استانا كۇننەن كۇنگە كوركەيىپ, قالا تۇرعىندارى مەن قوناقتارىن قۋانىشقا بولەۋدە. ونى سالىنىپ جاتقان بيىك-بيىك عيماراتتاردان دا, ءاربىر ءۇيدىڭ اۋلاسىنان دا بايقاۋعا بولادى. ال وسى جازدا بىرقاتار وزگەرىسكە ۇشىراعانى – بالالار الاڭقايى.
انانىڭ كوڭىلى بالادا بولعانىمەن, بالانىڭ كوڭىلى قاشاندا دالادا. شىنىمەن دە, كۇننىڭ كوزى كۇلىمدەپ تۇرعاندا, قازىر بالاقايلاردىڭ اۋلاعا شىعىپ, ناعىز بوي جازاتىن مەزگىلى. سول سەبەپتى ءبىز قالاداعى سارىارقا, الماتى جانە ەسىل اۋداندارىنىڭ اكىمدىگىنەن تۇرعىن ۇيلەردەگى بالالار الاڭىندا نەندەي وزگەرىس بارىن سۇراپ بىلدىك.
الاقاي, جاڭا الاڭقاي!
استانا كۇنىنە وراي سارىارقا اۋدانىندا جاڭادان اۋلا اشىلىپ, قالا تۇرعىندارىنا تاماشا تارتۋ جاسالدى. ن.تىلەنديەۆ, 36 مەكەنجايى بويىنشا ورنالاسقان تۇرعىن ءۇي ماڭىندا زاماناۋي رەزەڭكە جامىلعىسى توسەلگەن بالالار الاڭى پايدا بولدى. وندا 12 شاعىن ساۋلەت كەشەندەرى, اتاپ ايتساق, سۇڭگۋىر قايىق, اتكەنشەك, التىباقان, قۇمسالعىش, مۇنارالى كەشەن, «ورنەك» ويىن كەشەنى, سىرعاناق, «كىرپى» ۇيشىگى سىندى ءتۇرلى-ءتۇرلى پىشىندەر ورناتىلعان. بالالارعا ارنالعان كەشەنمەن قاتار, 600-دەن اسا وتباسىنىڭ مەكەنىنە اينالعان ورامدا سپورتتىق جاتتىعۋ زالدارى, فۋتبول الاڭدارى جانە تۇراق ورىندارى قاراستىرىلعان.
سالتاناتتى شاراعا قالا اكىمىنىڭ ءوزى كەلىپ, اباتتاندىرۋ جۇمىستارىن ويداعىداي جۇرگىزىلىپ جاتقانىن ايتتى.
– مەملەكەت باسشىسى تۇرعىندارعا جايلى جاعداي جاساپ, بالالارعا ارنالعان سپورت جانە ويىن الاڭدارىن قالپىنا كەلتىرۋدى جانە جاستاردى بەلسەندى ءومىر سالتىنا شاقىرۋدى تاپسىرعان ەدى. وسى جىلدان باستاپ, قالا اكىمدىگى 370-كە جۋىق اۋلانىڭ قۇرىلىسىن ءبىتىرۋدى جوسپارلاپ وتىر. سونداي-اق, بالالار مەن جاسوسپىرىمدەرگە ارنالعان سپورتتىق جاتتىعۋ زالدارى, كولىك يەلەرى ءۇشىن پاركينگتەر مەن جاياۋ جۇرگىنشىلەرگە 40 الەۋمەتتىك ورىندى پايدالانۋعا بەرۋدى جوسپارلاپ وتىرمىز, – دەدى اسەت يسەكەشەۆ.
ال سامال شاعىن اۋدانىندا تۋرا سول رەتپەن بالالارعا ارنالعان 3 جاڭا الاڭنىڭ قۇرىلىسى باستالىپ كەتتى. بۇگىندە وندا 20 شاعىن ساۋلەت كەشەنى ورناتىلدى.
تاعى ءبىر قۋانىشتى حابار, تۇرعىن ۇيلەردىڭ اۋماعىندا اسفالت-بەتون جامىلعىسى جاڭارتىلعان. فۋتبول جانە باسكەتبول الاڭدارىن جوندەپ, قايتا سىرلاعان. ال ىستەن شىققان ساۋلەت كەشەندەرى الماستىرىلىپ جاتىر. سونىمەن قاتار, تۇرعىن ۇيلەردىڭ اۋلاسىنا جارىق قويۋ دا قاراستىرىلدى. ارنايى جارىق قۇرىلعىلاردى 103 اۋلادا ورناتۋ جوسپاردا بار. ال ازىرشە 56 شام 33 ۇيدە ورناتىلعان.
بۇگىندە اۋدانعا قاراستى 30 مەكەنجاي بويىنشا اۋلالار مەن جولدا جوندەۋ جۇمىستارى اتقارىلدى. جالپى, سارىارقا اۋدانىندا 229 تۇرعىن ۇيدەگى اۋلانى اباتتاندىرۋ جوسپارلانىپ وتىر. ونىڭ 21-ءى بالالارعا ارنالعان الاڭمەن تولىقتاي جابدىقتالادى دەپ كۇتىلۋدە.
تۇرلەنگەن تۇرعىن الاپتار
قالا كۇنىنە وراي الماتى اۋدانىندا ورنالاسقان كەنەن ازىرباەۆ كوشەسى, 6, باراەۆ كوشەسى, 13, قوشقارباەۆ كوشەسى, 40 ۇيلەردىڭ اۋلاسىندا («تۇرسىن استانا-2» تۇرعىن ءۇيى), «سارايشىق» تۇرعىن ءۇي كەشەنىندە اۋلا كۇنى مەرەكەسى تويلاندى. بۇل يگى شارا جىل سايىن كەشەندى اباتتاندىرۋدان وتكەن تۇرعىن ءۇي اۋلالارىندا وتكىزىلىپ كەلەدى. الماتى اۋدانىنا قاراستى كۇيگەنجار تۇرعىن الابى دا نازاردان شەت قالماي, قالالىق جاعاجاي اباتتاندىرىلىپ, پايدالانۋعا بەرىلدى.
قازىرگى تاڭدا اۋدان اۋماعىندا كوپقاباتتى 1138 تۇرعىن ءۇي بولاتىن بولسا, وسى تۇرعىن ۇيلەردى 603 اۋلا قامتيدى. ءاربىر تۇرعىننىڭ جايلى ءومىرى مەن جاسامپاز تىرشىلىگى, قاۋىپسىزدىگى مەن دەنساۋلىعى ءۇشىن اۋلالارداعى ينفراقۇرىلىم اسا ماڭىزدى.
بيىل الماتى اۋدانىندا 125 تۇرعىن ءۇي اۋلاسىن كەشەندى اباتتاندىرۋدان وتكىزۋ جوسپارلانعان بولاتىن. بۇگىندە ونىڭ 13-ءى اباتتاندىرىلىپ, 5-ەۋى پايدالانۋعا بەرىلدى. اتاپ ايتساق, تاشەنوۆ كوشەسى, 15 جانە 6/1, مايلين كوشەسى, 23, كۇيشى دينا كوشەسى, 4, ابىلايحان داڭعىلى, 6/4, ش.ءۋاليحانوۆ كوشەسى, 9, 9/1, 9/2, قوشقارباەۆ داڭعىلى بويىنداعى 40, 40/1, 42, 46, 46/2 ۇيلەردە جانە ب.مومىشۇلى ساياباعىندا ويىن الاڭدارى ورناتىلدى.
ال 60 اۋلانىڭ اباتتاندىرۋ جۇمىستارى اياقتالۋعا جاقىن. ماسەلەن, «سارايشىق» تۇرعىن ءۇي كەشەنىندە, «تۇرسىن استانا-1», «تۇرسىن استانا-2» تۇرعىن ءۇي كەشەندەرىندە ورنالاسقان 22 اۋلادا جانە باسقا دا مەكەنجايداعى اۋلالاردا 277 سپورت جانە ويىن الاڭى, جالپى كولەمى 6150 شارشى مەتر بولاتىن جەرگە تاس توسەلىپ, اسفالتتالدى. اتالعان اۋلالاردا 375 بالالار ويىن كەشەنى جانە شاعىن ساۋلەت كەشەنى قويىلىپ, 7 سپورتتىق الاڭ جاڭارتىلىپ, 4 شاعىن فۋتبول الاڭى اباتتاندىرىلدى. ال 8 مەكەنجاي بويىنشا 62 كوشەلىك جاتتىعۋ الاڭدارى ورناتىلدى.
«قۇلاگەر» تۇر قۇلپىرىپ
ەسىل اۋدانىندا «قۇلاگەر-1», «قۇلاگەر-2» جانە «قۇلان» تۇرعىن ۇيلەرى بويىنشا اباتتاندىرۋ جۇمىستارى اياقتالدى. اۋدان اكىمى ەرماعانبەت بولەكپاەۆ اۋلاداعى وزگەرىستەردى قالا باسشىسى اسەت يسەكەشەۆكە تانىستىردى. الاڭقايعا قاراساڭىز كوز تارتىپ, كوڭىل قۋانتادى. كەشەندى جوندەۋ جۇمىستارىنان كەيىن, بالالار زاماناۋي سپورت كەشەندەرىندە گيمناستيكامەن شۇعىلدانىپ, فۋتبول ويناپ ءجۇر. ودان كىشكەنتاي بۇلدىرشىندەر ءۇشىن اۋلادا قۇم توسەلگەن. بالالار وينايتىن الاڭمەن قاتار, شۇرىق-تەسىك جولدارعا كوڭىل ءبولىنىپ, ءبىرازى جاڭارتىلىپ قالعانىن ايتۋ كەرەك.
استانالىقتار ءوز اۋلاسىنداعى وڭ وزگەرىستەردى بايقاپ, اكىمشىلىككە العىسىن جاۋدىرىپ ءجۇر. اسىرەسە, بالالارىن كوزىنىڭ قاراشىعىنداي قورعايتىن اكە-شەشە ءۇشىن ويىن الاڭدارىنىڭ قاۋىپسىزدىگى اسا ماڭىزدى. اكىمدىككە سەنسەك, وسىمەن جۇمىس تىنعان جوق. سەبەبى جىل سوڭىنا دەيىن 370 اۋلاعا جوندەۋ جۇمىستارى جۇرگىزىلەتىنى بەلگىلى.
گۇلدانا تالعاتقىزى
