كەشە ەلورداداعى قازاقستان رەسپۋبليكاسىنىڭ تۇڭعىش پرەزيدەنتى – ەلباسى كىتاپحاناسىندا «ازاماتتىق قوعام جانە مەملەكەت» اتتى تاقىرىپتا VIII قالالىق فورۋم ءوتتى. فورۋم جۇمىسىنا استانا قالاسىنىڭ اكىمى باقىت سۇلتانوۆ قاتىستى.
بۇل فورۋمدا مەملەكەتتىك ورگاندار مەن ۇكىمەتتىك ەمەس ۇيىمدار ءۇشىن ءتيىمدى سۇحبات الاڭى ءوربىپ, ازاماتتىق سەكتوردى دامىتۋدىڭ وزەكتى ماسەلەلەرى تالقىلاندى.
جيىندا قالا باسشىسى سەگىزىنشى رەت ءوتىپ وتىرعان فورۋمنىڭ ماڭىزىنا سالماق سالىپ سويلەدى.
– بۇل باسقوسۋدىڭ نەگىزگى ماقساتى ەلورداداعى ازاماتتىق قوعامدى دامىتۋ باعىتىندا اتقارىلعان جۇمىستاردى ورتاعا سالىپ, تالقىلاۋ بولماق. سونىمەن قاتار, ەلباسىمىزدىڭ قازاقستان حالقىنا جولداۋىندا ايتىلعان الەۋمەتتىك باستامالاردى ىسكە اسىرۋداعى بىرلەسكەن ءىس-قيمىلىمىزدىڭ نەگىزگى باسىمدىقتارىن ايقىنداۋ.
بۇگىندە ەلوردا اكىمدىگى مەن 30-دان استام ۇكىمەتتىك ەمەس ۇيىمدار بىرلەسىپ, 463 ميلليون تەڭگەگە 66 الەۋمەتتىك ماڭىزى بار جوبالاردى جۇزەگە اسىردى. مەملەكەتتىك باعدارلامالاردى ىسكە اسىرۋدا ۇكىمەتتىك ەمەس ۇيىمدار قوعامدىق پىكىردى ەسكەرە وتىرىپ, جۇمىس ىستەۋ مۇمكىندىگىن تۋعىزدى. مىسالى, «استانا – ادالدىق الاڭى» جوباسى اياسىندا ءبىلىم باسقارماسى مەن وعان قاراستى مەكەمەلەردىڭ قىزمەتىنە ۇەۇ وكىلدەرى مەن اتا-انالار قاۋىمداستىعى باقىلاۋ ءىس-شارالارىن قولعا الدى. سونداي-اق, «قارسى» جاستار ۇيىمىمەن جاستار اراسىنداعى سىبايلاس جەمقورلىققا قارسى تاربيە جۇمىستارى قولعا الىنىپ, مەكتەپتەردەگى كەلەڭسىز جاعدايلارعا بايلانىستى ساۋالناما ءجۇرگىزىلدى. قازىر قالامىزدا 80-گە جۋىق جاستار ۇيىمدارى تىركەلسە, سولاردىڭ 30-ى قالاداعى قوعامدىق-ساياسي, ءمادەني شارالارعا بەلسەندى اتسالىسادى. قىسقاسى, ۇكىمەتتىك ەمەس ۇيىمدار الەۋمەتتىك, ەكونوميكالىق, قۇقىقتىق مازمۇنداعى ماسەلەلەردى شەشۋدە مەملەكەتتىك ورگانداردىڭ سەنىمدى سەرىكتەسى ەكەنىن ايتقىم كەلەدى, – دەدى ەلوردا اكىمى.
قر قوعامدىق دامۋ ءمينيسترى دارحان كالەتاەۆ ءوز سوزىندە باس شاھاردا ازاماتتىق باستامالار ورتالىعىنىڭ قۇرىلىسى باستالعانىن جەتكىزدى. «قازىر الەۋمەتتىك كاسىپكەرلىكتى دامىتۋعا ارنالعان جوبالار قولعا الىندى. وسى ماقساتتا ارنايى سالا ماماندارىن شاقىرىپ كوۋچەر وقىتىلادى. جانە ەلىمىزدىڭ بارلىق ايماعىندا الەۋمەتتىك جوبالاردىڭ كارتالارى جاسالادى» دەدى مينيستر. سونىمەن قاتار, دارحان كالەتاەۆ الداعى 27-28 قاراشادا رەسپۋبليكالىق ازاماتتىق فورۋم وتەتىنىن حابارلادى. فورۋم بارىسىندا سۇحبات الاڭىندا 4 سەكتسيالىق شارا ۇيىمداستىرىلىپ, ۇكىمەتتىك ەمەس ۇيىمداردىڭ ەڭ ۇزدىك الەۋمەتتىك جوباسى ماراپاتتالدى.
