ۇلتتىق سپورت جۋرناليستيكاسىنىڭ نەگىزىن قالاۋشى سەيداحمەت بەردىقۇلوۆ «اسپاننان شۇعا جاۋعان كۇن» دەگەن ماقالاسىن تۇشىنىپ وقىعانىم بار-دى. وڭتۇستىك-شىعىس ازيادا وتكەن بايراقتى باسەكەگە تۇسكەن ۆەلوشاباندوزدىڭ كوڭىل-كۇيىن قالامگەر وسىلاي سيپاتتايدى. سول سەكىلدى «اسپاننان التىن جاۋعان كۇن» دەسەك, 37-رەت استانادا ۇيىمداستىرىلعان ازيا چەمپيوناتىنىڭ ءمان-ماڭىزىن اشقانداي بولامىز.
جارىستىڭ سوڭعى ەكى كۇنى ەركىن كۇرەس شەبەرلەرى بوزكىلەمگە كوتەرىلىپ, شەبەرلىك بايقاستى. بايراقتى باسەكەگە ماديار قۇرامىسوۆتىڭ بالۋاندارى بابىندا كەلىپتى. 70 كەلىدە سانجار دوسجانوۆ, 79 كەلىدە بولات ساقاەۆ ەكەۋى جارتىلاي فينالدا يراننىڭ مىقتىسىن ۇتسا, فينالدا وزبەكستان وكىلىنەن ايلاسىن اسىردى. اسىرەسە, بولات ساقاەۆتىڭ فينالداعى قارسىلاسى بەكزود ابدۋراحمونوۆتىڭ داڭقىنان ات ۇركەتىنى راس. توكيو وليمپياداسىنىڭ جۇلدەگەرى, بىرنەشە رەت ازيانى ۇتقان ايلالى, ايبارلى قارسىلاس. الايدا بولات بابىندا ەكەن, وزبەكستاندىق بالۋاننىڭ مىسىن وڭاي باستى. ودان كەيىن 4 سالماقتا قازاقستاندىق بالۋاندار بەلدەسكەن فينالدىق باسەكەنى تاماشالادىق.
74 كەلىدە بەلدەسكەن دارحان ەسەنعالي فينالدا جاپون وكىلى كيرين كينوشيتانى ۇتىپ, التىننان القا تاقسا, 86 كەلىدە ازامات داۋلەتبەكوۆ يران مىقتىسى اليزەرا كاريميدىڭ وسال تۇسىن تاۋىپ, ەكى دۇركىن ازيا چەمپيونى اتاندى. ال 92 كەلىدە ريزابەك ايتمۇحان, 125 كەلىدە يۋسۋپ باتىرمۇرزاەۆ كۇمىس مەدالدى قاناعات تۇتتى.
ءسويتىپ, قازاقستان ەركىن كۇرەس كومانداسى 4 التىن, 2 كۇمىس, 1 قولا مەدالمەن (2006, 2021 جىلى قازاقستان ەركىن كۇرەس بالۋاندارى 3 التىن مەدال ۇتىپ العان-دى), 179 ۇپاي جيناپ, كوماندالىق ەسەپتە ءبىرىنشى ورىننان كورىندى. كوماندالىق ەسەپتە 129 ۇپاي جيناعان جاپونيا ەكىنشى, 124 ۇپاي جيناعان يران ءۇشىنشى ورىنعا يە بولدى.
جارىستىڭ العاشقى كۇندەرى بوزكىلەمكە كوتەرىلگەن گرەك-ريم كۇرەس شەبەرلەرى 1 التىن, 2 كۇمىس, 5 كولا مەدالمەن 160 ۇپاي جيناپ, جالپى كوماندالىق ەسەپتە ءۇشىنشى ورىنعا تۇراقتاعان-دى. 10 سالماق دارەجەسىنىڭ 7-ىندە فينالعا شىققان يراندىق بالۋاندار 5 التىن مەدالعا يە بولدى.
كەيىنگى جىلدارى قىرعىزستاندىق گرەك-ريم شەبەرلەرىنىڭ ونەرىنە قىزىعا ءارى قىزعانا قارايتىن بولدىق. اسىرەسە, 60 كەلىدە كىلەمنىڭ كوركىن قىزدىرىپ جۇرگەن جولامان شارشەنبەكوۆ پەن 77 كەلىدەگى قىرعىز مىقتىسى اكجول ماحمۋدوۆتىڭ ءادىس-ءتاسىلدى ورىنداۋ شەبەرلىگىنە, ءوز-وزدەرىن سەنىمدى ۇستاپ, قارسىلاسىنىڭ مىسىن جاقسى باساتىنىن بىلەمىز. بۇلار ءبىزدىڭ بالۋاندار ءۇشىن الىنباس قامال بولىپ تۇر. ايتپاعىم, يران مەن قىرعىزستان ءبىرىنشى ەكىنشى ورىندى بولىسسە, قازاقستان گرەك-ريم شەبەرلەرى ءۇشىنشى ورىنمەن ويىندى تۇيىندەدى.
1995 جىلى گرەك-ريم كۇرەسىنىڭ بالۋاندارى رۋسلان جۇمابەكوۆ, باحتيار بايسەيتوۆ, داۋلەت تۇرلىحانوۆ, سەرگەي ماتۆيونكو ءتورت التىن مەدال العان ەدى. بۇل ناتيجەنى قايتالاۋعا ازىرگە مۇمكىن بولماي تۇر. ءبىر وكىنىشتىسى دە سول!
ايەلدەر كۇرەسىندە ءبىزدىڭ بۇرىمدىلار جەرگە قاراتپاي, 2 التىن جانە 3 قولا مەدال ۇتىپ الدى. 76 كەلىدە سىنعا تۇسكەن ەلميرا سىزدىكوۆا ەكى دۇركىن, 72 كەلىدە بەلدەسكەن جاميليا باكبەرگەنوۆا ءۇش دۇركىن ازيا چەمپيونى اتانىپ, ۇلت سپورتىنىڭ جاڭا تاريحي بەتىن اشتى.
بۇرىمدىلار كۇرەسىندە كوماندالىق ەسەپتە جاپونيا كوش باستاسا, قىتاي مەن ءۇندىستان ەكىنشى-ءۇشىنشى ورىندى ءبولىستى. ودان كەيىنگى ورىندارعا قازاقستان, وزبەكستان, موڭعوليا, قىرعىزستان يە بولدى.
كۇرەس تۇرلەرى بويىنشا جالپى كوماندالىق ەسەپتە قازاقستان 7 التىن, 4 كۇمىس, 9 قولا مەدال الىپ, ءبىرىنشى ورىننان كورىندى. جاپونيا ەنشىسىنە 6 التىن, 4 كۇمىس, 10 قولا مەدال ءتيىپ, كوماندالىق ەكىنشى ورىن السا, يران كومانداسىنا 6 التىن, 3 كۇمىس, 4 قولا مەدال بۇيىرىپ, ءۇشىنشى ورىننان كورىندى. ودان كەيىنگى ورىنداردى قىرعىزستان, قىتاي, وزبەكستان, ءۇندىستان, موڭعوليا, باحرەين, كورەيا ەلى ەنشىلەدى.
