, سونداي-اق ازماتتاردىڭ ساناسى مەن جاۋاپكەرشىلىگىن ارتتىرۋدى ناسيحاتتايدى. جالپى ءاربىر ازامات قالا تازالىعىنا نەمقۇرايدى قاراماۋى قاجەت. اسىرەسە جاستار ۆانداليزم ارەكەتىنىڭ الدىن الىپ, تازا ءارى قاۋىپسىز ورتا قالىپتاستىرۋعا اتسالىسقانى دۇرىس» دەدى ەلوردا جاستار ساياساتى باسقارماسىنىڭ باسشىسى سامات يبراەۆ.
«توقتا, ۆاندال!» اكتسياسى قالادا ءداستۇرلى تۇردە ۆولونتەرلەردىڭ قاتىسۋىمەن وتەدى. ونىڭ اياسىندا قوعامدىق ورىنداردا رەيد وتەدى. بۇل تۋرالى استانا قالاسى پوليتسيا دەپارتامەنتى ەسىرتكى قىلمىسىنا قارسى كۇرەس باسقارماسىنىڭ ءبولىم باستىعى, پوليتسيا پودپولكوۆنيگى سەرگەي يلينىح كەڭىرەك تارقاتتى.
«ساياباقتار, اۋلالار, كوشەلەردەگى مۇلىكتى بۇلدىرەتىن بۇزاقىلىق ارەكەتتەردىڭ الدىن الۋ بويىنشا تۇراقتى نەگىزدە باس قالادا رەيد ءوتىپ, الدىن الۋ بويىنشا جۇمىس جۇرەدى. ونىڭ بارىسىندا ەسىرتكىنى جاسىرىن, بۇركەمەلەپ ناسيحاتتاۋعا تىرىساتىن كوشە جارنامالارى جويىلادى. ناشاقورلاردىڭ كوبەيە تۇسۋىنە ەسىرتكىنى تاراتۋشى مەن ساتۋشىلاردىڭ, ناسيحاتتاۋشىلاردىڭ ۇلەسى مول. ولار بيلبورد, پيلون سياقتى جارناما قۇرىلعىلارىن دا, گراففيتي سىزبالاردى دا استىرتىن پايدالانىپ, «ۇن, «تۇز», «كىر جۋ ۇنتاعىن» ساتامىز» دەپ جالعان جارناما بەرەتىنى انىقتالىپ وتىر. اتالمىش ارەكەتتەر ءۇشىن جارناما بەرۋشىلەر 2019 جىلدان بەرى قىلمىستىق كودەكستىڭ 299-1-بابى بويىنشا 3 جىلدان 6 جىلعا دەيىن باس بوستاندىعىنان ايىرىلادى. سوڭعى كەزدەرى وعان جاسوپىرىمدەر تاراپىنان قىزىعۋشىلىق بايقالادى. سوندىقتان وسىنداي رەيد نە اكتسيا بارىسىندا جاستارمەن ءتۇسىندىرۋ جۇمىسى جۇرگىزىلەدى. ولارعا ەسىرتكى قىلمىسى ءۇشىن قىلمىستىق جاۋاپكەرشىلىك 14 جاستان باستالاتىنىن ەسكەرتەمىز» دەدى س.يلينىح.
«توقتا, ۆاندال!» اكتسياسى الداعى ۋاقىتتا قالانىڭ باسقا دا اۋداندارىندا وتەدى دەپ جوسپارلانعان. وعان مەكتەپ وقۋشىلارى, ستۋدەنتتەر جانە قالانىڭ وزگە بەلسەندى جاستارى تارتىلادى.
