ع.مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترى ءساۋىر ايىنىڭ 29-30 كۇندەرى استانا قالاسىنداعى م.گوركي اتىنداعى مەملەكەتتىك اكادەميالىق ورىس دراما تەاترى مەن جاستار تەاترىنا گاسترولدىك ساپارمەن كەلەدى.
ساف ونەرىمەن جاستاردىڭ جۇرەگىن جاۋلاپ, بالالاردىڭ بابىن تاۋىپ, ەرەسەكتەردى ەستەن كەتپەس اسەرگە بولەپ جۇرگەن تەاتر الماتىلىقتاردىڭ عانا ەمەس, ەل كورەرمەندەرىنىڭ كوزايىمىنا اينالىپ, قوشەمەتىنە بولەنىپ ءجۇر. قازاقستاننىڭ قالالارىن ارالاۋدى ماقسات تۇتقان تەاتر كوكتەمنىڭ كورىكتى كۇندەرىندە ەلىمىزدىڭ باسقا قالالارىنا گاسترولدىك ساپارىن باستادى.
الماتىلىق تەاتر ۇجىمى وتكەن ماۋسىمدا «سەزىم ساپارى» اتتى سپەكتاكل-تۋر اياسىندا «ماحاببات, قىزىق مول جىلدار» قويىلىمىنىڭ بىرنەشە كورسەتىلىمى استانادا انشلاگپەن وتكەنى ءمالىم. اراعا ءبىر جىل سالىپ, جاڭا ماۋسىمدا استانالىق كورەرمەننىڭ سۇراۋىمەن ەكىنشى مارتە قازاق ادەبيەتىنىڭ جاۋھار جازۋشىلارى, قارىمدى قالامگەرلەرى ءا.نۇرشايىقوۆتىڭ «ماحاببات, قىزىق مول جىلدار», م.اۋەزوۆتىڭ «قاراگوز», الەم ادەبيەتىنەن گ.لوركانىڭ «بەرناردا البانىڭ ءۇيى» شىعارمالارىن استانالىق ساحنادا كورەرمەنگە پاش ەتپەك. ونەر ۇجىمى سونداي-اق قاراعاندىلىق كورەرمەننىڭ ىستىق ىقىلاسى مەن سانسىز سۇراۋىن ەسكەرىپ, رەپەرتۋارداعى تاڭداۋلى تۋىندىلارمەن قاتار كىشكەنتاي كورەرمەندەرگە ارنالعان ا.سەنت-ەكزيۋپەريدىڭ «كىشكەنتاي حانزادانىڭ ورالۋى» ەرتەگىسىن ۇسىنادى.
سان جىلدار بويى كورەرمەننىڭ سۇيىكتى مەكەنىنە اينالا بىلگەن تۇعىرلى تەاتر سۇلۋ ونەردى سۇيەتىن وڭىرگە قازاق ادەبيەتى مەن الەم كلاسسيكاسىنىڭ وزىق ۇلگىلەرىن ۇسىنادى. 29-30 ءساۋىر كۇنى م.گوركي اتىنداعى مەملەكەتتىك اكادەميالىق ورىس دراما تەاترىندا ساعات 10:00, 11:00, 12:00-دە «كىشكەنتاي حانزادانىڭ ورالۋى» ەرتەگىسى ساحنالانسا, 29 ءساۋىر كۇنى 18:30-دا «قاراگوز», 30 ءساۋىر كۇنى 18:30-دا «بەرناردا البانىڭ ءۇيى» قويىلىمدارى كورەرمەنمەن قاۋىشاتىن بولادى. 29 ساۋىردە جاستار تەاترىنىڭ ساحناسىندا ساعات 15:00 جانە 19:00-دە «ماحاببات, قىزىق مول جىلدار», 30 ساۋىردە ساعات 12:00 جانە 17:00 دە «ماحاببات, قىزىق مول جىلدار» قويىلىمدارى كوپشىلىك نازارىنا ۇسىنىلادى. ادام جانىنىڭ نازىك يىرىمدەرىن, شىنايى سەزىمدەرىن كورسەتەتىن قويىلىمدارعا بيلەتتەر م.گوركي اتىنداعى مەملەكەتتىك اكادەميالىق ورىس دراما تەاترى مەن جاستار تەاترىنىڭ تيكەتون سايتىنان الۋعا بولادى, باعاسى دا قولجەتىمدى.
جاس وركەندى ونەرگە قاناتتاندىرىپ, ومىرگە قۇشتارلىعىن ارتتىرا تۇسەتىن تاربيە قۇرالى – تەاتر دەسەك, الماتىلىق حاس ونەر شەبەرلەرىنىڭ قويىلىمدارىن بارىپ كورگەن دۇرىس.
