استانانىڭ اسەمدىگى الەمنىڭ نازارىنا ىلىكتى. تۋريستىك الەۋەتى جاعىنان ازيانىڭ العاشقى بەستىگىنە ەندى. ايگىلى Lonely Planet باسىلىمى استانانى رەيتينگتىڭ 5-ءشى ساتىسىنا ءبىر-اق شىعاردى. بۇل جەردە جاھاننىڭ جانارىن وزىنە بايلاپ, باس قالامىزدىڭ بارلىق الەۋەتىن كورسەتۋگە مۇمكىندىك بەرگەن ەكسپو كورمەسىنىڭ ورنى ەرەكشە.
ايتا كەتەيىك, ەلىمىز تۋريستەردىڭ ەشبىر كەدەرگىسىز كورمەگە كەلۋى ءۇشىن 45 مەملەكەتپەن ۆيزاسىز رەجيم جۇيەسىن ىسكە قوسقان بولاتىن. ولاردىڭ قاتارىندا ەو ەلدەرىمەن بىرگە اقش, كانادا جانە اۆستراليا بار.
رەيتينگ باسىندا قىتايدىڭ ورتالىق بولىگىنىڭ سولتۇستىگىندە ورنالاسقان گانسۋ پروۆينتسياسى تۇرسا, ەكىنشى ورىندى ەكى جاپون قالاسى ءبولىسىپتى. ولار – ءىرى پورتتى قالا يوكوگاما جانە ەلدەگى ەڭ كونە قالالاردىڭ ءبىرى كاماكۋرا. تۋريستەر ءۇشىن ەڭ جىلى ورىن ءۇندىستاننىڭ كەرالا شتاتىنداعى كۇنگەيلى جاعاجايلار ءۇشىنشى ورىندا تۇرسا, ءتورتىنشى ورىنعا تالعاعىشتاردىڭ سۇيىكتى مەكەنىنە اينالعان سينگاپۋردىڭ كەونگ سايك روۋد كۆارتالى ورنالاسىپتى. Lonely Planet ۇسىنعان ازيانىڭ ەڭ كەرەمەت جەرلەرىنىڭ وندىعىنا تاكاياما (جاپونيا), سيان (قىتاي), كاندي (شري-لانكا), مالاككا (مالايزيا) جانە رادجا-امپات (يندونەزيا) ەنگەن.
ەڭ قۋانىشتىسى, تۋريستەر 2017 جىلى بارۋى ءتيىس ازيانىڭ ەڭ كورنەكتى جەرلەرىنىڭ العاشقى وسى وندىعىنىڭ قاتارىندا بەسىنشى بولىپ استانا تۇر. باسىلىم ساراپشىلارى ەلوردامىزدى «شەكسىز جازىق دالانىڭ جۇرەگىندە ورنالاسقان اينەك پەن بولاتتان جاسالعان ساعىم» دەي كەلە, «استانا مەملەكەت باسشىسى نۇرسۇلتان نازارباەۆتىڭ فۋتۋريستىك قيالىنىڭ ءبىر بولشەگى, ونىڭ كوك تىرەگەن ءزاۋلىم ۇيلەرى, ۇلكەن الاڭدارى جانە بۇلىڭعىر اينەكتى پيراميداسى بار» دەپ جازعان.
گۇلجان راحمان
