ۇلتتىق كينونى قولداۋ ورتالىعى مەملەكەتتىك قولداۋعا ۇمىتكەر كينوجوبالاردى ىرىكتەۋدىڭ ءبىرىنشى كەزەڭىنە ستسەناريلەر مەن ستسەناري جوسپارلارىن قابىلداۋدىڭ اياقتالعانىن حابارلايدى. ەلەكتروندى تۇردە تىركەلگەن ستسەناريلەر مەن ستسەناري جوسپارلارىنىڭ جالپى سانى – 465.
«2024 جىلى انيماتسيالىق, دەرەكتى جانە ويىن فيلمدەرىنىڭ ءارتۇرلى ساناتتارى بويىنشا ءبىرشاما ءوتىنىم كەلىپ ءتۇستى. انيماتسيا سالاسىندا 44 ءوتىنىم بەرىلگەن, ونىڭ 37-ءسى ساراپتامالىق كەڭەستىڭ قاراۋىنا جىبەرىلدى, ال 7-ەۋى قابىلدانبادى. دەرەكتى فيلمدەر ساناتىندا 70 ءوتىنىم بەرىلدى, ونىڭ 57-ءسى ساراپتاما كەڭەسىنە جىبەرىلدى, ال 13-ءى قابىلدانبادى. ويىن فيلمدەرىنە كەلەتىن بولساق, 351 ءوتىنىم ءتۇستى, ونىڭ 277-ءسى ساراپتاما كەڭەسىنىڭ قاراۋىنا بەرىلدى, ال 74-ءى قابىلدانبادى. وتىنىمدەردىڭ قابىلدانباۋ سەبەپتەرى: وتىنىمدەردىڭ ءبىر جوبا بويىنشا ءبىر كومپانيادان قايتا بەرىلۋى, ستسەناريلەر مەن ستسەناري جوسپارىنىڭ بولماۋى, كومپانيادان كونكۋرستىڭ ءبىر باعىتىنا ەكەۋدەن ارتىق ءوتىنىم ءتۇسۋى. قالعان وتىنىمدەر ساراپتاما كەڭەسىنىڭ قاراۋىنا جولداندى», – دەپ مالىمدەيدى ورتالىقتىڭ ءباسپاسوز قىزمەتى.
كونكۋرسقا قاتىسۋ ءۇشىن قۇجاتتاردى قابىلداۋ 12-18 ءساۋىر ارالىعىندا جۇرگىزىلدى. اتاپ ءوتۋ كەرەك, 10 ساۋىردە الماتىدا كينويندۋستريا وكىلدەرىمەن كەزدەسۋ ۇيىمداستىرىلدى, سونىمەن قاتار 8-18 ءساۋىر ارالىعىندا ءۇش باعىت بويىنشا كونسۋلتاتسيالىق قولداۋ شارالارى جۇرگىزىلدى. استانا جانە الماتى قالالارىنداعى ورتالىق كەڭسەسىندە جەكە كونسۋلتاتسيالار, تەلەفون قوڭىراۋلارى ارقىلى سۇراقتارعا جاۋاپ بەرىلدى, الەۋمەتتىك جەلىدە جاڭا ەرەجەگە, كونكۋرسقا قاتىستى قاجەتتى مالىمەتتەر جاريالاندى.
